Enšimmäini kirjani korinfilaisilla 16 - Uuši Šana vienankarjalakši

Rahankeräyš Jerusalimin rissityillä

¹ Kun keryättä rahua Jerusalimin pyhillä, ruatakkua niin, mitein mie neuvoin Galatijan uškojakuntie:

² netälin enšimmäisenä päivänä jokahini teistä pankah šiäštöh rahua šen mukah, min tienuau. Rahua ei pie ruveta keryämäh vašta šilloin, konša mie tulen.

³ Šiitä konša tulen, työnnän tiän valiččomat miehet kirjasien kera viemäh tiän lahjua Jerusalimih.

⁴ Kun miun iččeni niise pitänöy lähtie šinne, niin myö lähemmä yheššä.

Kunne Puavila meinuau matata?

⁵ Mie tulen tiän luo, konša käyn enšin Makedonijan uškojakunnissa. Mie niätšen meinuan matata Makedonijan kautti.

⁶ Voit olla, jotta jiän tiän luo vähäsekši aikua, onnakko koko talvekši. Šiitä työ šuorittaisija miut matkah, kunne lähtenenki.

⁷ En taho nyt kyličči mataten pistäytyö teitä kaččomah, kun toivon, jotta voin jiähä tiän luo pitemmäkši aikua, kun šemmoni ollou Hospotin tahto.

⁸ Jiän tänne Efessah Stroiččah šuate,

⁹ šentäh kun tiälä miula avautu ovi šuurella ta antosalla työllä. No vaššuštajie niise on äijän.

¹⁰ Konša Timofei tulou tiän luo, pitäkkyä huoli, jotta hänen ei tarviče šielä mitänä varata. Hiän ruatau Hospotin työtä niin kuin mieki,

¹¹ šentäh kenenkänä ei pie pahekšie häntä. Hommakkua hänet rauhašša matkah, jotta hiän tulis jälelläh miun luo. Vuotan häntä tiälä toisien vellien kera.

¹² Velli Apollossua mie äijälti molin, jotta hiän läksis toisien vellien kera tiän luo, ka hiän ei tahton lähtie nyt. Hiän tulou šiitä, konša hänellä paššuau.

Loppušanoja ta tervehykšie

¹³ Valvokkua, pisykkyä lujina ušošša, olkua rohkiet ta lujat.

¹⁴ Kaikki, min ruatta, ruatakkua tykkyämisen kera!

¹⁵ Ta vielä yksi as's'a, vellet. Niin kuin tiijättä, Stefana ta hänen kotijoukko ollah enšimmäiset uškoh kiäntynehet Ahaijašša. Hyö on ruvettu auttamah uškojie.

¹⁶ Molin, jotta totelkua heitä ta kaikkie, ket ruatah ta nähäh vaivua yheššä hiän kera.

¹⁷ Olen iloni šiitä, jotta Stefana, Fortunatti ta Ahaikka tultih tänne. Tiän tilašta hyö ollah miun kera.

¹⁸ Hyö noššatettih miun mieltä niin kuin tiänki. Pitäkkyä tämmösie miehie arvošša!

¹⁹ Aasijan muakunnan uškojakunnat työnnetäh teilä tervehyisie. Akila ta Priskilla ta heijän koissa keräytyjä uškojakunta työnnetäh teilä äijän tervehyisie Hospotin nimeššä.

²⁰ Tervehyisie kaikilta vellilöiltä. Tervehtikkyä toini toista, šepäytykkyä kuin vellet.

²¹ Mie, Puavila, kirjutan täh tervehyisie omalla kiällä.

²² Ken ei tykänne Hospotie, hiän olkah kirottu. Maranafa! «Miän Hospoti tulou!»

²³ Miän Hospotin Iisussan Hristossan armo olkah tiän kera.

²⁴ Armahat tervehyiset miulta teilä kaikilla, Hristossan Iisussan omilla. Amin.