SAVULI 4 - MBIVILIA ŨVOO MŨSEO

Mboya ya Wĩoo ya Kwĩkwatya Ngai

Kwa mwinĩthya: Aitũmĩa mĩio ya Mbathi yĩ ndii. Savulĩ ĩno yaandĩkiwe nĩ Ndeviti

¹ Ame Ngai wakwa mũlũngalu, nzũngĩae yĩla nakwĩkaĩla. Yĩla naĩ thĩnanĩ nĩwandetheeisye; mbĩw'ĩe tei na ũyĩw'a mboya yakwa.

² Inyw'ĩ andũ mwĩmbanangĩa ĩsyĩtwa kũvika ĩndĩĩ? Mwĩendeea kwendeew'a nĩ maũndũ ma mana, na kũatĩĩa ũvũngũ kũvika ĩndĩĩ? Sela

³ Manyai kana Mwĩai Ngai nũvathĩte ala alũngalu methĩwe make, Mwĩai Ngai nũmbĩthukĩĩasya yĩla namwĩkaĩla.

⁴ Thataai, ĩndĩ mũikeke naĩ; yĩla mũkomete mokomonĩ menyu, neenany'ai kĩla mũndũ na ngoo yake, na ĩthĩwai mũvindĩtye. Sela

⁵ Umyai nthembo ila syaĩlĩte, na mũiĩkĩĩa Mwĩai Ngai.

⁶ Nĩ aingĩ ala makũlasya, “Ũla ũtonya kũtwĩka nesa nũũ? Ame Mwĩai Ngai, nĩtũũkwĩsũva ũtwĩw'ĩe tei.”

⁷ Nũtumĩte nĩthĩwa na ũtanu mwingĩ ngoonĩ yakwa, mbee wa ũndũ ala mena ngetha mbingĩ ya mbaa mbeke na ndivai matonya kũtana.

⁸ Ngakomaa na kũlĩkwa nĩ na mũuo, nũndũ we Mwĩai Ngai wĩ weka nue ũmbĩkalasya ũsũvĩonĩ.