SAVULI 3 - MBIVILIA ŨVOO MŨSEO

Mboya ya Kwakya ya Kwĩkwatya Ngai

Savulĩ ĩno yaandĩkiwe nĩ Ndeviti ĩtina wa kũsemba akĩĩte mwana wake Avisalomu

¹ Ame Mwĩai Ngai, kwa sisya ũndũ amaitha makwa maingĩvĩte, amaitha aingĩ mũno ala mambũkitaa.

² Aingĩ maneenaa ĩũlũ wakwa makasya atĩĩ, “Ngai ndemũtetheesya.” Sela

³ Ĩndĩ we Mwĩai Ngai, wĩ ngao ĩnthyũlũlũkĩte; nũtumaa nĩsinda, na ũkatuma nĩthĩwa na ũkũmbaũ.

⁴ Nĩnĩkaĩlaa Mwĩai Ngai na wasya mũnene, nake nũnzũngĩaa e kĩĩmanĩ kyake kĩtheu. Sela

⁵ Nĩnĩkomaa na ngĩlĩkwa; nĩnĩamũkaa ĩngĩ, nũndũ Mwĩai Ngai nũnzũvĩaa.

⁶ Ndiũkĩa andũ ngili mbingĩ, ala manthyũlũlũkĩte ngalĩko syonthe.

⁷ Ame Mwĩai Ngai, ũka! Ame Ngai wakwa, ndangĩĩe, nũndũ nũkũnĩte amaitha makwa onthe ngambu, nũtũlĩte maeo ma ala athũku maikambĩke naĩ.

⁸ We Mwĩai Ngai nue ũtangĩĩaa; athima andũ maku! Sela