Ovatia 1 - MBIVILIA ŨVOO MŨSEO

Mwĩai Ngai Akakany'a Etomu

¹ Ũũ nĩw'o woni ũla Mwĩai Ngai Mũsumbĩ wavuanĩisye Ovatia ĩũlũ wa nthĩ ya Etomu. Nĩtũkwatĩte ũtũmani kuma kũla kwĩ Mwĩai Ngai; mũtũmwa nũtũmĩtwe mbaĩnĩ sya andũ akasyĩe atĩĩ, “Ũkĩlai! Ũkĩlai tũthi tũkokite na nthĩ ya Etomu.”

² Mwĩai Ngai eneena na Etomu akamĩa atĩĩ, “Ngatuma wĩthĩwa wĩ mũnini mbee wa mbaĩ ila ingĩ syonthe, na ũkavũthaw'a mũno.

³ Ngathĩĩo syaku nikũkengete, we ũla wĩkalaa mĩvatĩnĩ ya ĩvia, ũla wĩkalo waku wĩ kũndũnĩ kũtũlu mũno. Ũsũanĩaa ũkakũlya, ‘Ũla ũkantheesya nthĩ nũũ?’

⁴ O na waũlũka wambata ĩũlũ ta ndiũ, o na waaka ndala yaku katĩ wa ndata, ngakũtheesya nthĩ kuma vau. Nĩasya ũu nyie Mwĩai Ngai.

⁵ “Ethĩwa ing'ei ikakũvithũkĩa, ethĩwa andũ ala mavenaa angĩ syĩndũ makakũvithũkĩa ũtukũ, nũndũ matakoya nginya meanĩwe? Ethĩwa ala mombanasya nzavivũ makooka kwaku, nũndũ matakatialya imwe? Weteelwe nĩ wanangĩko mũnene.

⁶ Inyw'ĩ nzyawa sya Esaũ ũthwii wenyu nũtavĩtwe, syĩndũ syenyu nĩsyonekete na ikoswa!

⁷ Andũ onthe ala mwĩw'anĩte nĩmakũkengete, nĩmakũlũngĩtye kuma nthĩ yaku. Andũ ala mwekalaa na mũuo nĩmakũsindĩte; anyanyau ala ũĩkĩĩe nĩmakũteete na kĩtei, ĩndĩ ndũmanyaa kĩla kĩendee.”

⁸ Nyie Mwĩai Ngai nĩasya atĩĩ, “Mũthenya ũsu ngamina andũ oĩ onthe ma Etomu, na ngavetanga ũmanyi woo w'onthe kuma iĩmanĩ sya Esaũ.

⁹ We Temani, asikalĩ maku ma kaũ makakwatwa nĩ w'ĩa, na asikalĩ onthe ma Etomu makooaĩwa kaũnĩ.

Kĩtumi kya Kũkanw'a kwa Etomu

¹⁰ “Mũkakwatwa nĩ nthoni, nũndũ wa maũndũ mathũku ala mweekie ana-a-ĩthe menyu, nzyawa sya Yakovo, o ta ũu mũkaminwa tene na tene.

¹¹ Mũthenya ũla mwaũngamie ũtee mũsyaĩĩsye, yĩla amaitha makuie ũthwii woo, na andũ ma nthĩ ingĩ malikĩla mĩvĩanĩ yoo, na makũna kula maane Yelũsalemu, inyw'ĩ mwailyĩ o ta amaitha asu.

¹² Mũyaaĩlĩte kũtana mũthenya ũla ana-a-ĩthe menyu makwatiwe nĩ mathĩna, kana kũtana nũndũ wa andũ ma Yuta, mũthenya ũla amaitha moo maanangie ndũa yoo, kana kwĩkathĩĩa mũno mũthenya ũla maĩ na thĩna.

¹³ Mũyaaĩlĩte kũthi kũlika mĩvĩanĩ ya ndũa ya andũ makwa, mũthenya wa mathĩna moo, kana kũmathekeea ũnyamaonĩ woo, mũthenya ũla maĩ na thĩna, kana kwosa ũthwii woo mũthenya ũla maĩ na thĩna.

¹⁴ Mũyaaĩlĩte kweteela vala nzĩa ikomanĩe, nĩ kana mũkwate ala masembete makĩĩte. Mũyaaĩlĩte kũnengane ala matialĩte kũla kwĩ amaitha, mũthenyanĩ wa thĩna.

Mwĩai Ngai Akasilĩla Mbaĩ Syonthe

¹⁵ “Mũthenya nĩwũkĩte ũla nyie Mwĩai Ngai ngasilĩla mbaĩ syonthe. Inyw'ĩ Aetomu, o ũndũ mweekie andũ ala angĩ now'o o nenyu mũkekwa; maũndũ ala mweekie nomo mũkekwa.

¹⁶ Nĩnatumie andũ makwa manyw'a ndivai ya ũthatu wakwa, me kĩĩmanĩ kyakwa kĩtheu. O ta ũu namo andũ ma nthĩ ila imathyũlũlũkĩte, no nginya manyw'e mamilwe na mayaa matakoneka ĩngĩ.

Andũ ma Ĩsilaeli Makasinda

¹⁷ “Ĩndĩ Kĩĩmanĩ kya Saioni vakeethĩwa amwe mavonokete, na kĩkeethĩwa kĩ kĩĩma kĩtheu. Nzyawa sya Yakovo, ikamesya nthĩ yoo ĩla nĩ ũtiĩwa woo.

¹⁸ Nzyawa sya Yakovo ikeethĩwa iilyĩ ta mwaki, na sya Yosevu ikeethĩwa iilyĩ ta ũlĩlĩnzĩ wa mwaki; makamina nzyawa sya Esaũ ũndũ mwaki ũvĩvasya vyũ, vai nzyawa ya Esaũ ĩkatiala. Nĩasya ũu nyie Mwĩai Ngai.

¹⁹ Andũ ma ngalĩko ya ĩtheo ĩla yĩtawa Nengevu makamesya iĩma sya Esaũ, na ma nguumo wa iĩma makamesya nthĩ ya Avilisiti. Makamesya nthĩ ya Evalaimu na Samalia, nayo Mbengyameni ĩkamesya Ngileati.

²⁰ Andũ ala atave kuma Ĩsilaeli, makamesya Kanaani kũthi kũvika Nzalevathi; namo ala atave kuma Yelũsalemu ala me Sevalati, makamesya ndũa sya Nengevu.

²¹ Andũ ma Yelũsalemu ala mesinda makambata Kĩĩmanĩ kya Saioni, makasumbĩke iĩma sya Esaũ, na ũsumbĩ ũsu ũkeethĩwa wĩ wa Mwĩai Ngai.”