Osea 6 - MBIVILIA ŨVOO MŨSEO

Ũalyũlo wa Ngoo wa Ĩsilaeli ũte wa W'o

¹ “Ũkai tũsyokee Mwĩai Ngai nũndũ nũtũtembũangĩte, ĩndĩ akatũvosya. Nũtũũmĩĩtye ĩndĩ akoova kũla tũũmĩĩte.

² Ĩtina wa mĩthenya ĩlĩ akatũvuũũkya; mũthenya wa katatũ akatũkĩlya, naitũ tũkekala vamwe nake.

³ Nĩtũmũmanye Mwĩai Ngai, ĩĩ, nĩtwĩthing'ĩĩsye kũmũmanya. O tondũ vate ndĩi syũa yumaa, now'o vate ndĩi nake ũkaumĩla, Akatumĩlĩĩla ta mbua, ta mbua ya uũa ĩla ĩkolasya nthĩ.”

⁴ Mwĩai Ngai easya atĩĩ, “We Evalaimu, ngeekana ata naku? Naku we Yuta, ngeekana ata naku? Wendo wenyu ũilyĩ ta mũumbĩ wa kwakya, kana ta ĩmwe yĩla yĩthelaa kĩoko tene.

⁵ Kwoou nĩnĩmũtilangĩte na ndeto sya athani, nĩnĩmũaĩte na ndeto ila nĩneenete, na ũsilĩlo wakwa wũkaa ta kyeni.

⁶ Nũndũ nyie nendaa wendo ũtaolekaa, ĩndĩ ti kumĩw'a nthembo. Nenda andũ makwa mamanye nyie Ngai, kũte kũmbumĩsya nthembo sya kũvĩvw'a.

⁷ “Ĩndĩ andũ makwa nĩmaanangĩie ũtianĩo ũsu vandũ vetawa Atamu, me vau nĩmeethĩiwe mate aĩkĩĩku kwakwa.

⁸ Ngileati nĩ ndũa ya eki ma naĩ, nĩ ndũa yusũĩte nthakame.

⁹ O tondũ nguthu sya ing'ei syoveeasya mũndũ, now'o athembi mombanaa vamwe; moaĩaa andũ nzĩanĩ ĩla ĩendete Sekemu, mayĩka mothũku me nthoni.

¹⁰ Nĩnonete ũndũ wa kũthatya mũno andũnĩ ma Ĩsilaeli; andũ ma Evalaimu nĩmathaithĩte Ngai ingĩ, ĩĩ, andũ ma Ĩsilaeli nĩmevukĩtye.

¹¹ “Naku we Yuta, nĩnĩvangĩte mũthenya wa ũkũkany'a, yĩla nĩtũnga andũ makwa kuma kũtavwanĩ kwoo.”