SAVULI 14 - MBIVILIA ŨVOO MŨSEO

Ũtumanu na Ũthũku wa Andũ

Kwa mwinĩthya: Savulĩ ĩno yaandĩkiwe nĩ Ndeviti

¹ Ndia yaasya ngoonĩ ya yo, “Kũi Ngai.” Nĩ andũ athũku, mekaa meko ma kũthatya. Vai ũmwe wĩkaa ũseo.

² Mwĩai Ngai nũsiasya andũ e ĩtunĩ, nĩ kana amanye kana ve andũ me na ũmanyi, na kana ve andũ mamũmanthaa.

³ Ĩndĩ onthe nĩmaumĩte nzĩanĩ; onthe nĩmekaa maũndũ mathũku; vai ũmwe woo wĩkaa ũla waĩlu; vaiĩ o na ũmwe.

⁴ “Nĩkũlya, andũ asu athũku no methĩawa na ũmanyi? Maminaa andũ makwa o ũndũ maminaa kya ũya, na mayĩkaĩlaa Mwĩai Ngai.”

⁵ Makakwatwa nĩ w'ĩa mwingĩ, nĩkwĩthĩwa Ngai e vamwe na ala alũngalu.

⁶ Inyw'ĩ andũ athũku nĩmwanangaa mĩvango ya ngya, ĩndĩ Mwĩai Ngai nĩwe wĩvitho woo.

⁷ Ame kethĩwa ũtangĩĩo wa Ĩsilaeli nĩwuma Saioni! Yĩla Mwĩai Ngai wĩtuma andũ make maendeea nesa ĩngĩ, nzyawa sya Yakovo ikatana; andũ ma Ĩsilaeli makeew'a mũyo!