WATHI 6 - MBIVILIA ŨVOO MŨSEO

¹ We ũla mwanake kwĩ aka onthe, mwendwa waku aendie nakũ? Mwendwa waku esĩla va, nĩ kana tũkũtetheesye kũmũmantha?

Mũtwawa

² Mwendwa wakwa athi mũũndanĩ wake, vala ve ivũĩo sya mĩtĩ ĩla ĩseũvasya mauta me mũuke mũseo, kũĩthya indo syake mĩũndanĩ, na kũmbany'a malaa ma lili.

³ Mwendwa wakwa nĩ wakwa, nakwa nĩ wake, aĩthasya ndĩthya yake ya mbũi na malondu malaanĩ ma lili.

Wathi wa Katano Mũtwaani

⁴ Mwendwa wakwa, wanakavĩte ta ndũa ya Tilisa, wĩ wa kwendeesya ta Yelũsalemu, wĩ wa kũtĩsya ta nguthu ya asikalĩ me na ivevelo.

⁵ Mwa thyũũa metho maku maikanzisye, nũndũ wanzisya nĩmeũnthĩny'a. Nzw'ĩĩ yaku ĩilyĩ ta ndĩthya ya mbũi, itheete Kĩĩmanĩ kya Ngileati.

⁶ Maeo maku meũvĩte ta malondu maka, maumĩte kũthambw'a, ala onthe masyaa mavatha, na vai yĩmwe yamo yĩkw'ĩĩwe nĩ katena.

⁷ Matau maku mailyĩ ta nyusu ya ĩkũngũmanga, me ungu wa suka waku mũvũthũ wa kũvw'ĩka ũthyũ.

⁸ Nĩvatonya kwĩthĩwa na iveti sya mũsumbĩ mĩongo thanthatũ, na iveti ingĩ sya ndũsyo mĩongo nyanya, na eĩtu matatalĩka,

⁹ ĩndĩ ĩvũĩ yakwa, ũla wakwa mũseo, no ũmwe tũ, nowe mwĩĩtu e weka wa nyinyia, mwana ũla wendetwe vyũ nĩ nyinyia. Eĩtu nĩmamwonaa na kũmwĩta mũathime; o ta ũu iveti sya mũsumbĩ na iveti syake sya ndũsyo nimũtaĩaa.

¹⁰ Nũũ ũyũ wonekaa ta kyeni kya kũikya, mũseo ta mwei, na mũtheu ta syũa, wa kũtĩsya ta nguthu ya asikalĩ mena ivevelo?

¹¹ Nĩnatheeie mũũndanĩ wa mĩtĩ ya matunda ya mũlosi, kũsisya mĩmea ĩla ĩmeete mwandanĩ, kũsisya kana mĩsavivũ nĩ mĩlaũku, na kana mĩkũngũmanga nĩyumĩtye malaa.

¹² Nyie ndataĩĩe, wendi wa ngoo yakwa nĩwatumie nĩlĩsa ĩkasyanĩ ya kaũ ya mũnene wakwa.

Aka

¹³ Syoka, syoka, we mwĩĩtu Mũsulami, Syoka, syoka, nĩ kana tũkũsisye. Mwĩenda kũnzisya nyie Mũsulami nĩkĩ, ta mũũnzisya ngĩsũnga nĩ mbee wa nguthu ilĩ sya asikalĩ?