Job Tɔnɔ 1 - Wɛ Tɔnɔ

Setaana pɛ na maŋe Job tei to

¹ Nɔɔno déem mo wora, o yere mo Job. O maa zoore Yuzi teo kom wone. O kikia déem tɔge chwoŋa mo, ye tusim tera. O maa kɔre Wɛ, pa se o yɔɔre o cho o tete de lwarem.

² O déem jege bakeiri serepɛ de bukwa batɔ mo.

³ O maa jege pei morro terepɛ (7,000), de kona morro tetɔ (3,000), de nabɛ moro (1,000), de bonɛ bia yanu (500). O ta maa jege tontoŋena dedɛ pa ba toŋe ba pa‑o. Chega to, wonto déem mo ye nadum o dwoi wɛ-puli jei sem nɔɔna maama.

⁴ Job bakeiri sem déem yeini ba ke kuri-fɔrɔ mo ba leira ba pa daane. Ba ma yeini ba bwoŋi daane se ba maama jeeri ba di wodiu ba daare ba nyɔ sana ba dedoa sɔŋɔ ne, ye ba ta ba nakwa batɔ bam se ba de da ba jeeri.

⁵ Job bia bam ná yeini ba di kuri ba ti, o laam wó bwoŋi-ba mo se o kwɛ-ba de chullu tem. O ma yeini o zaŋe tetete o kwei vara o ke zwɛɛm kaanem bu maama ŋwaane. Maŋa maama o yeini o ke konto dwoŋi, bɛŋwaane o yeini o boŋe o tete ne mo o we, “Dɛ delo a bia bam tusi mo ye ba lwɛ Wɛ ba bochwanno wone.”

⁶ Dɛ dedwe mo wɛyuu nɔn-kɔgɔ kom tu ba jeeri Baŋa Wɛ yiga ne. Setaana pɛ de ma da o zo ba wone.

⁷ Baŋa Wɛ ma bwei‑o o we, “Nmo zege yei ne mo n ba ywo?” Setaana pɛ de ma leiri Baŋa Wɛ o we, “A yɔɔre a kare tega kam baŋa ne mo a kekara.”

⁸ Baŋa Wɛ daa maa we, “N nam maane n nii a tontoŋeno Job na ye tei to na? Tega baŋa nɔɔna maama wone nɔɔn-nɔɔno tera o na ye nɔn-ŋom ne wonto na ye tei to. O yɔɔre o tɔge chwoŋa mo, ye o ba jege tusim. O maa kɔre Wɛ, pa se o cho o tete de lwarem kikia.”

⁹ Setaana pɛ ma leiri Wɛ o we, “Job nam na kɔre Wɛ tei to ye kafɛ ŋwaane mo na?

¹⁰ Nmo yeini n kwoli‑o mo se kolokolo yé yi‑o. N ta kwoli o diga tiina de o jejegero maama de mo, ye n daare n pa se kolo maama o na ke to yeini ko ke lanyerane ko pa‑o. Nii o na jege vara dedɛ pa ba su teo kom ni maama tei!

¹¹ N nam ná twe n jeŋa pa se kolo maama o na jege to ti ko daare‑o, o laam wó yɔɔre o lwɛ nmo jaja.”

¹² Baŋa Wɛ ma ta de Setaana pɛ o we, “Tɔ! A kwei o jeŋa woŋo maama a ke nmo dam kuri ne. Nam yé ke o tete yera yam kolokolo.” Setaana pɛ ma yage Baŋa Wɛ tei ye o viiri.

¹³ Dɛ dedwe mo Job bia bam maama déem jei o bakeiri-kwea kam sɔŋɔ ne ba di kuri-fɔrɔ, ye ba daare ba nyɔ sana.

¹⁴ Nɔɔno ma duri o vo o yi Job tei o we, “Dé ya jege n nabɛ sem dé vare mo, ye n bonɛ sem de zege se bwola dáane se di gaao.

¹⁵ Seba tiina badwonna ma pɔpɔ ba zaŋe dé baŋa ne, ye ba kale te maama ba ja ba viiri. Ba ta ma go n tontoŋena bam maama. Amo yerane mo wane a lu se a ba a ta kolo na ke to a bere‑m.”

¹⁶ O ta na wora o tɛ taane dem o bere‑o to mo nɔɔno wodwoŋi de yia. O de ma ta de Job o we, “Doa mo nwoŋi wɛyuu ne ka ba ka bage n pei sem de n tontoŋena bam maama ka go. Amo yerane mo wane a lu se a ba a ta kolo na ke to a bere‑m.”

¹⁷ O ta na wora o tɛ taane dem to mo nɔɔno wodwoŋi de yia. O de ma ta de Job o we, “Chaladea tiina bam jar-keira chɛ ba tete kuni betɔ mo, ye ba pɔpɔ ba zo n kona yam wone ba kale ya maama ba ja ba viiri. Ba ta ma go n tontoŋena bam maama. Amo yerane mo wane a lu se a ba a ta kolo na ke to a bere‑m.”

¹⁸ O ta na wora o tɛ taane dem to mo nɔɔno wodwoŋi de yia. O de ma ta de Job o we, “N bia bam ya wo n bu-kwea kam sɔŋɔ ne mo ba di kuri-fɔrɔ, ye ba nyɔ sana.

¹⁹ Vo-fɔrɔ ma pɔpɔ ko nwoŋi kagoa kam seeni ko ba de dam, ye ko mage sɔŋɔ kom sɛ sem maama pa ko to ko pane ba maama ko go. Amo yerane mo wane a lu se a ba a ta kolo na ke to a bere‑m.”

²⁰ Job na nigi konto maama to, o ma zaŋe o zege wɛɛne o ja o gɔrɔ o kaare wo-chechɔgɔ ŋwaane. O ma cheeri o yuu ye o daare o vwi o yibia tega ne o zuli Wɛ.

²¹ O maa we: “A na nwoŋi a nu puga ne a beene logo baŋa to, a tu bwori mo. A nam ná lage a yage logo kom, a ta wó viiri bwori mo. Baŋa Wɛ ya mo pɛ-ne a wonnu tem maama, ye o daa jwoori o jwoŋi-te. Baŋa Wɛ yere dem nam ta maŋe de tia.”

²² De kolo maama na ke to de, Job wo ke wɛleere. O nam wo poone Wɛ we o tusi.