SAVULI 9 - MBIVILIA ŨVOO MŨSEO

Kũtũngĩa Ngai Mũvea nũndũ wa Ũw'o Wake

Kwa mwinĩthya: Savulĩ ĩno yaandĩkiwe nĩ Ndeviti

¹ We Mwĩai Ngai ngakũtaĩaa na ngoo yakwa yonthe; ngatavanasya mawĩa maku ma kũseng'ya ala wĩkaa.

² Ngatana na kwĩw'a mũyo mũno nthĩnĩ waku; ngaina ngĩkumya ĩsyĩtwa yaku we Ũla wĩ Ĩũlũ Mũno.

³ Yĩla amaitha makwa makwona, nĩmasyokaa na ĩtina; nĩmavalũkaa nthĩ makathela vyũ.

⁴ Nũmbĩkĩte ũndũ ũla waĩlĩte; nĩwĩkalĩte kĩvĩlanĩ kyaku kya kĩ-ũsumbĩ, na ũkaumya ũsili wa ũlũngalu.

⁵ Nũkanĩtye andũ ma nthĩ ingĩ, na ũkamina ala avuku. Nĩwavutie masyĩtwa moo kũvika tene na tene.

⁶ Amaitha maitũ nĩmathelete kũvika tene na tene; nĩwanangĩte ndũa syoo na makola vyũ.

⁷ Ĩndĩ Mwĩai Ngai nũsumbĩkaa tene na tene, nũlũlũmĩĩlye kĩvĩla kyake kya kĩ-ũsumbĩ nĩ kana asilĩle.

⁸ Nũsumbĩkaa nthĩ na ũlũngalu; nũsilĩlaa nthĩ ingĩ na sila wa katĩ.

⁹ Mwĩai Ngai nĩwe wĩvitho mũlũmu wa ala mathĩnaw'a, wĩvitho mũlũmu ĩvindanĩ ya thĩna.

¹⁰ Ala makwĩsĩ nĩmakũĩkĩĩaa, nũndũ we Mwĩai Ngai ndwaatia ala makũmanthaa.

¹¹ Inĩai Mwĩai Ngai ũla ũsumbĩkaa e Saioni mbathi sya kũmũtaĩa, tavany'ai meko make andũnĩ ma mbaĩ syonthe.

¹² Ngai nũlilikanaa ala mathĩnaa; ndolawa nĩ kĩĩo kyoo, na nũkanasya ala mamavĩtĩasya.

¹³ Ame Mwĩai Ngai mbĩw'ĩe tei, sisya mathĩna ala ngũthĩnw'a nĩ amaitha makwa, we ũla ũndangĩĩaa kuma kĩkw'ũnĩ,

¹⁴ nĩ kana nĩmatavye andũ ma Yelũsalemu, maũndũ onthe ala meũtuma ngũtaĩa. Ngatana nũndũ nũndangĩĩte.

¹⁵ Andũ ma nthĩ ingĩ nĩmalikile ĩimanĩ yĩla menzĩte; maũũ moo nĩmakwatiw'e nĩ mũteo ũla mateie.

¹⁶ Mwĩai Ngai nĩwĩvuanĩtye kwa nzĩa ya ũsili wake wa katĩ; ala athũku nĩmakwataw'a nĩ maũndũ ala mekaa. Sela

¹⁷ Kĩkw'ũ nĩkyo mũminũkĩlyo wa andũ onthe ala athũku; andũ onthe ala maleaa Ngai.

¹⁸ Ĩndĩ athĩni maikola o na ĩndĩĩ, na wĩkwatyo wa ngya ndũkathela tene na tene.

¹⁹ Ame Mwĩai Ngai ũkĩla, ndũkaeke andũ makũvũthye! Ete andũ ma nthĩ mbee waku na ũimasilĩla.

²⁰ Ame Mwĩai Ngai mekĩe w'ĩa; eka andũ ma nthĩ mamanye kana mo no andũ. Sela