Osea 8 - MBIVILIA ŨVOO MŨSEO

Mwĩai Ngai Aitũla Ĩsilaeli Mũtĩ nũndũ wa Kũthaitha Mĩvw'anano

¹ Vuva soo, amaitha nĩmavithũkĩĩte andũ makwa ta ndiũ! Nũndũ andũ makwa nĩmanangĩte ũtianĩo wakwa namo, na kũtũla mĩao yakwa.

² Andũ ma Ĩsilaeli nĩmambĩkaĩlaa mayasya atĩĩ, “Ame Ngai waitũ, nĩtwĩsĩ nue Ngai waitũ!”

³ Ĩndĩ nĩmaleete ũla ũseo, mũmaitha akamaatĩĩa.

⁴ Nĩmeenyuvĩie asumbĩ ndamanengete mwanya; nĩmanyuvaa atongoi ndametĩkĩlĩtye. Nĩmeeseũvĩisye mĩvw'anano maitũmĩa thaavu na silĩva woo; mĩvw'anano ĩsu nĩyatw'ĩkie wanangĩko woo.

⁵ Inyw'ĩ andũ ma Samalia, ĩkyai ĩtheka mũvw'anano wenyu wa kasalũ. Nĩnĩthatĩte mũno nũndũ wenyu; mwĩendeea kũthaitha mĩvw'anano nginya ĩndĩĩ?

⁶ Mĩvw'anano ĩsu yumĩte Ĩsilaeli! Kasalũ kaa kasũviw'e nĩ mũndũ; kasalũ kaa ti Ngai nongi; kasalũ kau ka Samalia kakatilangwa ilungu.

⁷ “Mavandaa kĩseve, na makaketha kĩlingi. Mĩmea ĩla yĩ vo ndĩ na ũsyao, ndĩkakethwa kĩndũ; ĩkesa kwĩthĩwa na ũsyao, andũ kuma nthĩ ingĩ nĩmo meya ũsyao ũsu.

⁸ Andũ ma Ĩsilaeli nĩ amelye, yu me katĩ wa andũ ma nthĩ ila ingĩ, matw'ĩkĩte ta mũio wa mana.

⁹ Nũndũ nĩmaendete Asuli kwĩtya ũtethyo, mailyĩ ta ĩng'oi ya kĩthekanĩ yĩkwanganga yĩ yoka. Evalaimu nũthooete endwa make.

¹⁰ O na vala nĩmethooeaa andũ kuma mbaĩnĩ ingĩ, yu nĩngũmombany'a. Nĩmekwambĩĩa kũthela, nũndũ wa kũvinyĩĩwa nĩ mũsumbĩ wĩ vinya.

¹¹ “Evalaimu nĩwingĩvĩtye ithembeo sya kumya nthembo ya ũekeo wa naĩ, ĩndĩ ithembeo isu nitw'ĩkĩte kwake ithembeo sya kwĩkĩa naĩ.

¹² O na ngamũandĩkĩa mĩao yakwa ngili mbingĩ, mĩao ĩsu amĩtalaa ta kĩndũ kĩeni.

¹³ Nĩmendete kumya nthembo; nĩmathembaa nthembo na maiya i nyama, ĩndĩ nyie Mwĩai Ngai ndyendeeaw'a nĩmo. Yu nĩngũlilikana ũthũku woo, na kũmakany'a nũndũ wa naĩ syoo, nĩmekũsyoka nthĩ ya Misili.

¹⁴ Andũ ma Ĩsilaeli nĩmolĩtwe nĩ Mũmbi woo, na makaka nyũmba sya kĩ-ũsumbĩ. Yuta nĩlũlũmĩĩlye ndũa mbingĩ na ũkũta, ĩndĩ ngaete mwaki ũvĩvye ndũa syoo, na kwananga ngũta syasyo ndũmu.”