PHILEMON 1 - BAIBEL KANGTHIR (BSI)

¹ Ekorte Timothi pen pen, Khristo Jisu aphan ajok phatek kejang nang abang, neli Polsi labangso akido nelitum ajirpo lapen kam keklemrap-rap abang, Philemon aphan,

² lapen nangli hem along kechingrumbom amondoli mate kroi-asong lapen ilitum angjir, Apphia lapen polton ason thakthak nelitum ari asangho, Arkipas atum aphan tok-lo.

³ Epo Arnam lapen Hemphu Jisu Khristo nanglitum aphan kangjinso lapen ningkangsam nangpapinang.

Philemon Akanghon Lapen Akekroi Alam

⁴ Neli Arnam kardom abataitinta nangliphan mathaponverlo lapen neli Arnam aphan kero piverlo, korte Philemon.

⁵ Thangbakma kangthir atum an aphan nangli akanghon kedo alam, lapen Hemphu Jisu aphan nangli akekroi kedo alam neli arjulong-lo.

⁶ Nangli methang akekroi alam nangli kechethan pen ajok, ilitum Khristo pen kechelangpet pen kelong ahirjume an alam kepachinipame thekji aphansi neli Arnam ardomlo.

⁷ Nangli halatum aphan kanghon apot neli ning arong-olo, lapen neli ning rengmejirlo, bong! Pima nangli kangthir atum aphan ning arong padolo.

Onesimas Aphan Kedengthuji Aphan Kechoningripi

⁸ Labangso apotsi nangli keklem nangji akam nangli keklemji aphan neli Khristo pen kechelangpet pen ajok nangliphan hukum kepiji ajakong do.

⁹ Bonta neli nangliphan nangchinghonlo apotsi neli nangliphan kechoningrijisi ning hang-lo. Neli Pol ke Khristo Jisu apherangkelo, lapen non amatta alangli pen apotsi koidi man nang-lo. Bonta neli nangliphan nang kechinghon apotsi nangliphan choningrilo.

¹⁰ Lasi Onesimas apharman neli nangliphan choningrilo, pima Khristo pen kechelangpet pen ajok alangli ke neli sopolo. Atheke neli phatek kedo ahut karjong anat neli alangli po plangtang-lo.

¹¹ Ahut isi ke alangli nangliphan keningjoino abang-lo, bonta nonke nangliphan lapen neliphanta ale dolo.

¹² Non neli ning aklong pen alangliphan nanglilong nangtoithulo.

¹³ Birta Keme pen apot non neli phatek kedo ahut alangli nangliphan keru kethai alar neliphan keparu kepathaijisi neli ning hang-lo. Lasi neli alangliphan ladak neli long khang ingtung-olo.

¹⁴ Tebonta nangli lamthe longlepin penke neli la keklemji ning hanghedet-lo. Nangli pen hukum lapen akechingvai alam kalite neli la thangta klemkledetpo.

¹⁵ Nangli Onesimas aphan kaike ahutta kechebithuver longji aphansi alangli nangli long pen malomso ahut an aphan kekatjui tahailo.

¹⁶ Lapen nonke alangli ban jong jongchot kalilo, bonta ban apar memuchot abang-lo. Khristo pen kechelangpet pen ajok nonke alangli inut kechinghon akortelo. Neli alangliphan chinghon-olo. Lapen la aparta, ban asonthak thak tame, mate Hemphu pen kechelangpet pen ajok inut akorte asonthak thak settame, alangli ke nangli ko-an akechinghon abang plangpo!

¹⁷ Lasi nangli jongsi neliphan nanglipen kam keklem rap rap abang pu nemathalo tangte neliphan kechak asonthot-le alangliphan chakthunon.

¹⁸ Alangli jongsi kopine akechokche akam klemdet-lo, mate nangli long kopine apreng do tangte neliphanle nehangnon.

¹⁹ Neli labangso alam neli methang ari pensi tok-lo, neli Polsi la tudetpo. Ahok pen pulote nangli methang amatta neliphan ketu nangji do, tebonta lake neli pupelo.

²⁰ Ahok-lo korte, Hemphu amen pen neli nangli pen kopine akerap kelongji ning hang-lo. Khristo pen kechelangpet pen ajok korte asonthak thak-le nangli neli ning arong padotha.

²¹ Nangli neli lam kroiji, lake neli ning theklong-lo; lasi neli labangso alam tok-lo. Pima neli nangkepu ateng nangli klemvekji, lapen la aparta nangli klemji pu neli chini.

²² Lapen neli kedoji adim pathiktha. Pima Arnam nanglitum kadokave akardom arjusi neliphan nanglitum angbong vanthuji pusi neli ning thelo.

Kejut Akardom Kepi

²³ Khristo Jisu pen apot neli pen phatek kejang rap rap abang, Epaphras

²⁴ lapen neli pen kam keklem rap rap atum, Mark, Aristarkas, Demas lapen Lukta nangliphan kardom nangpidunlo.

²⁵ Hemphu Jisu Khristo akangjinso nanglitum kadokave along padonang.