Enšimmäini kirjani Timofeilla 3 - Uuši Šana vienankarjalakši

Mimmosena uškojakunnan piämiehen pitäy olla?

¹ Tämä šana on varmašti totta: ken pyrkiy uškojakunnan piämiehen virkah, še tahtou hyväh ruatoh.

² Uškojakunnan piämiehen pitäy olla šemmoni, keneššä ei ole mitänä moitittavua. Hänen pitäy olla yhen naisen mieš, šelväpäini, vakava, rehellini, hänen pitäy hyvin vaššata vierahie ta olla hyvä opaštaja.

³ Hänen ei šua olla viinah mänijä, ei toračču, ei riitelijä, ei oman hyövyn šuahuštaja, vain hyväšanani ta šopusa, ei rahalla ahneh.

⁴ Pitäkkäh hiän hyvyä huolta omašta kotiväještä, kašvattakkah lapšieh, jotta ne oltais tottelijat ta kunnivoitettais kaikkie.

⁵ Kun ken ei šuattane pityä huolta kotiväještäh, niin mitein hiän vois huolehtie Jumalan uškojakunnašta?

⁶ Piämiehenä ei šua olla vašta uškoh kiäntynyt, jotta hiän ei rupieis šuurenteliutumah eikä joutuis suutittavakši yheššä juavelin kera.

⁷ Hänen pitäy olla hyväššä luvušša uškojakunnan ulkopuolella niise, jotta häneštä ei paistais pahua ta jotta hiän ei puuttuis juavelin anšah.

Mimmosina pitäy olla uškojakunnan tijakonien?

⁸ Uškojakunnan tijakonien niise pitäy olla kunnon ihmisie, ei kakšinuamasie. Heijän ei šua tottuo viinah eikä šuahuštua omua hyötyö.

⁹ Heijän pitäy hyvin tietyä miän ušon opaššukšet ta pityä omahenki riähättömänä.

¹⁰ Heitä niise pitäy enšin tutkie, ta kun heistä ei löyvettäne mitänä moitittavua, hyö šuahah ruatua tijakonina.

¹¹ Šamoin heijän naisien pitäy olla kunnon ihmisie, hyö ei šuaha paissa muista pahua. Heijän pitäy olla šelväpäisie ta šemmosie, jotta heih voipi kaikešša uškuo.

¹² Tijakonin pitäy olla yhen naisen mieš, ta hänen pitäy hyvin huolehtie omista lapšista ta kotiväještä.

¹³ Niitä, ken hoitau tijakonin työn hyvin, pietäh hyväššä luvušša ta hyö voijah rohkiešti paissa ušošta Hristossah Iisussah.

Ušon peittoas's'at

¹⁴ Tätä kirjuttuas's'a toivon, jotta piäšen ruttoh šiun luokši.

¹⁵ Ka kun viikoštunen, šuat täštä kirjasešta tietyä, mitein pitäy olla Jumalan kojissa. Še koti on elävän Jumalan uškojakunta, kaiken tositiijon pylväš ta kivijalka.

¹⁶ Miän pyhän ušon peittoas's'a on šuuri: – Jumala tuli muailmah ihmisen runkošša, Henki tovisti, jotta Hiän kelpuau Jumalalla. Anhelit nähtih Hänet, Häneštä šaneltih muailman kanšoilla, Häneh ušottih muailmašša, Hänet otettih jumalalliseh valoh.