SAVULI 5 - MBIVILIA ŨVOO MŨSEO

Mboya ya Kũkũlya Ũsũvĩo

Kwa mwinĩthya: Aitũmĩa mĩtũlilũ. Savulĩ ĩno yaandĩkiwe nĩ Ndeviti

¹ Ame Mwĩai Ngai, ĩthukĩĩsye ndeto syakwa, na ũyĩw'a kũluma kwakwa.

² Ngai wakwa, na mũsumbĩ wakwa, ĩthukĩĩsye kĩĩo kyakwa kya kũkũlya ũtethyo, nĩkwĩthĩwa nue nĩvoyaa.

³ Ame Mwĩai Ngai, kwakya nĩwĩw'aa wasya wakwa; kwakya nĩnĩetae mavata makwa kũla ũĩ, na kwĩkala neteelete ũnzũngĩe.

⁴ Nũndũ we ndwĩ Ngai ũla ũtanaw'a nĩ ũthũku; ndwĩtĩkĩlaa ũthũku vala ũĩ.

⁵ Ala mekathĩĩaa maitonya ũkũthengeea; nũmenaa eki ma naĩ onthe.

⁶ Nũminaa onthe ala maneenaa ũvũngũ; nũleanaa na oaani na akengani.

⁷ Ĩndĩ nũndũ wa wendo waku mũnene, nĩndonya kũlika nyũmbanĩ yaku. Nĩndonya kũthaithĩa Ĩkalũnĩ yaku ĩtheu, na kũkumana ngũnenge ndaĩa.

⁸ Ame Mwĩai Ngai ndongoesye ũlũngalunĩ waku, nũndũ nĩna amaitha aingĩ! Lũngalya nzĩa yaku mbee wakwa.

⁹ Ndeto sya amaitha makwa iitonya kũĩkĩĩwa; ngoo syoo syusũĩte wanangĩko. Ndeto ila maneenaa iilyĩ ta syaw'o na ta nzeo, ĩndĩ syusũĩte ũvũngũ mũthei.

¹⁰ Ame Ngai, masilĩle na ũimakany'a; mĩvango yoo nĩtume mathela. Mekye vaasa nũndũ wa mavĩtyo moo maingĩ, nũndũ nĩmakũng'endeie.

¹¹ Ĩndĩ eka onthe ala mevithaa kwaku matane; eka mainae kĩla ĩvinda nũndũ wa ũtanu. Sũvĩa ala makwendete, nĩ kana matane nthĩnĩ waku.

¹² Nũndũ we Mwĩai Ngai nũathimaa ũla mũlũngalu; wendo waku nũmũsũvĩaa ta ngao.