Osea 12 - MBIVILIA ŨVOO MŨSEO

¹ “Andũ ma Evalaimu maĩsaa kĩseve, na kũsembany'a na kĩseve kĩvyũ kyumĩte wumĩlonĩ wa syũa mũthenya w'onthe. Nĩmaendeeasya ũvũngũ na ũng'endu. Nĩmaseũvasya wĩw'ano na Asuli, na kũtwaa mauta Misili.

² “Mwĩai Ngai e na ũndũ wa kũsikata Yuta naw'o; akakany'a nzyawa sya Yakovo kwĩanana na mĩendele yoo, na kũmatuva kwĩanana na meko moo.

³ Yĩla Yakovo waĩ ĩvunĩ kwa nyinyia, nĩwakwatie mwana-a-inyia kĩtiinyo, na atw'ĩka mũndũ mũima nĩwang'ang'anie na Ngai.

⁴ Nĩwang'ang'anie na mũlaĩka amũsinda; nĩwaĩie na eesũva mũlaĩka amwĩw'ĩe tei. E Mbethi-eli nĩwakomanie na Ngai, na e kũu Ngai aneena nake.

⁵ Mwĩai Ngai Mwene Ũtonyi W'onthe, Mwĩai Ngai nĩyo ĩsyĩtwa yake.

⁶ Ĩndĩ inyw'ĩ mũsyokeei Ngai wenyu. Ĩthĩwai na wendo na kũatĩĩa sila wa katĩ, na kweteela Ngai wenyu kĩla ĩvinda.

⁷ “Evalaimu nĩ ta mũthoosya wa syĩndũ, ũla ũtũmĩaa ithimi sya ũvũngũ, ũla wendete kũkenga andũ.

⁸ “Evalaimu aneenete akasya atĩĩ, ‘Nĩ mũthwii mũno, nĩnĩkwatĩte ũthwii mwingĩ. Ĩndĩ vai mũndũ ũtonya kũndũla mũtĩ, akasya nakwatie ũthwii kwa nzĩa sya ũkengani.’ ”

⁹ Mwĩai Ngai easya atĩĩ, “Ninyie Mwĩai Ngai, Ngai waku, ũla wakumisye nthĩ ya Misili. Ngatuma ũtũa maeemanĩ ĩngĩ, ta mĩthenyanĩ ya mboka ila itw'ĩtwe.

¹⁰ “Nĩnaneenie na athani, na namony'a mawoni maingĩ, na kwĩsĩla vala maĩ naneena ngĩtũmĩa ngelekany'o.

¹¹ Ethĩwa andũ Ngileati me na ũthũku, vate ndĩi makatw'ĩka ma mana. Ethĩwa mathembeaa nthembo sya tũsalũ Ngilikali, ithembeo syoo nasyo ikatw'ĩka mbumbu sya mavia syũmbĩtwe mũũndanĩ mũĩme.”

¹² Yakovo nĩwakĩie athi Mesovotamia; e kũu nĩwathũkũmie akwate kĩveti, aĩthya malondu nĩ kana akwate mũka.

¹³ Mwĩai Ngai nĩwatũmĩie mwathani, aumye andũ ma Ĩsilaeli nthĩ ya Misili, na amasũvĩa aitũmĩa mwathani.

¹⁴ Evalaimu nũmũthatĩtye Mwĩai Ngai mũno, kwoou Mwĩai Ngai wake akamũĩvanĩsya nũndũ wa ũthũku wake, akamũkany'a nũndũ wa nthoni ila ũmwĩkĩĩthĩtye.