SAVULI 7 - MBIVILIA ŨVOO MŨSEO

Mboya ya Kũkũlya Ngai Anengane Ũsili wa Katĩ

Ndeviti ainĩie Mwĩai Ngai Savulĩ ĩno nũndũ wa Kusi ũla waĩ wa mbaĩ ya Mbengyameni

¹ Ame Mwĩai Ngai, Ngai wakwa nĩvithaa nthĩnĩ waku; ndangĩĩe na kũmbonokya kuma kwa onthe ala mangatĩĩaa,

² maikese kũndembũanga ũndũ mũnyambũ ũtembũangaa nyamũ, na maingusĩthya mandwae, vate mũndũ ũtonya kũndangĩĩa.

³ Ame Mwĩai Ngai, Ngai wakwa, ethĩwa nĩnĩkĩte ũũ; ethĩwa nĩnĩkĩte ĩvĩtyo,

⁴ ethĩwa nĩnĩkĩte mũnyanyawa naĩ, kana ngavena mũmaitha wakwa kĩndũ vate kĩtumi,

⁵ eka mũmaitha makwa angatĩĩe na kũngwata, eka anginyangĩe nthĩ na kũmbũaa, na kũndia nĩvalũkĩte nthĩ nĩ mũkw'ũ! Sela

⁶ Ame Mwĩai Ngai ũkĩla ũthatunĩ waku; ũkĩla ũsiĩĩe ũthatu wa amaitha makwa; ũkĩla Ngai wakwa; umya sila wa katĩ.

⁷ Ũmbany'a andũ onthe vakuvĩ naku, na ũimasumbĩka kuma ĩũlũ.

⁸ Mwĩai Ngai nĩwe ũsilĩlaa andũ. Ame Mwĩai Ngai, nzilĩle kwĩanana na ũlũngalu wakwa, na kwĩanana na ũseo ũla wĩ nthĩnĩ wakwa.

⁹ Wĩ Ngai mũlũngalu, na nũmanyaa mesilya ma andũ, na kĩla kĩ ngoonĩ syoo. Mina ũthũku ũla andũ athũku mekaa, na ũyĩka ala alũngalu nesa.

¹⁰ Ngai nĩwe ngao yakwa, ũla ũtangĩĩaa ala mamwĩw'aa.

¹¹ Ngai nĩ mũsili mũlũngalu, na kĩla ĩvinda nũleanaa na ũthũku.

¹² Mũndũ alea kwĩlila, Ngai nũnoaa ũvyũ wake; nũkootaa ũta wake eteelete kũatha.

¹³ Nĩwũmbanasya mĩio yake ya kaũ ĩla yũaa; nũtumaa maangi make methĩwa na mwaki.

¹⁴ Mũndũ mũthũku asũanĩaa kwĩka naĩ, na ũndũ andũ matonya kwĩka naĩ, na aneenaa ũvũngũ.

¹⁵ Nĩwĩnzaa ĩima na kũyĩvukũa, nũlikaa ĩimanĩ yĩu we mwene wĩnzĩte.

¹⁶ Ũthũku wake nũmũsyokeaa we mwene, ũng'endu wake nũsyokaa ũkamwĩka naĩ.

¹⁷ Nĩngũtũngĩa Mwĩai Ngai mũvea, nũndũ wa ũlũngalu wake, na nĩngwina ngĩkumya ĩsyĩtwa ya Mwĩai Ngai, Ũla wĩ Ĩũlũ Mũno.