SAVULI 149 - MBIVILIA ŨVOO MŨSEO

Wathi wa Ũsindi

¹ Mũtaĩei Mwĩai Ngai. Inĩai Mwĩai Ngai wathi mweũ, mũtaĩei wũmbanonĩ wa ala aĩkĩĩku!

² We Ĩsilaeli tanĩa Mũmbi waku, andũ ma Saioni ĩw'ai mũyo nũndũ wa mũsumbĩ wenyu!

³ Taĩai ĩsyĩtwa yake mũsũngĩte; kũnai ndambulĩnĩ na ngitaa mũkĩmũtaĩa.

⁴ Nũndũ Mwĩai Ngai nũtanaw'a nĩ andũ make; nũnengae ala auu ũsindi.

⁵ Ala aĩkĩĩku nĩmatanĩe ndaĩa ĩsu, na kwina na ũtanu me mokomonĩ moo.

⁶ Nĩmataĩe Ngai na wasya mũnene, makwete mbyũ mbũĩ ngalĩko syelĩ,

⁷ meyĩĩvanĩsye kwa mbaĩ ingĩ, na kũkany'a andũ.

⁸ Move asumbĩ ma andũ asu na nyololo, na atongoi moo na mbĩngũ sya kyũma;

⁹ makany'e andũ ma nthĩ ingĩ ũndũ Ngai wĩaĩte. Ĩsu nĩ ndaĩa ya andũ onthe ala aĩkĩĩku ma Ngai. Mũtaĩei Mwĩai Ngai!