2 Yoane 1 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Ĩngye mukulu ngakusakira, uwe mugole mwanze nʼabana bawe, abo nyanzĩre kwenene. Butsira ĩngyowene, nĩkwa abosĩ abasĩ ekwenene, babanziĩre.

² Kusangwa omwatsi wʼekwenene amatikene netu, kandi asyabya haguma netu kera na kera.

³ Nyamuhanga Tata, na Yesu Kristo, Omugala wa Tata, atuhe olukogo, nʼeriganyira, nʼobuholo. Ebi bibye byetu omo kwenene nʼomo lwanzo.

Ekwenene nʼolwanzo

⁴ Monatsema kutsibu erieya abandi bʼoko bana bawe ibanemukwama ekwenene, ngoko Tata atuhana.

⁵ Neryo lino, uwe mugole, ngakulemba-lemba nyiti, ĩtwe bosĩ twanzane. Sindisaka ekihano kihya-kihya, nĩkwa ekihano ekyo twabya nakyo erĩtsũka erĩmbere.

⁶ Kandi olwanzo lolũ: tukwame ebihano biwe. Ekihano ekyo kya kino: ngoko mwowa erĩtsũka erĩmbere, kiti twanzane.

⁷ Kusangwa abatebya bangi babiriya omo kihugo. Aba ni bandu abaterĩga ko Yesu Kristo asa omo mubiri wʼomundu. Abo ni batebya, kandi ni nzĩgũ sya Kristo.

⁸ Neryo mũyĩtegaye, mũkasyatalya ebyo mwabirikolera, nĩkwa mubane oluhembo olũhikene.

⁹ Nikwa oyutesiba omwʼĩkangĩrĩrya lya Kristo, nĩkwa akatomeka kulyo kwʼebindi, omundu oyo siamatikene na Nyamuhanga. Nĩkwa Oyukasiba omwʼĩkangirirya lya Kristo, omundu oyũ amatikene na Tata nʼomugala.

¹⁰ Omundu amabahĩkako, atereta erĩkangĩrĩrya erĩ, sĩmũmũkokaye omo nyũmba yenyũ, kutse simumuhe Obuholo.

¹¹ Kusangwa oyũkamũkeraya iniamasangira oko mĩbĩrĩ yiwe mibi.

Ebĩnywa byʼeribuga ebarua

¹² Nyiwite ebĩnywa bingi byʼerĩbatũlĩra, nikwa sĩnyanzĩre erisakabyo omo karatasi nʼobwĩno. Nĩkwa ngwite amaha erĩbahĩkako nʼerĩkanĩa nenyũ obũsũ oko bũsũ, obutseme bwetu bũhĩkane.

¹³ Abana ba mwali wenyũ oyo wayisogawa, bakakũkeraya.