SAVULI 10 - MBIVILIA ŨVOO MŨSEO

Mboya ya Ala Mathĩnaw'a

¹ Ame Mwĩai Ngai nĩkĩ wĩ vaasa mũno? Wĩvithaa ĩvindanĩ yĩla twĩ na mathĩna nĩkĩ?

² Andũ athũku me na ngathĩĩo nĩmathĩnasya ngya mũno; eka nemo ene makwatwe nĩ mĩvango ĩla maseũvĩtye.

³ Mũndũ mũthũku ekathĩĩaa nũndũ wa mawendi mathũku ala wĩ namo; mũndũ wĩ na ĩtomo ya syĩndũ nũmũumaa na kũmũvũthya Mwĩai Ngai.

⁴ Nũndũ wa ngathĩĩo mũndũ mũthũku ndamanthaa Ngai, mesilyanĩ make onthe vai mwanya wa Ngai.

⁵ Kĩla ĩvinda mũndũ mũthũku nũendeeaa nesa maũndũnĩ make; ndatonya kũmanya ũndũ ũsilĩlo wa Ngai ũilyĩ; nũvũthasya amaitha make onthe.

⁶ Asũanĩaa akasya, “Ndikathingithw'a nĩ kĩndũ; ngeethĩawa na ũtanu ĩvinda yonthe, na ndikethĩwa na thĩna o na ĩndĩĩ.”

⁷ Aneenaa ndeto sya kũumana, ũvũngũ na sya kũtelemya. Nĩwendete kũneena ndeto sya kĩmena na nthũku.

⁸ Ekalaa kũndũ motũinĩ oveesye; nĩwumaa kĩthekanĩ akoaa andũ matena ĩvĩtyo. Nũsyaĩĩasya evithĩte one ala matetonya.

⁹ Oveeasya evithĩte ta mũnyambũ wĩ kĩsumonĩ kyaw'o, oveeasya nĩ kana akwate ngya; nũmakwataa na kũmakusĩĩsya mũteonĩ wake.

¹⁰ Ũla ũtetonya nũvithũkĩawa na kũvalũkw'a nthĩ; nũvalũkaw'a nĩ ũtonyi wa mũndũ mũthũku.

¹¹ Mũndũ mũthũku asũanĩaa akasya, “Ngai nĩwũlĩtwe; nũvw'ĩkĩte ũthyũ wake, na ndesa kwona kĩndũ.”

¹² Ame Mwĩai Ngai ũkĩla; ame Ngai kany'a mũndũ ũsu mũthũku, ndũkolwe nĩ ala meũthĩna.

¹³ Mũndũ mũthũku atonya kũvũthya Ngai ata? Nĩkĩ ũsũanĩaa akasya, “Ngai ndengany'a?”

¹⁴ Ĩndĩ we Mwĩai Ngai nĩwene ala me na thĩna na kyeva; nĩwĩyũmbanĩtye kĩla ĩvinda kũmatetheesya. Mũndũ ũla ũtetonya nũkwĩkwatasya we Mwĩai Ngai; kĩla ĩvinda nue wĩthĩawa wĩ ũtethyo wa syana ndiwa.

¹⁵ Mina vinya wa mũndũ ũla mũthũku na wĩkaa naĩ; mũkany'e nũndũ wa maũndũ mathũku ala wĩkĩte, nginya wĩthĩe ndatonya kũmeka ĩngĩ.

¹⁶ Mwĩai Ngai nĩ mũsumbĩ tene na tene; andũ ma nthĩ ingĩ makathela kuma nthĩ yake.

¹⁷ Ame Mwĩai Ngai nĩwĩthukĩĩasya kwenda kwa ala mathĩnaw'a; nũmathangaasya na ũyĩthukĩĩsya kĩĩo kyoo.

¹⁸ Ete sila wa katĩ kwa syana ndiwa na kwa ala mathĩnaw'a, nĩ kana vaikethĩwe mũndũ o na wĩva ĩũlũ wa nthĩ, ũtonya kũthĩny'a andũ ĩngĩ.