Yona 4 - MBIVILIA ŨVOO MŨSEO

Yona Aithata nũndũ wa Tei wa Ngai

¹ Yona nĩwathatie mũno nũndũ ndaaendeew'a nĩ ũndũ ũsu.

² Nĩwavoyie Mwĩai Ngai asya atĩĩ, “Ame Mwĩai Ngai, ũndũ ũũ tyo w'o naisye kana ũkeeka ndanamba kuma mũsyĩ? Kĩu nĩkyo kyatumie nĩkalaata na nakĩa nathi Talisisi; nĩneesĩ kana we wĩ Ngai mũseo na wĩ tei, ndũthataa mĩtũkĩ na wĩ wendo mwingĩ ũtaolekaa. Wĩ Ngai ũla ũalyũlaa mosũanĩo na kũlea kũete ũthũku.

³ Yu ame Mwĩai Ngai, osa thayũ wakwa, nĩ kavaa ngakw'a kũte kwĩthĩwa nĩ thayũ.”

⁴ Mwĩai Ngai nĩwakũlilye Yona atĩĩ, “Wĩona ta ũkwĩka nesa ũithata?”

⁵ Yona nĩwaendie ekala vandũ ngalĩko ya wumĩlonĩ wa syũa wa ndũa ya Nineva. Nĩwaseũvisye kĩvanda na ekala muunyĩnĩ wakyo eteelete one ũndũ ndũa ĩsu ĩkwĩka.

⁶ Nĩvo ĩndĩ Mwĩai Ngai watumie mũmea wa mũthemba wa wũngũ ũmea na kwĩana. Aũmeisye nĩ kana wĩkĩĩe Yona muunyĩ na Yona ayĩthĩwa e mwĩanĩe. Kwoou Yona nĩwatanie mũno nũndũ wa wũngũ ũsu.

⁷ Ĩndĩ ũnĩ ũsu kwakya Ngai nĩwaetie kĩinyũ kyaya ũla wũngũ wooma.

⁸ Syũa yauma, Ngai nĩwaetie kĩseve kĩvyũ kuma wumĩlonĩ wa syũa, na syũa yavĩvya Yona mũtwe mũno nginya akwatwa nĩ mũnyalo. Yona nĩwendie akw'e na asya atĩĩ, “Nĩ kavaa ngakw'a kũte kwĩkala thayũ.”

⁹ Ĩndĩ Ngai nĩwakũlilye Yona atĩĩ, “Wĩna kĩtumi kĩseo kya kũthata nũndũ wa ũla mũmea?” Yona asũngĩa amwĩa, “Ĩĩ, nĩ na kĩtumi kĩseo kya kũthata, kũthata kũvikĩa kũkw'a!”

¹⁰ Nĩvo ĩndĩ Mwĩai Ngai weeie Yona atĩĩ, “Wĩthĩĩtwe ũithĩnĩka nũndũ wa wũngũ ũũ, o na vala ndwaaũsũvĩa kana ũkatuma wĩana. Ũnameie na weana o ũtukũ ũmwe na wooma ũtukũ ũla ũngĩ.

¹¹ Nĩkũlya, nyie ndyaĩlĩte kwĩw'ĩa ndũa ĩsu nene ya Nineva tei? Ndũa ĩsu yĩ andũ mbee wa ngili ĩana na mĩongo ĩlĩ matatonya kũvathũkany'a ũseo na ũthũku, na o ta ũu yĩ indo mbingĩ.”