Osea 3 - MBIVILIA ŨVOO MŨSEO

Osea na Mũndũ mũka Kĩlaalai

¹ Mwĩai Ngai nĩwaneenie nakwa ambĩa atĩĩ, “Enda ĩngĩ ũkende mũndũ mũka kĩlaalai na wendetwe nĩ mũndũ-ũme ũngĩ, ũndũ nyie Mwĩai Ngai nendete andũ ma Ĩsilaeli, o na vala nĩmathaithaa ngai ingĩ na nĩmendete mĩkate ya nzavivũ mbovu.”

² Kwoou nĩnathooie mũndũ mũka ũsu kwa thooa wa mbesa sya silĩva ĩkũmi na itano, na kĩlo ĩana na mĩongo ĩtano sya nganũ yĩtawa mbaale.

³ Nĩnaneenie nake namwĩa atĩĩ, “No nginya wĩkale nakwa vandũ va ĩvinda ĩasa; ndũkekaa ũmalwaya, kana kũmanyana kĩ-mwĩĩ na mũndũ-ũme ũngĩ. O nakwa nyie mwene ndikamanyana kĩ-mwĩĩ naku ĩvindanĩ yĩu.”

⁴ Namo andũ ma Ĩsilaeli o ta ũu, makekala vandũ va ĩvinda ĩasa mate na asumbĩ kana atongoi, mate na nthembo kana kĩtuĩ kya ũthaithi, kana mũvw'anano kana mĩvw'anano ĩla ĩtũmĩawa kwa kũaũsya.

⁵ Ĩtina wa ũu, andũ ma Ĩsilaeli makanzyokea na kũmantha nyie Mwĩai Ngai, Ngai woo. O ta ũu makamantha mũsumbĩ woo, nzyawa ya Ndeviti. Makeethĩwa na kĩkĩo kya Mwĩai Ngai, na kweteela ũseo wake mĩthenyanĩ ya mũminũkĩlyo.