SAVULI 2 - MBIVILIA ŨVOO MŨSEO

Mũsumbĩ Ũnyuvĩtwe nĩ Ngai

¹ Nĩkĩ andũ ma mbaĩ ingĩ mavangaa mĩvango mĩthũku? Nĩkĩ andũ mavangaa maũndũ, na maũndũ asu maitw'ĩka ma mana?

² Asumbĩ ma nthĩ nĩmeyũmbanasya, na atongoi mayũmbana vamwe masame, ũndũ meũleana na Mwĩai Ngai, na kũleana na mũsumbĩ ũla Ngai ũnyuvĩte.

³ Maneenaa makasya atĩĩ, “Nĩtwĩthasye kuma ũsumbĩnĩ woo, na tũyĩkya vaasa syĩndũ ila matwovete nasyo.”

⁴ Ũla ũsumbĩkaa e ĩtunĩ nũmathekeeaa, Mwĩai Ngai nũmavũthasya.

⁵ Nĩvo ĩndĩ ũmakanasya ũthatunĩ wake, na kũmatelemya ũthilĩkunĩ wake ayasya,

⁶ “Nĩniĩte mũsumbĩ wakwa, Kĩĩmanĩ kyakwa kĩtheu kya Saioni.”

⁷ Mũsumbĩ eneena ayasya, “Nĩngũtavany'a ũndũ Mwĩai Ngai ũneenete. Aneenete akambĩa, ‘We wĩ mwana wakwa, ũmũnthĩ nĩnatw'ĩka ĩthe waku.

⁸ Ngũlye, nakwa ngakũnenga andũ ma mbaĩ syonthe ĩũlũ wa nthĩ ũmasumbĩke, nthĩ yonthe ĩkatw'ĩka yaku.

⁹ Ũkamasumbĩka wĩ na ũkũmũ, na kũmanyaĩĩkya ta ilĩo sya mbisũ.’ ”

¹⁰ Yu ĩndĩ, inyw'ĩ asumbĩ ĩthĩwai mwĩ oĩ, inyw'ĩ asumbĩ ma nthĩ ĩw'ai ũkany'o ũũ.

¹¹ Thũkũmai Mwĩai Ngai mwĩ na kĩkĩo kyake, na tanai na kũtetema.

¹² Nengai mwana wake ndaĩa ndakese kũthata, na mũikw'a mĩtũkĩ, nũndũ nũtonya kũmũthatĩa mĩtũkĩ. Nĩ aathime onthe ala mevithaa nthĩnĩ wa Ngai.