Ezekeli 1 - Wɛ Tɔnɔ

Baŋa Wɛ na le kolo o bere Ezekeli to

¹ Ko déem na yi bena fintɔ bene dem chane sena chana kam da yanu dɛ dem ne to mo amo Ezekeli zege Chebara buga kam ni ne. A maa wora de Judah tiina balo ba na kale jara-keim baŋa ne ba ja vo Babilon to. Amo déem na wora konto to, mo a nɛ wɛyuu kom na pore pa se Wɛ veere o tete o bere-ne.

² Bene dem konto ye ba déem na jaane Judah pɛ Jehoyachin ba kale ba vo jei sem konto ye bena yanu kɛ to mo. Chana kam da yanu dɛ dem ne

³ Baŋa Wɛ kwora déem yi amo ye a zege Chebara buga kam ni ne mo Babilon teo wone. A ma maane we Baŋa Wɛ dam dem tu amo wolo na ye Buzi bu Ezekeli ye a ye Wɛ kaanem tu to baŋa.

⁴ Amo déem kwoni a yuu a nii a na vo-dɛɔ na nwoŋi baŋa seeni ko foore ko beena. Kunkwoŋ-zɔŋɔ ma da ko baŋa ko ba ye ko pepele jei maama de dam. Pwooni delo na tiini de pera to maa gilimi ko maama. Kunkwoŋo kom tetare mini dem yɔɔre de seene mo ne channa na tiini ka nyeene tei to.

⁵ A ma nii a na wo-kenkagela yana na ŋwe to mini dem tetare ne. Ya déem nye de nabiina mo,

⁶ ye wo-kenkagele maama laam jege yibi sena, de vɔna yana se de taa maa jaana.

⁷ Ya nɛ sem nam yɔɔre se twe mo, ye ya napera seeni maa nye de na-mɔra napɔɔna yalo na nyeene ne channa na nyeene tei to.

⁸ Wo-kenkagela sɛ sena sem maama maa jege nabiina jea ya vɔna yam kuri ne mo. Ya yana yam maama maa jege yibia de vɔna tento dwoŋi:

⁹ Ya ma kwei ya vɔna ya dwei daane. Wo-kenkagele maama yɔɔre de vei de yiga na jeeri mɛ to mo, pa se de vei ye de ba pipira.

¹⁰ Ya maama jege yibi sena sena mo na ye se yera: Dedoa maama jege nabiinu yibia de yiga seeni. Nywoŋo yibia maa wo de jazem seeni. Nabea yibia maa wo de jagwia seeni. Maao yibia de maa wo de kwaga kam seeni.

¹¹ Wo-kenkagele maama vɔna zeiŋi wɛɛne mo, ye ya yalei yarege ya dwei wo-kenkagela yalo na zege ya yeiri de yera ne to vɔna yam jazem de jagwia seeni. Ko na daare vɔna yalei yadwonna yam to, de laam ma kwei yanto de kwoli de yera yam.

¹² Wo-kenkagele maama mo yɔɔre de vei yiga ye de ba pipira. Ya maa vei ya jworo kom na bere se ya vo mɛ to.

¹³ Wo-kenkagela yam nye de min-mɔɔla naa min-zwonnu mo wo ya tetare ne. Mini dem maa zaŋa ya tetare ne ye de vei yiga de kwaga. De tiini de nyeene dedɛ mo ye de pepela.

¹⁴ Wo-kenkagela yam tete maa yɔɔre ya vei yiga de kwaga lela ne doa pepelem to.

¹⁵ A na zege da a nii wo-kenkagela yam konto to, mo a nɛ wo-gigilu na tigi tega ne ya maama dedoa dedoa teiŋa ne.

¹⁶ Wo-gigillu tena tem nye daane mo, ye te nyeena ne kandwa-nyenno. Wo-gigilu maama maa nye de ko jege wo-gigilu kodwoŋi na wo ko wone ko gare-ko to.

¹⁷ Wo-gigillu tem maa ná vei mɛ maama, te wó taa yɔɔre te vei wo-kenkagela yam yiga dedoa na yɔɔre mɛ to, ye te ba pipira.

¹⁸ Wo-gigillu tem nia déem dɔra mo ye ya tiini ya jege foone. Yia mo yɔɔre ya faare nia yam jei maama.

¹⁹ Wo-kenkagela yam ná zaŋe ya maa via, wo-gigillu tem de tɔge de-ya te vei mo. Wo-kenkagela yam maa ná jaane ya maa diini wɛɛne, wo-gigillu tem de wó jaane te di wɛɛne mo.

²⁰ Wo-kenkagela yam jworo déem wo wo-gigillu tem wone mo. Mo kokuri, jworo kom maa ná laga se ya vo mɛ maama, ya jege se ya vo dáane mo, ye wo-gigillu tem de wó zaŋe te tɔge te maa via.

²¹ Ko na ye tei to, wo-kenkagela yam ná yeini ya via, wo-gigillu tem de tɔge de-ya te vei mo. Ya nam ná maŋe mɛ ya zege, wo-gigillu tem de wó taa zege mo. Ya daa ná zaŋe ya jaane wɛɛne, wo-gigillu tem de maa tɔge-ya te jaana. Kokuri to, wo-kenkagela yam jworo wo wo-gigillu tem wone mo.

²² A ma nii wo-kenkagela yam yuni tem baŋa kam seeni a na woŋo na nye de wɛyuu pwola to na tigi da. Ka yɔɔre ka jege nenɔŋa ye ka nyeene jei maama mo ne gelaase na ye tei to.

²³ Pwola kam kuri seeni, wo-kenkagele maama yarege de vɔna mo pa ya dwei dedwoŋi vɔna. Wo-kenkagele maama ta ma kwei vɔna yalei de ma kwoli de yera yam.

²⁴ Wo-kenkagela yam ná yeini ya jaana, a ni ya vɔna yam na wuuri tei to mo. Ya sɔɔ kom nye de na-fwaaro na chuuri tei to mo. Ko ta maa nye de Dam-fɔrɔ Tu Wɛ wom tete kwora, naa jar-keira kɔgɔ sɔɔ na ye tei to. Ko daare ya ná jaane ya ti, ya yeini ya yage ya vɔna yam mo.

²⁵ Wo-kenkagela yam na zege da konto ye ya vɔna yam wo tega ne to, a ma ni kwora na nwoŋi pwola kalo na wo ya yuni tem baŋa seeni to.

²⁶ Pwola kam wɛyuu baŋa seeni woŋo maa wora, ko na nye de paare yituŋu, ye Safira mo ba mɛ ba ke-ko. Woŋo kodwoŋi de maa wo wɛyuu baŋa seeni, ko na jei yituŋu kom baŋa ne ye ko nye de nabiinu na ye tei to.

²⁷ A ma nii a na nenɛɛne ko na zege ko teiŋa seeni se ko taa diini to, ko yɔɔre ko nyeene ne channa na wo mini wone tei to mo. Ko ta na zege ko teiŋa ne se ko taa tua to, ko nye de ko ye mini mo. Pwooni delo na tiini de pera to de ma gilimi ko maama.

²⁸ Ko lam dem ye nenɛɛne doa ná nege ka waare ye manlaataŋa yeini ka gare wɛɛne tei to mo. Nyenyego kom konto bere-ne Baŋa Wɛ nenɔŋ-fɔrɔ kom na ye tei to mo. A na nɛ konto to, mo a vwi a yibia tega ne, ye a ni nɔɔno kwora na ŋɔɔne de amo.