HAGGAI 1 - BAIBEL KANGTHIR (BSI)

Kardomhemthepi Kekimthuji Aphan Hemphu Hukum Ketho

¹ Darias Recho hini aningkan, throk achiklo kecheng arni Hemphu alam Haggai montri pen ajok Sheal-tiel asopo Jerubbabel, la Judah a-Govornor aphan lapen Jehozadak asopo Joshua kurusarpo aphanta vangsi pulo,

² “Muluk a-Hemphu lasonsi pulo: Hemphu ahem kekimthuji apor nangletang-lo pusi bangso arat pubomlang.”

³ Ansi Hemphu alam Haggai montri pen ajok vangsi pulo,

⁴ “Nehem keru virrang ahut nangtum kimpamesen ahem kechedo nangtum aphan aporloma?

⁵ Non lasi muluk a-Hemphu lasonsi pulo: Nangtum atovar chelangnon.

⁶ Nangtum rik olo, lapen acherso natsi rot-longchot; nangtum cholo bonta kaike nangtum ingkrangkrelo, nangtum junlo bonta la kaiketa dorde, nangtum pe che-umlo seta inutbakta ar-om-e; lapen chongdat abang pangrum seta kerak athia along kethapjisi pangrumchot-lo.”

⁷ Muluk a-Hemphu lasonsi pulo, “Nangtum atovar chelangnon.

⁸ Inglong-heihei arludamnon lapen thengpi vannon lapen Nehem kimthunon, la Nening dokpo lapen Nenongta thepo, pusi Hemphu pulo.

⁹ Ake-ong kerot-longjisi nangtum cholang-lo, lapen langtha, la chersonat-lo, lapen nangtum hem la vandet ahut, Ne vutphit-lo. Kopi apot? Muluk a-Hemphu si pulo. Atheke Nehem keru virrang ahut anut-tinta amethang methang ahem aphansi klemrok-rak-lo.

¹⁰ La apotsi sining angsong pen ar-e khang-lo lapen longleta kepatheji pen khang-lo.

¹¹ Lapen longle aputhak, lapen inglong aputhak, sok aputhak, drakhakemi aputhak, jangthu lapen longle pen athe kelongji an aputhak, monit lapen kepangreng api aputhak lapen halatum kam keklem-heihei aphuthak akhim phalo.”

Rat Atum Hemphu Ahukum Kekroi

¹² Ansi Shealtiel asopo Jerubbabel lapen Zehozadak asopo Joshua, kurusarpo rat kedo-an pen Bebilon adet ban kedo pen nangchevoilo, la ke amethang atum a-Arnam Hemphu alangliphan ketoitang ateng, lapen rat atum Hemphu angno pherelo.

¹³ Ansi Haggai, la Hemphu apherangke rat atum aphan Hemphu alam pulo, “Ne nangtum along dolo pusi Hemphu pulo.”

¹⁴ Lapen Shealtiel asopo Jerubbabel, la Judah a-Govornor, lapen Jehozadak asopo Joshua, la kurusarpo lapen rat kedo-an aning Hemphu parungsi lapen latum vangsi a-Arnam muluk a-Hemphu hem kekimthujisi pangcheng-lo.

¹⁵ La throk achiklo, ingkoiraphli arni, Darias Recho kecho hini aningkan.