Daaneeli 3 - Kafa Linguistics Project

Taatoo Neechiti Aachoochee Shuuneeti Misilo

¹ Taatoo Nabukadinatsori bi neexo shiche hiroo, bi gidoo shiritte hiroo tuneti misiloon aachoochee shuuniihe. Aroonoo Baabloonee showooch beeti, Duuri bakkooch neechiihe.

² Aroochee taatoo Nabukadinatsori iraasheenaꞌon, ukkireenaꞌon, woraaferasheenaꞌon, mikkirechinaꞌon, araaqee iraasheenaꞌon, nallechinaꞌon, showee geeneenaꞌonaa showoon qeejjii beetinaꞌo bullinon bi neechiti misilee diiree baarooch boonoshi woyemmoyich ceekkiihe.

³ Ebi iraasheenaꞌo, ukkireenaꞌo, woraaferasheenaꞌo, mikkirechinaꞌo, araaqee iraasheenaꞌo, nallechinaꞌo, showee geeneenaꞌonaa showoon qeejjii beetinaꞌo bullina taatoo neechiti misilee diiree baarooch waaꞌi, ebi misilee aafooch neexeheete.

⁴ Aroochee awaajjee gettecho bi qaaroon oogichiꞌi, “Ashi yaroo bulliichee, aagetoo bulliichee, asho yibbaateebeeti noonoo bulliicheenoo kiceeti asheenaꞌote, ittoshich getteeto ebine:

⁵ ‘Xurumbee qaaroon, tiimbe qaaroon, tiree qaaroon, shumburee qaaroon, giishi ximbee qaaroon, ooge ximbee qaaroon, ebi duubbi qiiceenaꞌo bullichi qaaroon ittoshi waayegaata, ta neechiti, aachoochee shuuneeti misiloyich baroona guuferee goyinnebote!

⁶ Baroona guufeꞌi goyinneyaano koniyoona bi beegaata, aaxxeebeeti qaaqqee sheellooch bekkech duppeyemmone’ itone” iye.

⁷ Ebich xurumbee qaaroon, tiree qaaroon, shumburee qaaroon, giishi ximbee qaaroon, ooge ximbee qaaroon, ebi duubbi qiiceenaꞌo bullichi qaaroon boonoshi waayehooba, ashi yaroo bulliichee, aagetoo bulliichee, asho yibbaateebeeti noonoo bulliicheenoo kiceeti asheenaꞌo bulli taatoo Nabukadinatsori neechiti, aachoochee shuuneeti misiloyich baroona guufeꞌi goyinneheete.

Keejje Gurimaasheenaꞌon Asheenaꞌo Taggo

⁸ Areegaata, Baabloonee asheenaꞌoochee ikkikkeenaꞌo taatoo waan giddeꞌi Ayihudeenaꞌon taggeheete.

⁹ Boonoshiyoo taatoo Nabukadinatsorich ishichiyeete: “Taatoocho, hume naton taatebe!

^10-11 Taatoocho, xurumbee qaaroon, tiree qaaroon, shumburee qaaroon, giishi ximbee qaaroon, ooge ximbee qaaroon, ebi duubbi qiiceenaꞌo bullichi qaaroon waayemmo bulli baroona guuferee aachoochee shuuneeti misiloyich bi goyinnemmoyich, baroona guufeꞌi goyinneyaano koniyoona bi beegaata, aaxxeebeeti qaaqqee sheellooch bi duppeyemmoyich awaajjoon kichito neene.

¹² Tunebaani taatoocho, Baabloonee woraafooch boonoshi shuunemmoyich ne iraashiiti ikkikke Ayihudeenaꞌo, eboshiyoo Sidiraaqi, Misaaqinaa Abidinagina, ne getoon mooch haddaaneenaꞌone. Ne nuggisheenaꞌoyich maddaacheete; aachoochee shuuniyaꞌa ne neechiti misiloyichoo goyinneyaacheete” iyeete.

¹³ Ebich taatoo Nabukadinatsori oogeti ippoona Sidiraaqin, Misaaqinaa Abidinaginon deebi bi aafooch boonoshi neechemmoyich tuniihe.

¹⁴ Nabukadinatsori boonoshich ishichiye: “Haanoshite! Sidiraaq, Misaaq, Abidinago! Ta nuggisheenaꞌoyich maddaachone ittoshi getonaa aachoochee shuuniyaꞌa ta neechiti misiloyich goyinneyaachone ittoshi getona iberoone?

¹⁵ Andoo xurumbee qaaroon, tiree qaaroon, shumburee qaaroon, giishi ximbee qaaroon, ooge ximbee qaaroon, ebi duubbi qiiceenaꞌo bullichi qaaroon ittoshi waayemmona, ta neechiti misiloyich baroona guuferee goyinneya ittoshi qannigaata, gaawiye. Goyinno ittoshi qayigaata, aaxxeebeeti qaaqqee sheellooch bekkech duppeyemmo ittoshine. Ta kishoochee ittoshin wodiyemmi nuggishoo, konine?” iye.

¹⁶ Sidiraaqi, Misaaqinaa Abidinagina Nabukadinatsorich ishichiꞌi wochiyeete: “Taatoocho, ebi echoyich wochoo nooch qaawiyaani mooyone.

¹⁷ Taatoocho, aaxxeebeeti qaaqqee sheellooch no duppegaata, biich no goyinnaabeeti Nuggishoo noon wodiyoon hakkiye; ne kishoocheenoo noon wodiyemmone.

¹⁸ Tunebaani taatoocho, noon wodiyoon bi qayi gaatoona, ne nuggisheenaꞌoyich goyinneyaachemmo, aachoochee shuuniyaꞌa ne neechiti misiloyichoo goyinneyaachemmo no tuno neech aricheton tunebe” iyeete.

Qaaqqee Sheellooch Keejje Gurimaasheenaꞌo Duppeyoo

¹⁹ Aroochee Nabukadinatsori Sidiraaqi, Misaaqinaa Abidinaginochi toommooch oogeton ippee shinehe; bi aafoo aaqqiye. Ebi qaaqqee sheelloo bi gaamooch shabaatte kishoon daakkiree bi gaamemmoyich bi asheenaꞌoyich gettiye.

²⁰ Bi ginee naayinaꞌo daggoochee giidechinaꞌo tuneti asheenaꞌo Sidiraaqin, Misaaqinaa Abidinaginon cuyiree qaaqqee sheellooch boonoshi duppemmoyich gettiye.

²¹ Boonoshiyoo ebi asheenaꞌon boonoshi iddimo, kittoo, qelli caacoonaa bare boonoshi taho bullina tookkii cuchiꞌi daammii qaaqqee sheellooch duppiyeete.

²² Qaaqqoo gaawichiree bi gaamemmoyich taatoo manjiiꞌi bi gettitoyich, Sidiraaqin, Misaaqinaa Abidinaginon daammii duppiti asheenaꞌon qaaqqee nalloo michii wuxiye.

²³ Ebi keejje asheenaꞌo boonoshi cuchetona aaxxeebeeti qaaqqee sheellee daggooch dihiyeete.

²⁴ Areegaata taatoo Nabukadinatsori worganoona bi kotetoochee bekkech capphii tiyiꞌi, bi mikkirechinaꞌoyich, “Cucheree qaaqqee daggooch boonoshi duppeyemmoyich no tuniito, keejje asheenaꞌon toone?” iye. Boonoshiyoo “Taatoocho, iberoone; keejje asheenaꞌoniye” iyeete.

²⁵ Biyoo daakkiꞌi, “Ebiyoche, awudde asheenaꞌo qaaqqee daggoona shaꞌee beetinaꞌon beeggaabeeto taane. Boonoshiyoo cucheyaaneenaꞌone. Boonoshi qeddoo ciroona micaanoone. Awuddinnoo nuggisheexi ikkooniye bi shaahiibeeto” iye.

Keejje Asheenaꞌoyich Taatoo Nabukadinatsori Oogoon Wojjoo

²⁶ Nabukadinatsoriyoo qaaqqee sheellee kellooch giddeꞌi, “Beshe Nuggishoo Yeeri guuno tuneti Sidiraaq, Misaaq, Abidinago! Waa keyote; hach wobote” iye. Boonoshiyoo kechiyeete.

²⁷ Iraasheenaꞌo, ukkireenaꞌo, woraaferasheenaꞌonaa mikkirechinaꞌona ikkooch kiceeꞌi, ebi keejje asheenaꞌochi qeddoon qaaqqoo ciroona michaano bi tunoon beeggiyeete. Qaaqqoo boonoshi qelli eexon tuneba boonoshi taheti tahoon michaanoone. Qaaqqee sheerolla boonoshi achooch aalloone.

²⁸ Aroochee taatoo ishichiye: “Bi maraakoon deejjiꞌi, boonoshi Nuggishoyee besh bare nuggishoyich maddoonaa goyinnoonon qajjiti, ta getoon qajjiti, boonoshi kashoon beshiiꞌi immiti, biinoo gibeneti bi guuninaꞌon wodiiti, Sidiraaqi, Misaaqinaa Abidinaginochi Nuggishoo diireebe!

²⁹ “Ebich ebiyoommon wodiibeeti bare nuggishoo aallo bi tunetoyich, Sidiraaqi, Misaaqinaa Abidinaginochi Nuggishoo toommooch gonde mooyon yibbaatemmi, ashi yaroo bulliichee, aagetoo bulliichee, asho yibbaateebeeti noonoocheenoo tuneti asho koniyoona, bi ashittino qecciqeccaayaa bi kuchemmonaa bi kexo happaa bi aallemmonoyich getteto taane” iye.

³⁰ Aroochee taatoo Sidiraaqin, Misaaqinaa Abidinaginon Baabloonee showooch aafichoyee beshe xaaꞌooch iraashiihe.