Enšimmäini kirjani Timofeilla 2 - Uuši Šana vienankarjalakši

Neuvoja uškojakunnan sluušpah nähen

¹ Mie neuvon teitä, jotta ennein kaikkie muuta anotta Jumalalta apuo, moliuvutta, luvetta malittuja ta passipoitatta Jumalua kaikkien ihmisien puolešta.

² Moliutukkua čuarien ta kaikkien vallanpitäjien puolešta, jotta myö voisima elyä tyyntä ta rauhallista elošta Jumalua varaten ta arvokkahašti.

³ Tämmöni malittu on hyvä ta še on mielehini Jumalalla, miän Pelaštajalla.

⁴ Hiän tahtou, jotta kaikki ihmiset pelaššuttais ta šuatais tietyä, mitä Hyvä Viesti opaštau.

⁵ – On vain yksi Jumala, ta vain yksi voit yhistyä Jumalan ta ihmisen, ihmini Hristossa Iisussa.

⁶ Hiän anto oman henkeh makšukši kaikkien puolešta, näin Hiän tovisti oikieh aikah Jumalan hyväštä tahošta.

⁷ Tämän viessin šanelijakši ta apostoliksi miut on pantu. Mie pakajan totta Hristossan nimeššä, en valehtele. Miut on pantu toisenvierosilla kanšoilla oikien ušon opaštajakši.

⁸ Šentäh mie tahon, jotta miehet joka paikašša moliuvuttais, noššettais käteh Jumalan puoleh puhtahin mielin, ilmain vihua ta mitänä epyälömättä.

⁹ Šamoin tahon, jotta naiset šuoriuvuttais šiivon vuatteih, kaunissettais iččieh šiivošti ta huikieta varaten – ei tukkie pöyhistämällä, ei kultakoruloilla, simčukoilla tahi kallehilla vuatteilla.

¹⁰ Jumalah uškojilla naisilla paššatah kaunissukšekši hyvät ruavot.

¹¹ Naisen pitäy kuunnella opaššušta pakajamatta ta tottelijaisena.

¹² Mie kiellän naista opaštamašta tahi komentelomašta omua mieštäh. Hänen pitäy elyä hil'l'asena.

¹³ Enšinhän Jumala luati Aatamin ta šiitä vašta Ievan.

¹⁴ Ta ei šitä Aatamie petetty, kun naini anto pettyä iččeh ta rikko Jumalan käšyn.

¹⁵ Lapšenšuajana naini kuitenki pelaštuu, kun vain pisynöy ušošša, tykännöy toisie ta elänöy šiivošti pyhyä elämyä.