MARK 1 - BAIBEL KANGTHIR (BSI)

Jon Baptist Kepachethang Alam

¹ Jisu Khristo, atheke Arnam a-Sopo alamjir a-Birta Keme kecheng lapu helo.

² Lake Arnam amontri, Isaiah ketok asonthot-lo, atheke alangli tok-lo: “Arnam pulo, ‘Chini iktha, ne nepherangke nangphrang toipo, alangli nangphan tovar nang sik pipo.’

³ Komane abang kejejangtang ajo hangkongsi pulo, ‘Hemphu aphan tovar sikpinon, alangli kedamji aphan isi kengset atovar thikpinon!’”

⁴ Lasi Jon kejejangtang ajo cheklangsi baptisom pibomlo lapen pachethang bomlo. Alangli monit atum aphan pachethangsi pulo, “Pap pen nanglitum aning chiruira baptisom ennon; anke Arnam nanglitum apap hei hei diyapo.”

⁵ Judia adet amonit atum an lapen Jerusalem arongsopi kedo atum an alangli dung dambomsi Jordan alangroi along alangli rideng baptisom enbomlo.

⁶ Jon ke ka-ut angmi apesi chepindeng-lo, lapen ok-reng achepansi avam chekok-lo, longvur lapen nampi apijo alangsi chobom-junbomlo.

⁷ Alangli monit atum aphan pachethangsi pulo, “Nepar ajakong kethemu abang nephi vangjilang; alangli keng-op ari kephrijira kangkupdiji aphan anta ne-ot ave.

⁸ Neke nanglitum aphan lang pensi baptisom nangpilo, bonta alangli ke Karjong Kangthir pensi nanglitum aphan baptisom pipo.”

Jisu Baptisom Ke-en Lapen Alangliphan Asat Kelang

⁹ Halabangso arni ahut malom Jisu Galili adet kedo Najareth arongsopi pen vangsi Jordan alangroi along Jon arideng baptisom enlo.

¹⁰ Lapen alangli lang pen nang arlukrak pen mamat sining kangpudang lapen vothung ason Karjong alangli long nangkehir alangli thek-long-lo.

¹¹ Lapen sining pen ase vangsi pulo, “Nang ke ne kechinghon a-Sopolo. Nangphan ne ningdok-olo.”

¹² Lapen hala mamat Karjong alangliphan kejejangtang ajo padamlo.

¹³ Hadak alangli jo phlikep ni phlikep dolo, lapen Soitan alangliphan asat lang-lo. Hadak alangli nampi api atum pen dorap rap-lo, lapen sining apherangke atum alangliphan ruthaibomlo.

Jisu Kam Keklem Kepangcheng

¹⁴ Jon aphan phatek bengdet aphi Jisu Galili alongri vang-lo, lapen Arnam pen kevang a-Birta Keme pachethangsi pulo,

¹⁵ “Ahut choktang-lo, lapen Arnam a-Rat vangtang-lo! Nangtum apap hei hei pen ning chiruira Birta Keme kroinon.”

Ok Keri Amonit Bang Phli Aphan Jisu Kehang

¹⁶ Jisu Galili atalo akung kung kedam un ahut alangli Simon lapen akorte Andriu aphan talo along lan pen ok kenep thek-long-lo; pima halatum ke ok kenep amonit atumlo.

¹⁷ Jisu halatum aphan pulo, “Ne long nangdunnon, ne nangtum aphan monit kenep atum nangpaplangpo.”

¹⁸ Halabangso ahut mamat halatum alan hei hei che-otekangsi alangli phi phi dunlo.

¹⁹ Lapen alangli aphrang anat asapso damchotsi Jebedi asopo, Jems lapen akorte Jon aphan thek-long-lo; halabangso ahut halatum telong arlo lan thik bomlo.

²⁰ Hala mamat halatum apo Jebedi aphan hadak telong arlo kedo kechongdat atum along otekangsi alangli phi phi dunlo.

Jisu Hi-i Kepho Abang Aphan Kepame

²¹ Jisu lapen asangho atum Kapernaum arongsopi damlo, lapen halatum keledam pen puthot a-Sabbath Arni alangli sinagog arlo dunsi lam thanlo,

²² lapen halatum alangli kethan alam pen apot manghuphrong-lo; pima alangli aron thekser atum asonthak thaksi thanlo, lapu kali, bonta hukum kepiji ajakong kedo abang asonthak thaksi alangli halatum aphan thanlo.

²³ Halabangso ahut mamat kangthirthe ahi-i kepho abang sinagog arlo vang-lo, lapen alangli hangsersi pulo,

²⁴ “Najareth a-Jisu, nang netum along kopi akam doma? Nang netum aphan kepavirjisi ladak netum along vang-loma? Nang komatma, lake netum chinilo. Nang ke Arnam pen kevang kangthir-et abang-lo.”

²⁵ Jisu la aphan ingcheksi pulo, “Dojoinon, lapen alangli long pen nangbarnon.”

²⁶ Ansi kangthirthe ahi-i halabangso amonit aphan jasemet heveng-lo, lapen ase kethe pen hangsersi alangli long pen nangbarlo.

²⁷ Kadokave amonit atum manghuphrong-lo; lasi halatum lahin lahin charju seroisi pulo, “La kopi plang-loma? Kopine akaprek kethanmi alamma? Pima labangso amonit kangthirthe ahi-i atum aphan anta hukum kepi un ajakong dolo, lapen halatum alangli lam kroilo.”

²⁸ Halabangso ahut pen mamat Galili alongri adang bithe bitha adimta alangli nong chethangphlup-lo.

Jisu Ongdung Atum Aphan Keso Kepame

²⁹ Jisu sinagog pen nangkebar pen mamat Jems lapen Jon atum pen pen Simon lapen Andriu atum ahem damphit-lo.

³⁰ Halabangso ahut Simon anipi aphu keso pen pangjilo, lapen Jisu nangkele pen halatum Alangliphan labangpi alamjir thanlo.

³¹ Alangli labangpi adung vangsi labangpi aphan ari pen ingthurlo. Ansi labangpi aphu keso medet-lo, lapen labangpi halatum aphan ru-thailo.

³² Arni chidet aphi, ingtingte aphrang halatum Jisu along keso atum an lapen hi-i kepho atum an vanlo.

³³ Rong isi amonit inghap athengnosi chingrumpet-lo.

³⁴ Akaprek kaprek akeso kelong ake-ongpi atum aphan Jisu pamelo, lapen ongdung ahi-i phlung-lo. Alangli hi-i atum aphan paningje longledet-lo, pima halatum alangliphan chinihurlo.

Jisu Galili Adet Kepachethang

³⁵ Adap the-ang prinprele apor Jisu thursi hem pen nangbarlo, lapen monit kavedet adim damsi Arnam ardomdamlo.

³⁶ Bonta Simon lapen ari asangho atum alangliphan ridunlo.

³⁷ Halatum alangliphan chetongsi alangliphan puhurlo, “Kadokave atum nangliphan riphrailo.”

³⁸ Alangli halatum aphan pulo, “Neli tebok terei arongta kepachethangthekji aphan ili dak pen damlonang; pima ne labangso akam aphansi vang-lo.”

³⁹ Ansi alangli sinagog hei hei along pachethang ponbomsi Galili adet adang an damtup-lo, lapen hi-i atum aphan phlungbomlo.

Si-i Arok Akeso Kelong Abang Aphan Kepame

⁴⁰ Inut si-i akeso kelong abang Jisu adung vang-lo, lapen alangli akengphu patongruisi Jisu aphan choningrisi pulo, “Nangli jongsi nanglining hangte, nangli neliphan nepangthir un.”

⁴¹ Jisu alangliphan ingjinsolo, lasi alangli ari chirungsi abang ot-lo, lapen pulo, “Nening hang-lo, ingthirnon.”

⁴² Hala mamat alangli si-i akeso pen medet-lo, lapen alangli ingthirlo.

⁴³ Ansi Jisu alangliphan padamlo, lapen kepu pasodak-lo,

⁴⁴ “Nang labangso alam badu aphanta thanri, bonta nangphrang kengdet damra kurusar aphan chepaklang damnon; lapen nang metang-lo pu kadokave atum aphan angthek kepaklangjile Moses hukum kepi asonthot athok thok-damnon.”

⁴⁵ Bonta alangli damsi bithe bitha adimta labangso alam than pachethang-lo. Lasi Jisu damjoijete nohok arongsopita lutdam thekthedet-lo, bonta monit kavedet ajosi do damlo, lapen bithe bitha adim pen monit atum alangli long vangpet-lo.