RUTH 1 - BAIBEL KANGTHIR (BSI)

Elimelek Atum Hem Isi Moab Adet Kedam

¹ Kangsai atum det kepangri ahut akhim thurlo, lapen Judia adet Bethlehem asor inut amonit apiso pen asopo banghini ha Moab adet damlo.

² Bangso amonit amen ke Elimelek lapen alangli piso amen ke Naomi lapen asopo banghini amen ke, Mahlon lapen Chilion, halatum Judia adet Bethlehem asor Ephrath aro. Halatum Moab adet damsi hadak dodunlo.

³ Bonta Elimelek, la Naomi apenan thilot-lo lapen bangpi aphan osomar banghini pamotekang-lo.

⁴ Latum Moabpisi piso enlo; inut abangpi amen Ruth lapen akaprek abangpi amen ke Orpah. Latum hadak ningkan kep anbak dolo.

⁵ Lapen Mahlon lapen Chilion banghinita thilot-lo, lasi arloso aphan osomar banghini lapen apenanta thilotsi pamotekang-lo.

Naomi Pen Ruth Bethlehem Kechevoi

⁶ Anke amunpimar pen Moab adet pen kechevoithuji aphan Naomi chesik cheng-lo, pima Hemphu methang arat chevurlo lapen halatum aphan kecho ahormu pitang-lo pu la Moab adet arjulong-lo.

⁷ Lasi bangpi kedo adim pen che-osi amunpimar banghini atum pen chepadisi Judah adet anat kechevoijisi damlo.

⁸ Bonta Naomi amunpimar banghini aphan pulo, “Nanglitum bangphutinta nanglipei ahemle chedamnon. Nanglitum kethitang atum lapen neli phanta kangjinso asonthot-le Hemphu nanglitum aphan pangjinsonang.

⁹ Hemphu nanglitum amethang methang apenan ahemle ehum ahem kelongji aphan nangpapilonang!” Ansi alangli halatum aphan ingjup-lo lapen halatum ase pathedung si chirulo.

¹⁰ Lapen halatum alangliphan pulo, “Kali, nelitum nangli rat anat nanglilong chevoidunpo.”

¹¹ Bonta Naomi pulo, “Pei atum chetavarnon, kopisi nanglitum nelilong nangdun nangpo? Nelipok arlo nesopo dokok pen halatum nangli penan plang-unjilangma?

¹² Pei atum chetevarnon, nangmethang atovarle damnon athe neli penan kedoji a-arta ta lit tang-lo. Jongsi neli ning kethe dolang puseta lapen paningve amat penan dora sopo pado seta,

¹³ halatum kethe an nanglitum chonghong unjima? La pen apot nanglitum penan dodedet apot loma? Kali pei atum, nanglitum ajoine la nelining padukpik athe Hemphu ari neli be thursi jartang-lo, lapen neli nanglitum aphuthak ingjinso-o-lo.”

¹⁴ Lapen halatum ase pathedung pen un an chiruthu lo, lapen Orpah ke anipi aphan ingjup-lo, lapen apei-apo ahem chedamjui lo, bonta Ruth abang ke anipi aphan ot-het-lo.

¹⁵ Lapen alangli pulo, “Langtha, nangli korpike amethang amonit lapen amethang a-arnam anat chevoitang-lo, nangli korpi aphile chevoithunon.”

¹⁶ Bonta Ruth pulo, “Nangliphan o-nangji mate nangli phi kedunkri pen chevoi nangji pu nepurinon; athe nangli konatma kedam nelita nangdun po, lapen nangli konatma kedo nelita nangdo dunpo; nangli ratke neli rat lo, lapen nangli Arnam ke neli Arnamlo;

¹⁷ nangli konatma kethi nelita hadaksi thipo, lapen hadaksi neli chepip-po. Hemphu neliphan la an sose kethile nangli pen nephan pachekakdak seta lason anta paklemnang!”

¹⁸ Lapen Naomi along dunvekpo pu mathathip thek-longsi alangli thangta pupedet-lo.

¹⁹ Anke latum banghini Bethlehem leletik dambomlo. Lapen latum Bethlehem nangle si latum pen apot rong isi chethanseilo, lapen sarpimar atum pulo, “La Naomi kalima?”

²⁰ Alangli halatum aphan thak-lo, “Nephan Naomi pu nehangri, Mara pule nehangnon, athe Jakong Theparpik a-Bang nekai pahodak-lo.

²¹ Ne kedam ahut dorphlup, bonta Hemphu neri angse si ne vang thunang-lo. Kopisi Naomi pu nehang nangpo? Hemphu nephan pasung-lo lapen Jakong Theparpik a-Bang nephan avur pavang-lo.”

²² Lasi Naomi lapen amunpi Ruth, la Moabpi, Moab adet pen kevang abang chevoilo. Lapen alanglitum sok tipliso kerot kecheng ahut Bethlehem nanglelo.