Dojjecho 11 - Kafa Linguistics Project

Shalligechi Asho Tuniiya Bede Mooyo

¹ Ne koshon aachi toommooch dufe! Meeti aaboyee gubb wochi danemmo neene.

² Showee toommooch gonde mooyo amo tunemmo gaata, ariyaano ne tunetoyich, ne gijjoon shabaatte beera woyee shimitte beera qoodibe!

³ Qubo aaqqii manderegaata, amiyo dihiye; mixo deshi-waan, woyee dambi-waan bi dihigaata, are bi dihitooch beehe.

⁴ Yongoon ciinniibeeto shoohaache; quboon ciinniibeeto qecaache.

⁵ Kasho bi indee maacooch beeti bushoo waan aabichiꞌi bi giyiibeeto gaata ariyee ne qayoommon, bulli mooyon halliti Yeerichi shuunoon shalligoo hakkaachine.

⁶ Maaddoona ne yaroon shoohe; womikkoo shoohaanoon kasheyaahine. Ebiyoo guttiyona gaawichi collemmo bi tunoon, woyee gutteexi ikkoo beshoon gaawemmo bi tunoon, ariyaano ne tunetoyichiye.

⁷ Bekko gaawetone; areddee aaboo ciinoyich emirikkitone.

⁸ Asho meeti yemeenoon kashoona bi beegaata, ebi are yemeenooch emiroona beebe; tunebaani manderee yemeeno oogeti genjoo bi tunoon battaaye. Tunemmi mooyo bulli duuboone.

Gurimaashoyich Tunemmi Ciico

⁹ Gurimaashoocho, ne gurimaashittinee yemeenooch emiribe; ne gurimaashittinee yemeenooch ne mullo emiribe; ne aafo ciinnimmonaa ne mullo qaatimmonon, tuniibe; tunebaani ebi mooyo bullich Yeeri nallooch neen giddiyemmo bi tunoon batteyaahine!

¹⁰ Bushittinee giidoonaa gurimaashittinoona kaate beshemmo bi tunetoyich, ayinoon ne mulloochee, gonde mooyonoo ne waanee wokkiibe!