NTHIMO 5 - MBIVILIA ŨVOO MŨSEO

Kwĩsũvĩana na Ũlaalai

¹ Mwana wakwa, ĩthukĩĩsye ũĩ wakwa, tea kũtũ kwaku wĩw'e ũmanyĩsyo wakwa,

² nĩ kana ũsũanĩae maũndũ ala maĩlĩte, na ndeto ila wĩneenaa ikoonanasya kana wĩ na kĩlĩko.

³ Ilomo sya mũndũ mũka kĩlaalai syĩ mũyo ta ũkĩ wa nzũkĩ, na ũneeni wake nĩ mũtendeu kwĩ mauta.

⁴ Ĩndĩ mũminũkĩlyonĩ e wũũ ta kĩluma, nĩ mũĩ ta ũvyũ mũĩ ngalĩko syelĩ.

⁵ Maũũ make matheeaa kĩkw'ũnĩ, matambya make maatĩĩaa nzĩa ya kũthi vala maveva ma ala akw'ũ mekalaa.

⁶ Ndasũanĩaa ĩũlũ wa nzĩa ya thayũ; nzĩa syake nĩ nthyoeku, ĩndĩ ndamanyaa ũu.

⁷ Kwoou yu ana makwa, mbĩthukĩĩsyei, na mũikaatie ndeto ila ngũmũtavya.

⁸ Ĩkala vaasa na mũndũ mũka wa mũthemba ũsu, ndũkatate kũthengeea mũomo wa nyũmba yake.

⁹ Walea kwĩka ũu ũkaasya ndaĩa yaku; ũkaaĩsya myaka yaku kwa andũ mate tei.

¹⁰ Aeni makoosa ũthwii waku w'onthe, na kĩla ũthũkũmĩe kĩkatw'ĩka kya mũndũ ũngĩ.

¹¹ Mũminũkĩlyonĩ wa thayũ waku ũkesa kũĩa mũno, yĩla nyama syaku na mwĩĩ waku ikathela.

¹² Ũkaneena wasye, “Namenete ũmanyĩsyo mũno, na ngoo yakwa yavũthĩtye ũkany'o mũno!

¹³ Ndyaaĩthukĩĩsya amanyĩsya makwa, kana ngatea matũ nĩw'e atai makwa.

¹⁴ Yu ngilĩlye kũthela vyũ, nĩ katĩ wa ĩkomano ya andũ onthe.”

¹⁵ Nyusaa kĩw'ũ kuma kĩthimanĩ kyaku mwene, kĩw'ũ kĩseo kĩla kĩvĩtaa kuma kĩthimanĩ kyaku mwene.

¹⁶ Nĩkũlya, nthongo syaku nĩsyaĩlĩte kũnyaĩĩkĩa kĩla vandũ, tũlũsĩ twa kĩw'ũ kũnyaĩĩkĩa malelũnĩ?

¹⁷ Kĩthima kĩu nĩ kyaku wĩ weka, ndwaĩlĩte kũkĩtũmĩanĩa na andũ angĩ.

¹⁸ Nthongo yaku nĩathimwe, na ũitanĩa kĩveti kyaku kĩla watwaie wĩ wa mũika.

¹⁹ Nĩ kyanake ta ndaatai, na nĩ kyendeeasya ta ngondi; eka nondo syakyo ikwĩanĩae mavinda onthe, na ũitanĩthaw'a mavinda onthe nĩ wendo wakyo.

²⁰ Mwana wakwa, nĩkĩ ũũtanĩthw'a nĩ kĩveti kĩlaalai? Nĩkĩ ũũkumbatĩlya kĩthũi kya kĩveti kĩte kyaku?

²¹ Mwĩai Ngai nĩwonaa mĩendele ya mũndũ, na nũsiasya nesa nzĩa syake syonthe.

²² Maũndũ mathũku ala mũndũ mũthũku wĩkaa nĩmamũkwatasya, na ndii sya naĩ yake nimwovanasya.

²³ Akusaa nũndũ ti mũmanyĩsye, na kwaa nũndũ wa ũtumanu wake mũnene.