Marɩkɩ 1 - Wɛ Tɔnɔ

Jɔn pɛ nɔɔna sɛɛm ye o bere-ba

¹ Kwor-ywoŋa kalo na vei Wɛ Bu Yezu Krista seeni to mo tento.

² Ko na puli tei to tɔge Wɛ sampwora Izaya na maŋe o popone kolo faŋa faŋa ye o tɔɔle Wɛ kwora o we: “Nii, amo Wɛ lage a toŋe a tontoŋeno mo, se o da nmo yiga o vo o kwɛ chwoŋa kalo nmo na wó tɔge da to.”

³ “Nɔɔno mo wo kagoa yuu ne o kaase o kwora ye o we, ‘Zaŋe-na á fɔge á kwɛ dé Teiru wom chwoŋa kam o na lage o ba o tɔge da to. Pa-na se chwei selo o na lage o tɔge to fɔge se yɔɔre lanyerane.’ ”

⁴ Ko déem seene ko ke konto dwoŋi mo. Nɔɔno wodwoŋi déem mo wora, o yere mo Jɔn. O maa wo kagoa ne ye o pa nɔɔna sɛɛm Wɛ ŋwaane. O maa yeini o tɔɔle Wɛ kwora o bere nɔɔna we, ba jege se ba leiri ba wo Wɛ ŋwaane se ba daare ba jwoŋi sɛɛm, se Wɛ laam wó yage ba wɛleera o ma chɛ-ba.

⁵ Nɔɔna dedɛ maa yeini ba nwoŋi Judea nawuura yam maama de Jerusalem ba vei o tei. Ba na tui o tei to, ba maa tɛ jaja ba na ke ba tusi tei to. O laam maa pae se ba zoore Jɔdan buga kam wone ye ba jwoŋi sɛɛm Wɛ ŋwaane.

⁶ Jɔn déem maa zoore gɔrɔ kolo ba na sɔge de kone koro to mo. O maa mae tankila o ja o teiŋa. O wodiu mo ye kayere de tooro.

⁷ O maa tɔɔle o bere nɔɔna o we, “Nɔɔno wodwoŋi wó saŋe amo kwaga o ba, ye wonto tiini o dwoi amo. Amo wo maŋe se a tiiri a le o nɛ natera a pa‑o.

⁸ Amo ná yeini a pa abam sɛɛm, ko ye na mo a mae a ke. Wonto nam ná lage o pa abam jwoŋi sɛɛm, ko wó taa ye Wɛ Sin-laao kom mo o wó pa á jwoŋi.”

Yezu Krista jwoŋi sɛɛm

⁹ Maŋa kam konto ne, Yezu déem ma zaŋe Galili teo kodwoŋi ne, ko yere mo Nazarete. O ma vo o yi Jɔn tei. Jɔn ma pa o zo Jɔdan buga kam wo ye o daare o pa‑o sɛɛm.

¹⁰ Yezu na maa nwoŋi na bam wone to, o ma na wɛyuu na pɔɔre belei, ye o na Wɛ Sin-laao kom na nwoŋi da ko maa beene o baŋa, ko na nye de kunkwoŋa tei.

¹¹ O ma ni Wɛ kwora na ŋɔɔne telaao ne ka we: “Nmo mo ye amo bu-doa a na jege n swono to. N kikia su amo yi.”

¹² Konto na ke bedwe baŋa ne to, Wɛ Sin-laao kom ma ja‑o ko zo kagoa yuu ne.

¹³ O maa wo kagoa kam wone taa, da finna. O na wora to, setaana pɛ maa kwaane o maŋe‑o o nii. O maa zoore de kago-vara, ye Wɛ malese de tui o tei se zeini‑o.

Yezu bwoŋi nɔɔna bana se ba taa tɔge‑o

¹⁴ Ba déem ma ja Jɔn ba ke peena diga ne. Konto kwaga ne, Yezu ma jwoori o vo Galili. O maa wora o tɔɔle Wɛ kwor-ywoŋa kam o bere nɔɔna,

¹⁵ ye o we, “Maŋa kam laam yia Wɛ paare dem na lage de ba o nɔɔna baŋa ne to. Konto ŋwaane, leiri-na á wo de á wɛleera yam se á daare á sɛ Wɛ kwor-ywoŋa kam.”

¹⁶ Yezu déem maa wo Galili naneo kom ni ne o via. O ma na nɔɔna balei, ba na ye chorro to. Ba dedoa yere mo Simon. O nyaane yere mo Anduru. Ba ye ywon-jara mo. Ba maa wo na bam wone ba dole chworu se ba ja ywona.

¹⁷ Yezu ma ta de-ba o we, “Zaŋe-na á ba á ta‑á tɔge amo. Amo wó pa se á ta‑á lage nɔɔna mo se ba ba ba da amo kwaga, se ko taa nye de á zem na jaane ywona tei to.”

¹⁸ O na tage konto to, ba ma zaŋe lela ba yage ba chworu tem ye ba vo ba tɔge o kwaga.

¹⁹ O ma vo yiga fee. O daa ma na nɔɔna balei. Ba dedoa yere mo Jemsi. O nyaane de maa wora, o yere mo Jɔn. Ba kwo yere mo Zebedi. Ba maa wo nabworo wone ba kwɛ ba chworu se ba ma ja ywona.

²⁰ O laam ma yɔɔre o bwoŋi-ba. O na bwoŋi-ba konto to, ba ma zaŋe ba yage ba kwo wom de o tontoŋena bam nabworo kom wone ye ba vo ba tɔge‑o.

Yezu zeili chichira nɔɔno tei ne

²¹ Ba ma tɔge daane ba vo ba zo teo kodwoŋi wo, ko yere mo Kaparenia. Juu tiina siu dɛ dedoa na yi to, Yezu ma vo o zo ba jeerim diga kam se o bere-ba.

²² O na bere-ba tei to, nɔɔna balo na wora to maa tiini ba ye yaau de o berem dem. Ko pɛ se ba lɔre we, o jege dam ko dwoi ba tete zamesem tiina bam.

²³ Nɔɔno déem maa wo ba jeerim diga kam ne ye chichira daane‑o. O ma zaŋe lela ye o kaase o we,

²⁴ “Yezu, Nazarete tu, bɛ mo n lage debam tei ne? Nmo tu se n chɔge debam dwi mo na? A yei nmo na ye wolo. Nmo ye Wo-pwoŋo Tu wolo Wɛ na toŋe to mo.”

²⁵ Yezu ma bwɛ chichira kam o we, “Cheigi sɔɔ, se n yage o yera se n viiri.”

²⁶ O na tage konto to, chichira kam ma tiini ka ja nɔɔno wom ka su ye ka kaase de kwor-dɛa. Ka laam ma yage nɔɔno wom yera ka daare‑o.

²⁷ Nɔɔna bam na nɛ konto to, ko ma so ba maama lanyerane ye ba bwei daane ba we, “Bɛ mo konto? O bere che-doŋa mo ye o berem dem jege dam chekke. Nii o na tɛ chichiri we se viiri, ye se sɛ o ni.”

²⁸ Nɔɔna balo maama na zoore Galili jei sem ne to déem ma ni Yezu ŋwa lela.

²⁹ Yezu de o nɔɔna bam ma nwoŋi jeerim diga kam ne ba kɛ. Ba tɔge de Jemsi de Jɔn ba vo ba yi Simon de Anduru ba sɔŋɔ.

³⁰ Simon tenkaane maa tigi tega ne ye paa jege‑o. Ba ma ta ba bere Yezu ko na ke‑o tei to.

³¹ O ma vo kaane wom tei o ja o jeŋa pa se o zaŋe o jeini. Paa kam ma yage‑o. O ma zaŋe o ke wodiu o pa-ba.

³² Wɛ na zo ye tega daare se ka yi to, nɔɔna maa jaane balo maama na ye jaweena to de setaana na daane balo maama to ba tui Yezu tei.

³³ Teo kom nɔɔna bam maama ma vo ba tigisi Simon ba sɔŋɔ manchwoŋo ni ne.

³⁴ Yezu ma yɔɔre nɔɔna dedɛ de ba jaweero dwi dwi, ye o daare o zeili setaana dedɛ nɔɔna tei ne. O maa wo sɛ se setaana yam ŋɔɔne kolokolo, ya na maŋe ya yei o na ye wolo to ŋwaane.

³⁵ Tega na poore tetete ye wɛ daa ta wo puli to, Yezu ma zaŋe o nwoŋi o vo jei selo nɔɔn-nɔɔno na tera to. O ma vo o ware Wɛ o yera ne.

³⁶ Simon de o yuudwonna bam laam ma zaŋe ba nwoŋi se ba lage o jei.

³⁷ Ba na nɛ‑o to, ba ma ta ded‑o ba we, “Nɔɔna bam maama beeri nmo jei.”

³⁸ Yezu ma leiri-ba o we, “Zaŋe-na se dé kɛ dé vo jei sedwonna. Amo jege se a vo te-balwa balo na wo ywoba seeni to se a tɔɔle Wɛ kwora kam. Ko ye konto ŋwaane mo a nwoŋi se a taa toŋa.”

³⁹ O laam ma beeri o tɔge Galili wo maama. O maa yeini o zoore Juu tiina jeerim di sem. O maa bere nɔɔna Wɛ chega kam ye o zeili setaana nɔɔna tei ne.

Yezu yɔɔre nayɔŋɔ

⁴⁰ Nɔɔno wodwoŋi déem mo wora, o na ye nayɔŋɔ. O ma zaŋe o vo Yezu tei o kuni dwoona o yiga ne o lwoori‑o o we, “Nmo ná laga, n wó wane n pa se a na yazura.”

⁴¹ O ŋwaŋa ma zo Yezu. Yezu de ma twe o jeŋa o dwei‑o, ye o we, “A lage konto. Zaŋe de yazura.”

⁴² O na tage konto bedwe baŋa ne to mo jaweo kom yage nɔɔno wom ye o yera yam kwɛ fase.

⁴³ Yezu ma ta‑o se o viiri lela ye o daare o kaane‑o o we,

⁴⁴ “Yé zaŋe n ta kolo na ke to n bere nɔɔn-nɔɔno. Nam yɔɔre n vo Wɛ kaanem tu wom tei se n pa o nii n yera yam, se n daare n kwei wonnu telo Moses nia yam na bere we te maŋe to n ma n kaane Wɛ. Konto wó bere nɔɔna we n jaweo kom seene ko jei.”

⁴⁵ Yezu na tage konto to, nɔɔno wom ma nwoŋi o kare o ŋɔɔne kolo na ke to, pa se nɔɔna maama lɔre ko ni ne. Konto ŋwaane Yezu daa ware o zo teo de teo wo ye o wo seigi o tete. O ma lɛɛre o maŋe gaao wone nɔɔna na tera mɛ to. Nɔɔna maa yeini ba nwoŋa jei maama ba vei o tei.