Ezera 1 - Wɛ Tɔnɔ

Pɛ Sarusi kwora kam

¹ Sarusi déem ye Pa-faro wolo na tei Peresia maama to mo. O paare boboa bene dem ne mo Baŋa Wɛ pɛ se kwora kalo o déem na tɔge Jeremia baŋa ne o ŋɔɔne to ji chega. Ko na ke tei to, o pɛ se Pɛ Sarusi boboŋa mo ja se o toŋe kwora se ka yi o kateira yam maama. Ba ta ma popone o kwora kam ba ke tɔnɔ ne we:

² “Peresia teo pɛ Sarusi ni dem mo tento: Telaao Tu Baŋa Wɛ mo kwei tega baŋa teene maama o pa-ne se a taa tei. O nam kuri amo mo se a lɔ Wɛ diga Judah kateiri dem teo Jerusalem wone a pa‑o.

³ Abam wolo maama ná wo Baŋa Wɛ nɔɔna bam wone, konto tu wɛ dem nam wó taa wo o tei ne. Amo nam pɛ kotu chwoŋa se o vo Jerusalem na wo Judah wone to o lɔ Wɛ diga o pa Isarele tiina wɛ dem, de na ye wɛ delo na zoore Jerusalem ne to ŋwaane.

⁴ Balo na daare ye ba zoore mɛ maama to nam jege se ba woli kotu de kolo maama o na lage ba tei ne to mo. Ba wó woli‑o de lu-nyenno, de sabu-seŋa, de jejegero dwi dwi, de vara, dedaane wo-ywoŋo pɛɛra yalo o na wó kwei o ma kwɛ Wɛ diga kam Jerusalem wone to.”

⁵ Judah dwi dem yiga tiina, de Benjamin dwi dem yiga tiina, de Wɛ kaanem tiina, de Levi dwi tiina, dedaane balo maama Wɛ na pɛ ba boboŋa ja to ma zaŋe ba ti yiga se ba vo Jerusalem ba lɔ Wɛ diga kam ba pa Baŋa Wɛ.

⁶ Ba fara bam maama ma woli-ba de lu-nyenno wonnu, de sabu-seŋa wonnu, de jejegero dwi dwi, de vara, de zele-ŋona na jege yuu to, ko ta woli de Wɛ pɛɛra yam.

⁷ Pɛ Sarusi tete de ma zo Pɛ Nebukadeneza jwona diga ne o le Baŋa Wɛ diga kam wo-laaro telo Nebukadeneza déem na zeŋe o nwoŋi Jerusalem ne o ba o yage da to o ja o nwoŋi.

⁸ O ma kwei-te o ke Miteredafe jeŋa ne se o jeeli te ni, se o daare o ke te maama Sesebazare jeŋa ne. Wonto déem mo ye dedɛɛro wolo na nii Judah kateiri dem to.

^9-10 Ba déem na jeeli zela yalo to mo tento: Sabu-seŋa ware-zwe fintɔ (30). Lu-nyenno ware-zwe moro (1,000). Lu-nyenno zwe sedwonna finlei-nogo (29). Sabu-seŋa kabeili fintɔ (30). Lu-nyenno kabeili bia yana de fuga (410). Zela yadwonna maa ye moro (1,000).

¹¹ Sabu-seŋa de lu-nyenno zela yalo ba déem na kwei ba ke Sesebazare jeŋa ne to maama déem ye morro tenu de bia yana (5,400) mo. Wonto de Juu tiina balo na ti yiga se ba nwoŋi Babilon ne to ma kwei-te ba ja jwoori Jerusalem.