Osea 14 - MBIVILIA ŨVOO MŨSEO

Osea Ayĩsũva Andũ ma Ĩsilaeli Mamũsyokee Mwĩai Ngai

¹ Ame Ĩsilaeli mũsyokee Mwĩai Ngai, Ngai waku, nũndũ naĩ yaku nĩkũluluutĩkĩtye ũkavalũka.

² Osai ndeto na mũimũsyokea Mwĩai Ngai nasyo na mũimwĩa atĩĩ, “Tũekee naĩ sitũ syonthe na ũyĩtĩkĩla mboya sitũ, naitũ tũkakũtaĩa ũndũ twathanie.

³ Asuli ndĩkatũtangĩĩa; tũikekwatya mbalasi sya kaũ. Tũikatavya ĩngĩ mĩvw'anano yaitũ ĩla tũseũvĩtye tũmĩe atĩĩ, ‘Inyw'ĩ ninyw'ĩ ngai sitũ.’ We Mwĩai Ngai nĩwĩw'ĩaa syana ndiwa tei.”

Mwĩai Ngai Ayathana Kũekea Andũ ma Ĩsilaeli

⁴ Mwĩai Ngai easya atĩĩ, “Ngatũnga andũ makwa vala nĩĩ ĩngĩ, ngamenda na ngoo yakwa yonthe, nũndũ nĩnĩekete kũmathatĩa.

⁵ Ngeethĩwa nĩilyĩ ta ĩmwe kwa andũ ma Ĩsilaeli, makalaũka ta ĩlaa ya lili; makeethĩwa me alũmu ta mĩi ya mĩkũũ ya Levanoni.

⁶ Nthongoo syoo ikanyaĩĩka; makaanakava ta mĩtĩ ya mĩthata, na kũnyunga nesa ta mũtitũ wa Levanoni.

⁷ Makasyoka na kwĩkala ungu wa ũsũvĩo wakwa, makaendeea nesa ta mũũnda, makalaũka ta mũsavivũ, na makeethĩwa me na nguma ta ndivai ya Levanoni.

⁸ Inyw'ĩ andũ ma Evalaimu, mwĩ na vata mwaũ ũngĩ na mĩvw'anano? Ninyie nzũngĩaa mboya syenyu na kũmũsũvĩa. Ninyie nĩmũeteae muunyĩ ta mũtĩ ũla ũtetaa matũ; moathimo menyu onthe maumaa kwakwa.”

⁹ “Nũũ ũla mũĩ? Namanye maũndũ aa. Nũũ ũla wĩ na kĩlĩko? O nake nĩamamanye. Nzĩa sya Mwĩai Ngai nĩ sya w'o, ala alũngalu nĩmaiatĩĩaa, ĩndĩ avĩtany'a nĩmaluluutĩkĩlaa nzĩanĩ isu.”