Dojjecho 12 - Kafa Linguistics Project

¹ Xuuxee gooroo waataan beetaa, “Taan emirikkaache” ne gettemmi natinaꞌo waataan beetaa, ne gurimaashittinee yemeenooch neen Halliton gabibe!

² Aabe, ageneenaa xojjeneenaꞌonochi bekko mandereyaan beetaa, amiyon dichemmi qubo wottee waaꞌi showoon guufaan beetaa,

³ kellechinaꞌo qeweyaan beetaa, giidechinaꞌo goobeyaan beetaa, haddoona giishecheenaꞌo boonoshi tunee naboona maayi yiikkechi genneenaꞌo shuunoon neechaan beetaa, mallee kelloona ciinnii beetinaꞌo ciinnemmon mawiyaan beetaa, neen Halliton gabibe!

⁴ Addibaabooch kichiibeeti kelleenaꞌo hicheyaan beetaa, yiikke xaqqee qaaroon ne waamo waayeyaache getaan beetaa, kafee qaaro tokketoochee neen tiijjaan beetaa, shoddeebeeti maache bushiisheenaꞌochi qaaro naawaan beetaa,

⁵ asheenaꞌo geppoon boonoshi shataan beetaa, gommon shaꞌo shattiyaan beetaa, luuzee mixo bungaan beetaa, gechoo ginneyaan beetaa, amee mooyonona qaatoo ne waanee wohaan beetaa, neen Halliton gabibe! Ashoo bulli bi beemi kexooch hamaa, eeppechinaꞌo gommona yixemminaꞌone.

⁶ Birewee sansalato kuxeyaan beetaa, aachee saano tiisheyaan beetaa, aachi kite qiico aachi xuuphee gaꞌoochaa tiisheyaan beetaa, gengeenaꞌo aachi oppoochaa tiisheyaan beetaa,

⁷ showoo bi showa wotteyaan beetaa, kashe biin halliti Nuggishoo Yeer waan wotteyaan beetaa, neen Halliton gabibe!

⁸ Dojjecho “Duubeexi duubo, bulli mooyo duuboone” iye.

Moochi Taco

⁹ Dojjecho shalligechone; biyoo asheenaꞌoyich ariyoon dojjiye; kichii kindii yexiiꞌi meeti shaahiyeenaꞌon qanniihe.

¹⁰ Dojjecho emirikkiibeeti qaaroon danoyich qaawiye; tunebaani bi koorito iberoonaa tatoonane.

¹¹ Shalligechochi yibbaatoo guxechi gumboommone; bi kiciti shaahiyeenaꞌoo aci misimaaroomminaꞌone. Eboshi ichetoo ikke Qiddoo waaneeniye.

¹² Ta bushoocho, ebiyeeno wotta ne qelloon ne quyemmi bare mooyinaꞌo beetinaꞌone; meeti macaafoon kooroo ciireyaani magge shuunoone; woddoon shemmo ashittinoon taahiihe.

¹³ Ebiyoche bulli mooyon waayeto neene; bulli moochi taco ebine: Yeerin shate; bi geteenaꞌonoo ceechibe; asho koniyoona tuniiya bede mooyo ebine.

¹⁴ Ebiyoo, asho shuuneebeeti gonde shuunoo tuneba deꞌe shuunoo bulli toommooch, aasheexonona echiyaanoon Yeeri nallemmo bi tunoone.