Tito 2 - MBIVILIA ŨVOO MŨSEO

Ũmanyĩsyo ũla Waĩlĩte kwa Ikundi syĩ Kĩvathũkany'o

¹ Ĩndĩ we waĩlĩte kũmanyĩsya maũndũ ala mosanaa na ũmanyĩsyo ũla wa w'o.

² Manyĩsya atumĩa methĩwe na wĩting'o, ma kwĩkwatw'a, na me na mosũanĩo maseo; methĩwe andũ ma w'o mũĩkĩĩonĩ, wendonĩ na wũmĩĩsyonĩ.

³ O ta ũu manyĩsya aka ala akũũ kwĩthĩwa na mwĩkalo ũla waĩlĩte. Maikethĩwe andũ ma nzukũ kana athengi. Nĩmamanyĩasye maũndũ ala maĩlĩte.

⁴ Nĩvo ĩndĩ meĩthĩwa matonya kũmanyĩsya aka ma mũika kwenda aamũũme na syana syoo,

⁵ kwĩthĩwa me na wĩting'o, ũtheu wa ngoo, na kwĩthĩwa aka aseo ma mũsyĩ, me tei na menyivĩasya aũme moo, nĩ kana mũndũ o na wĩva ndakaneene ndeto nthũku ĩũlũ wa ndeto ya Ngai.

⁶ O ta ũu thangaasya anake methĩwe na mwĩkalo mũseo.

⁷ Maũndũnĩ onthe waĩlĩte kwĩthĩwa we mwene wĩ ngelekany'o nzeo nthĩnĩ wa mwĩkalo waku. Kũmanyĩsyanĩ kwaku onany'a ũima, na ndũkethĩwe na ngũĩ.

⁸ Neenaa ndeto syĩ kĩtumi ila itatonya kumw'a ĩvĩtyo, nĩ kana amaitha maku makwatwe nĩ nthoni, nũndũ wa kwaĩwa nĩ ũndũ o na wĩva mũthũku maneena ĩũlũ waitũ.

⁹ Na o ta ũu manyĩsya athũkũmi menyivĩasye anene moo, mamathũkũmae nesa mate kũmatũngĩthya,

¹⁰ kana kũmoyĩa. Ĩndĩ methĩwe me aĩkĩĩku maũndũnĩ onthe, nĩ kana ũmanyĩsyo ĩũlũ wa Ngai Mũtangĩĩi waitũ, wĩthĩwe wĩ wa kwendeesya.

¹¹ Nũndũ Ngai nũvuanĩtye mumo wake, nĩ kana andũ onthe makwate ũtangĩĩo.

¹² Mumo ũsu nũtũtonyethasya kũtiana na mwĩkalo ũte na ũtheu wa Ngai, na mawendi ma maũndũ ma kũũ nthĩ, na kwĩthĩwa na mwĩkalo wĩ na wĩting'o, mũlũngalu, na wa kũmũkĩa Ngai twĩ kũũ ĩũlũ wa nthĩ.

¹³ Tũendeeaa na kweteela kĩla tũtũaa twĩkwatĩtye, nakyo nĩ kũsyoka ĩngĩ na ũkumyo kwa Ngai waitũ mũnene, nake nĩ mũtangĩĩi Yesũ Klĩsto.

¹⁴ Nĩweeyumisye mwene kwondũ witũ, atwovosye kuma mothũkunĩ onthe, na kũtũthesya atũtw'e andũ make ala menenganĩte kwĩkaa ũlũngalu.

¹⁵ Manyĩsya maũndũ asu na ũitũmĩa ũkũmũ w'onthe yĩla ũũthangaasya na kũkany'a andũ. Ndũketĩkĩle mũndũ o na wĩva akũvũthye.