SAVULI 17 - MBIVILIA ŨVOO MŨSEO

Mboya ya Ndeviti

¹ Ame Mwĩai Ngai ĩthukĩĩsye kĩĩo kyakwa kya ũw'o! Ĩw'a kĩĩo kyakwa; tea kũtũ wĩw'e mboya yumĩte kanyw'anĩ ũtaneenaa ũvũngũ.

² Eka ũtw'ĩo ĩũlũ wakwa wume kũla ũĩ, nĩkwĩthĩwa nĩwĩsĩ ũw'o.

³ We nĩwĩsĩ ngoo yakwa vyũ, nĩwanthokeie ũtukũ ũmbĩkuũe; nĩwandatie na ndwaaĩthĩa nĩ na ũndũ ũthũku; nĩnĩtw'ĩte kana ndikavĩtya na kanyw'a wakwa.

⁴ Ndineenaa ndeto nthũku ta andũ ala angĩ, nĩnĩkĩte ũndũ mĩao yaku ĩkwasya, na ndiatĩĩaa ngelekany'o ya andũ ang'endu.

⁵ Nĩnĩkaa maũndũ ala maĩlĩte mbee waku; ndyaaĩka ũndũ ũte mwaĩlu.

⁶ Ame Mwĩai Ngai nĩngwĩkaĩlaa, nĩkwĩthĩwa nũnzũngĩaa; tea kũtũ na ũyĩw'a mboya yakwa.

⁷ Onany'a wendo waku wa kũseng'ya ũtaolekaa; we ũla ũtangĩĩaa andũ ala mokaa kũla ũĩ, ũmasũvĩe kuma kwa amaitha moo.

⁸ Nzũvĩe ta kyũma kya itho; mbithe muunyĩnĩ wa nthwau syaku.

⁹ Mbithe kuma kwa andũ athũku ala manthĩnasya, amaitha athũku mũno ala manthyũlũlũkĩte.

¹⁰ Andũ asu mai tei, na maneenaa na ũng'endu.

¹¹ Nĩmangatĩĩe, nayu nĩmanthyũlũlũkĩte, memantha mwanya wa kũmbalũkya nthĩ.

¹² Mailyĩ mũnyambũ weteelete ũkwate, ta mũnyambũ wa mũika wĩvithĩte wovetye.

¹³ Ame Mwĩai Ngai ũkĩla, siĩĩa amaitha makwa na ũimasinda; ndangĩĩe kuma kũla kwĩ ala athũku ũitũmĩa ũvyũ waku.

¹⁴ Ame Mwĩai Ngai ndangĩĩe na ũtonyi waku kuma kwa andũ asu; andũ ala ĩtuvi yoo yĩ vaa ĩũlũ wa nthĩ. Mathĩny'e na mathĩna ala ũmaiĩe; nĩvethĩawe mathĩna meanĩe kwondũ wa syana syoo, o na amwe matiale kwondũ wa nzyawa syoo.

¹⁵ Ĩndĩ ngakwona nũndũ nĩ mũlũngalu; na yĩla nĩamũka ngeanĩwa nĩ kwona ũndũ ũilyĩ.