OBADIAH 1 - BAIBEL KANGTHIR (BSI)

¹ Obadiah kemontri alam lahelo: La ke Edom adet aputhak Hemphu Arnamsi pulo. Khei atum anat Hemphu amethang apherangke toitang-lo, lapen Alangli birta netum arjulong-lo: “Chesiknon! Edom abethurra ron chedan damlonang!”

Edom Aputhak Hemphu Aduk Kepiji

² Edom aphan Hemphu pulo, Nangphan Ne pa-ainihakji. abangphutin ta nangphan nang pinremhurpo.

³ Nangnekethe nangphan nangpachobeilo. Nangdet arongsopi ke isi alongpai; nanghem ke ha inglongpi-heihei akangtuisi do, lasi nangmethang chepulo, “Komatsi nephan arum nesanthor unpo?”

⁴ Vomu atar ason kangtui nanghem cheselam seta, la chiklolongso-heihei angbong kedo nangnak seta, Ne nangphan arum nangsanthorji.

⁵ “Ajo kanghu kevang ahut, latum aning kehang alingsi ponchotji. Monit atum drakha athe pangrumlote, latum asap-o ke otekangji. Bonta nang hotur atum nangpavir pilortang-lo.

⁶ Iso aso-asu atum, nangtum akhipuru-heihei kedo-an pontang-lo.

⁷ Nang kechelang atum nangphan nangchobeitang-lo; latum nangdet pen nangphan nangphlungtang-lo. Nang pen kechepangsam arat atum nonke nangphan nangtengkheng tang-lo. Nang pen kechorap-rap nangjirpo atum nangphan pham nangtot-lo; latum nanglam chethansi pulo, ‘La akeresak an konat-lone?’”

⁸ “Ne Edom aphan aduk kepi ahut, halatum arlengkere an aphan Ne pavir-etji

⁹ lapen halatum abidi an pavedetji, lapen Edom along kedo abangphutin aron aso aphan pathilapji.”

Edom Aphan Aduk Kepi Athe

¹⁰ Pima nang korte atum, Jakob aso-asu aphan nang thiparohumlo lapen pathilo, nangphan pavirdetpo lapen kaike aphan nangpinremdetpo.

¹¹ Halatum anghap-heihei hotur atum kephangno ahut halaso arni achar si nang arjap-joisi do. Jerusalem akhi keroipon lapen halatum angbong la kechethak bang adet aso atum ason an nangta hingnolo.

¹² Judah along nang korte atum aphuthak kesung kevang arni nang cholangding nangnedetji apot-lo. Halatum kesung ahut nang ingnekchoidun nangnedetji apot-lo.

¹³ Halatum kevir arni halatum kesung aputhak kehiringdunjile lapen halatum akhi-heihei kecheraidunji pura Nerat arongsopi arlo nang lutdam nangnedetji apot-lo.

¹⁴ Kechepajokji kekat atum aphan kenepdunji pura tovar chetok along nang arjapdunther nangnedetji apot-lo. Halatum kesung arni hotur arideng nang halatum aphan hodaidedet nangji apot-lo.

Khei Atum Aphan Arnam Ingsaipo

¹⁵ Khei atum aphan Ne, Hemphu kangsaiji arni nangtebok-het-lo. Edom aphan kopima keklemtang asonthotsi nangphanta nangklemdetpo. Nang kopisi pitang-loma la nangphan nangpidetpo.

¹⁶ Ne inglong kangthir athak Nerat atum keho-kephik aduk-kepi aharlung juntang-lo. Bonta adung arei adet kedo-an la apar keho-kephik aharlung junpo; halatum la kedo-an junpetpo lapen virdetpo.

¹⁷ “Bonta Zaion Anglong athak ajehak atum jok-lo, lapen la isi kangthir adim plangpo. Jakob arat atum laso alongle cherai longpo, lake halatum kelong nangji apharmanlo.

¹⁸ Jakob lapen Joseph arat atum me ason plangpo; sok anar me kecho asonsi latum Iso aso-asu atum aphan pavirdetpo. Iso aso-asu inutbakta reng-longledetpo. Ne, Hemphu-si kepulo.”

¹⁹ Judah angkang arlo nitur ahin pen rat atum vangsi Edom cheraipo; nichi anglong akeng-ri-heihei pen vangsi Philistia adet cheraipo; Israel aso atum Ephraim lapen Samaria alongri cherai longpo; Benjamin arat atum Gilead endetpo.

²⁰ Nirep a-Israel aron-armu ban kedam pen chevangthusi Philistia lapen ha nirep anat-thu Zarephath anta cheraidetpo. Sardis along kedo Jerusalem ban kedamtang atum vangsi Judah arlo anitur arong-heihei cheraidetpo.

²¹ Jerusalem kehaithor arat atum Edom tengkhengsi la aputhak pangripo. Lapen Hemphu amethangsi Recho plangpo.