SAVULI 148 - MBIVILIA ŨVOO MŨSEO

Syũmbe Syonthe Nitaĩe Mwĩai Ngai

¹ Mũtaĩei Mwĩai Ngai! Mũtaĩei Mwĩai Ngai kuma ĩtunĩ, mũtaĩei kuma kũu ĩũlũ mũno.

² Mũtaĩei inyw'ĩ alaĩka make onthe, mũtaĩei inyw'ĩ nguthu yake yonthe ya ĩtunĩ.

³ Mũtaĩei syũa na mwei, mũtaĩei inyw'onthe ndata syĩ kyeni!

⁴ Mũtaĩei inyw'ĩ matu me ĩũlũ mũno, na kĩw'ũ kĩla kĩ ĩũlũ wa ĩtu.

⁵ Syonthe nĩtaĩe ĩsyĩtwa ya Mwĩai Ngai, nũndũ nĩweeaie na syoombĩka.

⁶ Nĩwasiie vandũnĩ vasyo tene na tene, kwa kumya ũtw'ĩo ũtakavĩta.

⁷ Mũtaĩei Mwĩai Ngai kũũ nthĩ, inyw'ĩ syũmbe nene sya ũkanganĩ o na kũndũ kũliku.

⁸ Mũtaĩei inyw'ĩ mwaki na mbua, ĩa na mũumbĩ, na kĩseve kĩnene kĩla kĩanĩasya mwĩao wake.

⁹ Mũtaĩei inyw'ĩ iĩma na tũlĩma tw'onthe; mĩtĩ ya matunda na mĩkũũ yonthe!

¹⁰ Mũtaĩei inyw'ĩ nyamũ sya kĩthekanĩ na indo syonthe; nyamũ ila itambũkaa na nyũnyi ila ĩũlũkaa.

¹¹ Mũtaĩei inyw'ĩ asumbĩ ma nthĩ na andũ onthe, inyw'ĩ atongoi na asumbĩki onthe ma nthĩ;

¹² anake na eĩtu, andũ akũũ o na syana.

¹³ Onthe nĩmataĩe ĩsyĩtwa ya Mwĩai Ngai, nũndũ ĩsyĩtwa yake nĩ ĩnene kwĩ masyĩtwa onthe; ũkumyo wake wĩ ĩũlũ wa nthĩ na ĩtu.

¹⁴ Nĩwatumie andũ ma nthĩ yake methĩwa na vinya, nĩ kana atheu make onthe mamũtaĩe, andũ ma Ĩsilaeli ala wendete mũno. Nĩataĩwe Mwĩai Ngai!