LEVI 1 - BAIBEL KANGTHIR (BSI)

Arpum-Kangthim Kephrin Athok

¹ Hemphu kedo a-Pehem pen Moses aphan Hemphu hang-lo lapen lahei Aron alangliphan pilo,

² athema Israel atum halatum athok-heihei kepi ahut ketalon nangji aronlo. Mane abang athok kepi ahut, la alangli achainong angbong ejon tahai mate biresak ejon kalite bi ejon tahai.

³ Jongsi alangli achainong angbong ejon kephrin athok pilote, alangli mesen achainong alo pavannang. La alangli Hemphu kedo a-Pehem kelutdam anghap along pavannang, anke alangliphan Hemphu dengpo.

⁴ Bangso abang la aphu athak ari ot nangpo, lapen la apap-heihei kepapon athok dengpo.

⁵ Alangli hadak chainong alo thatpo, lapen Aaron aro akurusar atum Hemphu aphan vi pipo lapen Pehem kelut amangho along kedo adovan atok-phli anat la arsipo.

⁶ Anke alangli pi areng lumpo lapen la ingthanpo,

⁷ lapen kurusar atum theng ripo lapen dovan athak la me keipo.

⁸ Pi a-ok athan latum me athak aphu lapen athu anta phi-etpo.

⁹ Bangpo abang aphek-angthin-heihei an cham-et nangji, lapen aphi akeng-heihei ta cham nangji, lapen adeng kedo akurusar abang dovan athak athok kangthim phrin nangji. Labangso kecho athok angnim Hemphu aphan aning pangsamlo.

¹⁰ Mane abang jongsi amethang abiresak mate abi athok pajirlote, la aju kavepin alo nangji.

¹¹ Alangli la dovan anirep anat pathubub lonang, lapen kurusar abang dovan atok-ano-phli anat la avi parsilonang.

¹² Bangso abang la ingthan et aphi, adeng kedo akurusar abang athantin aphu lapen athu anta me paphilonang.

¹³ Bangso abang aphek angthin an pacham-etnangji lapen aphi akeng anta pachamnang. Lapen kurusar abang Hemphu aphan athok pajirlonang lapen la kedo-an dovan athak paphrin-et-lonang. Bangso kecho athok angnim Hemphu aphan aning pangsamlo.

¹⁴ Mane jongsi kephrin athok aphan vo pilote, la vothung kalite nampi avothung animso papinang.

¹⁵ Kurusar abang la dovan along vansi angphun hevengbuppo, lapen la aphu dovan athak phrinpo. La avi dovan akung palipo.

¹⁶ Alangli aphek-tung ensi arveng en-et nangji lapen dovan anihang anat kedo athek-lo along vardam nangji.

¹⁷ Anke alangli la avengkong otsi abang ingsekpo, bonta avengkong ke ingsekse detpo, anke dovan athak akangthim amat phrindutpo. La kecho akephrin athok angnim Hemphu aphan aning pangsam lo.