Filemono 1 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Ĩngye Paũlo, omundu wʼomũlĩkĩ busana na Kristo Yesu, haguma na Tĩmoteo mũlĩkyetu. Oko mwanze wetu Fĩlemono, oyukakola omũbĩrĩ haguma netu,

² Nʼoko mũlĩkyetu wʼobũkalĩ, ye Afĩa, nʼoko mũsĩrĩkanĩ mũlĩkyetu ye Arkipo, nʼoko kanĩsa eyĩkahĩndana omo nyũmba yawe.

³ Olukogo, nʼobuholo bibye nawe, bĩ­kalũa uku Nyamuhanga, Tata wetu, nʼO­mukama Yesu Kristo.

Olwanzo nʼerĩkĩrĩrya bya Fĩlemono

⁴ Emigulu yosĩ ngakwibuka nʼerikwahula omwʼisaba lyage, kandi ngaha Nyamuhanga wage ewasĩngya emigulu yosĩ.

⁵ Kusangwa ngowa engulu yʼolwanzo lwawe, nʼerĩkĩrĩrya lyawe, ebyo uwite busana nʼOmukama Yesu, nʼakandi busana nʼabandu bosĩ ba Nyamuhanga.

⁶ Kandi ngasaba nyiti, erisangira lyʼerĩkĩrĩrya lyawe lĩkandĩsyawatĩkya eriminya ebyosĩ ebyo muwite busana na Kristo.

⁷ Nabiritsema kutsibu busana nʼolwanzo lwawe, kandi lwabĩrĩnyĩkĩranĩa. Kandi mũlĩkyetu, wabĩrĩsũnga-sũnga emitima yʼabandu ba Nyamuhanga.

Paũlo akabũlaya omwatsi busana na Onesĩmo

⁸ Neryo nomo nangabya nʼehamũlĩ omwisi wa Kristo erikuhamula erikola ekitolere,

⁹ nĩkwa busana nʼolwanzo, ngakũbũlaya, ĩngye Paũlo mũsyakulu, kandi lino indi mundu wʼomũlĩkĩ busana na Kristo Yesu.

¹⁰ Ngabũlaya busana nʼomwana wage omo kisomo, ye Onesĩmo, oyo nabuta omwisi wa Kristo, inyine omo mũlĩkĩ.

¹¹ Erĩmbere abya mundu buyira busana nawe, nĩkwa lino ni mundu wʼendũndĩ busana nʼĩtwe bosĩ.

¹² Ngamũsũbaya ukʼuwe, oyo nyĩhĩrĩre oko mutima wage.

¹³ Kandi nabya nyanzĩre iniabya haguma nage erinyikolera omo mwanya wawe omugulu indi omo mũlĩkĩ busana nʼEngulu Yowene.

¹⁴ Nĩkwa sinabya nyanzĩre erikola omwatsi oyũ ute walĩga, neryo obubuya bwawe sibubye bũkakũnwa, nĩkwa busana nʼerianza lyawe.

¹⁵ Mbino erĩkũlũako lya Onesĩmo oko katambĩ kake likandisyaleka iniabya nawe ebiro byosĩ.

¹⁶ Iniabya kuwe butsira ngʼomukobe. Nĩkwa abye ĩnĩalabĩre omukobe, abye nga mũlĩkyetu mwanze. Ali atya busana nage kutsibu, nĩkwa kwilaba abya atya ukʼuwe, oko mubiri, nʼoko Mukama.

¹⁷ Wamanyiganza ngoko tũsangĩre omo mũbĩrĩ, ũmũkokaye ngoko wanganyĩkokya.

¹⁸ Nĩkwa amabya abirikukola nabi, kutse ali mʼomwĩnda wawe, unganzire byʼoko ngʼebyage.

¹⁹ Ĩngye Paũlo ngasaka ebĩ omo byala byage nyiti, Ingye nasyatũhabyo nĩkwa ngakwĩbũkaya ngoko uli nʼomwĩnda wage busana nʼengebe yawe.

²⁰ Ega, mũlĩkyetu, ngakũbũlaya omwisi wʼOmukama, ũsũngasũnge omutima wage omwisi wa Kristo.

²¹ Ngasaka ebarua eyĩ inabiriminya ngoko ũkandĩowa, kusangwa nyĩnasĩ ngoko Ukandisyakola ndeke kwilaba ebyo ngakubwira.

²² Kandi Ũkokotaye aho nangagotsera; kusangwa indi nʼamaha nyiti, Nyamuhanga asyanyĩsũbya eyo muli busana nʼerisaba lyenyũ.

²³ Epafra, oyũbohĩre haguma nage, busana na Kristo Yesu, akakũkeraya.

²⁴ Kandi Marĩko, na Arĩstarĩko, na Dema, na Lũka, abo tukakola nabo omũbĩrĩ, bakabakeraya.

²⁵ Olukogo lwʼOmukama Yesu Kristo, lubye haguma nʼĩnywe bosĩ.