NTHIMO 6 - MBIVILIA ŨVOO MŨSEO

Mokany'o Angĩ

¹ Mwana wakwa, ethĩwa nĩwĩyumĩtye kũĩvĩa mũtũi waku thiĩ wake alea kũĩva, ethĩwa nĩwathanĩte kũũngama vandũ va mũndũ ũsu,

² wĩyovete na ndeto syaku we mwene; ũkwatĩtw'e nĩ ndeto ila we mwene wathanie.

³ Kwoou mwana wakwa, nĩkwĩthĩwa yu wĩ ungu wa ũtonyi wa mũtũi waku, nĩ kana wĩtangĩĩe ĩka ũũ: Enda wĩnyivĩtye, ũkesũve mũtũi waku.

⁴ Ndũkaeke metho maku makwatwe nĩ too, kana kũleelya ngove wombosye.

⁵ Ĩvonokye ta kĩlong'a kuma kw'okonĩ kwa mũsyĩmi, na ta nyũnyi kuma kw'okonĩ kwa mũtei wayo.

⁶ Enda vala ve nditikũ we mũndũ mũtulu, syaĩĩsya ũndũ syĩkaa na ũyũĩva.

⁷ Iyĩthĩawa na mũtongoi, mũsyaĩĩsya, kana mũsumbĩ;

⁸ syĩyiĩĩaa lĩu wasyo ĩvindanĩ ya syũa, na kwĩyũmbanĩsya lĩu wasyo ĩvindanĩ ya ngetha.

⁹ We mũndũ mũtulu, wĩkoma vau nginya ĩndĩĩ? Ũkaamũka ĩndĩĩ kuma toonĩ?

¹⁰ Wĩneena ũkasya, “Eka ngomange o vanini, eka nombosye o vanini, ekanai nakwa nĩkũnze moko nĩthũmũe o vanini!”

¹¹ Nĩvo ĩndĩ ũkya wĩkũkĩa ta kĩng'ei, na kwaĩwa kũyũka ta mũndũ wĩ na mĩio ya kaũ.

¹² Mũndũ ũte vata, mũndũ mũthũku, aendaa aineena ndeto sya ũng'endu.

¹³ Nũveneasya andũ na metho make, na kũneena na maũũ make, na o ta ũu ayonany'a na syaa syake.

¹⁴ Kĩlĩko kyake kyusũĩte ũkengani, avangaa kwĩka ũthũku, na avuĩaa kĩthokoo ĩvinda yonthe.

¹⁵ Kwondũ wa ũu akakwatwa nĩ wanangĩko mũnene kwa kĩthũlũmũko, na akaanangwa mĩtũkĩ wĩthĩe ndaiitĩka.

¹⁶ Ve maũndũ thanthatũ Mwĩai Ngai ũmenete, ĩĩ, maũndũ mũonza ala nĩ ũthatyo kwake:

¹⁷ Metho me ngathĩĩo, ũĩmĩ ũla ũneenaa ũvũngũ, moko ala moaa andũ mate ĩvĩtyo,

¹⁸ ngoo ĩla ĩvangaa maũndũ mathũku, maũũ ala mekalaataa kwĩka ũthũku,

¹⁹ ngũsĩ ya ũvũngũ ĩla ĩneenaa ũvũngũ ũtathelaa, na mũndũ ũla ũvuĩaa kĩthokoo katĩ wa ana-a-asa.

Ũkany'o Ĩũlũ wa Ũmalwaya

²⁰ Mwana wakwa, kwata mĩao ya ĩthe waku, na ndũkaaũlwe nĩ ũmanyĩsyo wa inyia waku.

²¹ Ia mĩao ĩsu ngoonĩ yaku mavinda onthe, na ũimyoveea ngingonĩ yaku.

²² Yĩla ũendete, ĩkakũtongoeasya, yĩla wakoma ĩkakũsũvĩaa, na yĩla waamũka ĩkakũnengae motao.

²³ Nũndũ mĩao ĩsu nĩ taa, na ũmanyĩsyo nĩ kyeni; mokany'o na ũmanyĩsyo nĩ nzĩa ya thayũ.

²⁴ Ikakũsũvĩa kuma kwa mũndũ mũka mũthũku, ikakũvonokya kuma ndetonĩ syĩ mũyo sya kĩveti kĩte kyaku.

²⁵ Ndũkendeew'e thayũnĩ waku nĩ wanake wa mũndũ mũka ũsu, na ndũkaeke akũkwatye na ngove syake.

²⁶ Ĩlwaya nĩyĩtumaa mũndũ-ũme avika vandũ ũtonya kwaĩwa nĩ kalungu ka mũkate, na kĩveti kĩlaalai nĩkĩtumaa mũndũ asya thayũ wake w'onthe.

²⁷ Nĩkũlya, mũndũ nũtonya kũkua mwaki kĩthũinĩ kyake, na ngũa syake iilea kũvya?

²⁸ Mũndũ nũtonya kũkinyĩla ĩũlũ wa makaa me mwaki, na maũũ make mailea kũvya?

²⁹ Ũu nĩw'o kũilyĩ kwa mũndũ ũla ũmanyanaa kĩ-mwĩĩ na kĩveti kya mũndũ ũngĩ; ũla ũkĩkiitaa ndalea kũkanw'a.

³⁰ Andũ maivũthasya kĩng'ei ethĩwa kĩũya nũndũ kĩna nzaa,

³¹ ĩndĩ kyakwatwa no nginya kĩĩve kũndũ mũonza, na kĩinengane syĩndũ syonthe ila kĩ nasyo.

³² Mũndũ-ũme ũla ũmanyanaa kĩ-mwĩĩ na kĩveti kya mũndũ ũngĩ nde kĩlĩko o na vanini; ũla wĩkaa ũu eminaa we mwene.

³³ Aũmĩaw'a na kwanangĩwa ndaĩa, na kũvũthw'a kwake kũikathela.

³⁴ Nĩkwĩthĩwa kĩwĩu kya mũndũ-ũme kĩtumaa athata mũno; ĩvinda yĩla ũkaĩvanĩsya ndakethĩwa na tei o na vanini.

³⁵ Ndaketĩkĩla aĩvwe kĩndũ o na kĩmwe, na ndakeanĩwa o na wamũnenga mĩthĩnzĩo mingĩ.