Asteeri 3 - Kafa Linguistics Project

Ayihudeenaꞌon Wuxi Aalliiya Hamaani Koceyoo

¹ Ebi mooyo tunetoyee gubb, taatoo Yekisesi Agaagi yaroochee tuneti Hamedaati bushoo Hamaanin oogiihe; bare iraasheenaꞌo bulliyee beshoon tuniiꞌi iraashiihe.

² Taatee kechi uxeree kellooch beeti ukkireenaꞌo bulli showooch yitiree Hamaanich boonoshi goyinnemmoyich gettitone. Boonoshi bulli ebin tunii beeheete; tunebaani Mordokiyoosi showooch dihiꞌi biich goyinnemmon qajjiye.

³ Taatee kechi uxeree kellooch beeti ukkireenaꞌo Mordokiyoosin, “Taatoochi getoon ne shaaddeebeeto, amoyichiye?” iyeete.

⁴ Ebinoo qemi qemona biich boonoshi gettitaanona, waayeyaanoone. Biyoo “Ta Ayihudo ta tunetoyich, Hamaanich goyinneyaache” iye. Boonoshiyoo “Mordokiyoosi mooyon Hamaani bi haaꞌiyemmo, aabichireeshiye?” ii worganeebee ebi mooyon biich gettiyeete.

⁵ Hamaaniyoo Mordokiyoosi biich yittiꞌi goyinnee qayon beeggiꞌi, oogichii ippehe.

⁶ Mordokiyoosi Ayihudo tunoon bi waayehooba, Mordokiyoosin baach wuxoo giisheche mooyo tuneꞌi biich bekkehe. Ebich Yekisesi taatee showoo bulliich beeti, Mordokiyoosi asheenaꞌo tuneti Ayihudeenaꞌo bullin wuxi aalliiya qaawiye.

⁷ Taatoo Yekisesi taateti aaraa guttinnee natooba, Nisaani getteebeeti ikkinnee agenooba, Fuuriimi getteebeeti ixoo kuxaa, ebi mooyo tunemmi aaboonaa agenoona arichemmoyich Hamaani gettiye. Adaari getteebeeti aaraa guttinnee agenee aaraa keejjinnee qemooba ebi mooyo tunemmoyich ixoo kechiye.

⁸ Ebich Hamaani taatoo Yekisesich ishichiye: “Ne taatee showee daggooch beeti woraafeenaꞌo bulliich shaceꞌi beeti, ikke ashi yaroo beetone. Ebi asheenaꞌochi sheeroo bare asheenaꞌo bullichi sheeroyee baritone. Boonoshiyoo taatoochi sheeroyich deꞌa getaani asheenaꞌone. Ebi asheenaꞌon cikkii qayo taatoyich gaaweto toonoone.

⁹ Taatoon emirikkemmo bi tunegaata, ebi asheenaꞌo wuxaa aallemmoyich awaajjo keye. Tawoo taatoochi gijjee toommooch ukkireenaꞌoyich keejje ballaa aabbe hume kiilo giraam bede birewoon ta imaa taatoochi ginjabeetooch kotiibeete” iye.

¹⁰ Ebich taatoo bi kisheexi axxaammittee maatemoon kichii Ayihudeenaꞌochi etto, Agaagi yaroochee tuneti, Hamedaati bushoo Hamaanich immiye.

¹¹ Taatoo biich, “Asheenaꞌonaa boonoshi gijjoona neech ichetone; tato shaahiꞌi neech bekketi mooyon tuniibe” iye.

¹² Ebina ikkinnee agenee aaraa keejjinnee qemooba Hamaani taatoochi koorechinaꞌon ceeggiye. Ceeggiꞌi awaajjo baribare noonoo bullina, woraafeenaꞌo bulliich beeti asheenaꞌo kooriibeeti, baribare biroonoo bi gettitoommon tune kooreeree iraasheenaꞌoyich, woraaferasheenaꞌonaa geppee taateenaꞌo bullinoyich bi hammemmoyich gettiye. Ebi awaajjo taatoo Yekisesichi shigoona kooreeꞌi bi kishee axxaamittoona dukkeehe.

¹³ Koorichoo afaafinoona daami shakkiyemmi wocheyechinaꞌo kishoona taatoochi showooch beeti woraafeenaꞌo bulliich hammiye. Ebi koorichooch beeto, Adaari getteebeeti, aaraa guttinnee agenee aaraa keejjinnee qemooba ikke areddoon Ayihudeenaꞌo, gurimaashoonaa geenoona, bushoonaa maacheena getteyaanoon bulli wuxaa, hidaa boonoshi aallemmonaa boonoshich beeto bulli bokkemmonoyich gettii beetone.

¹⁴ Ebi kooree hammiti koorichoo sheeroo tuneree bi kechemmonaa taajjeeti aaboobich boonoshi qannemmoyich, woraafeenaꞌo bulliich beeti asheenaꞌoyich bi awaajjeyemmonoyich getteetone.

¹⁵ Taatoo getaa, wocheyechinaꞌo afaafinoona kechii hammiyeete. Wotta awaajjo inde katemoo Suusaa getteehe. Taatoonaa Hamaanina woyinee uyoon ucha koteheete; tunebaani Suusi katemoo oogichii keqqiye.