NTHIMO 4 - MBIVILIA ŨVOO MŨSEO

Ũseo wa Kwĩthĩwa na Ũĩ

¹ Ana makwa, ĩthukĩĩsyei ũtao wakwa nyie ĩthe wenyu, teai matũ nĩ kana mũkwate ũmanyi,

² nũndũ nĩngũmũnenga ũmanyĩsyo mũseo; mũikalee momanyĩsyo makwa.

³ Yĩla naĩ kamwana kanini nĩ mũsyĩ kwa ĩthe wakwa, no inyie nĩ nyioka naĩ kana ka inyia wakwa.

⁴ Ĩthe wakwa nĩwamanyĩasya akambĩa atĩĩ, “Kwata ũlũmye ndeto syakwa na ngoo yaku yonthe, kwata mĩao yakwa, na ũkekala thayũ.

⁵ Ĩthĩwa na ũĩ na ũyĩthĩwa na ũmanyi; ndũkaaũlwe kana ũlee kwĩka ũndũ ngũkwĩa.

⁶ Ndũkaaeke kwĩthĩwa na ũĩ, naw'o ũkakwĩkalasya; enda ũĩ naw'o ũkakũsũvĩaa.

⁷ Kwĩthĩwa na ũĩ nĩ ũndũ mũnene, kwoou ĩthĩwa na ũĩ; enda kwĩthĩwa na ũmanyi mbee wa syĩndũ ila ingĩ syonthe.

⁸ Ũnenevye, naw'o ũkakũnenevya; ũkumbatĩlye, naw'o ũkakũnenga ndaĩa.

⁹ Ũkakwĩkĩa ngovia mbanake mũtwenĩ waku; ũkakũnenga ngovia mbanake ya kĩ-ũsumbĩ.”

¹⁰ Mwana wakwa, ĩthukĩĩsye, ĩtĩkĩla ũndũ ngũkwĩa nĩ kana wĩkale thayũ myaka mingĩ.

¹¹ Nĩnakũmanyĩsya nzĩa ya kwĩthĩwa na ũĩ; nĩnakũtongoesya kũmanya kwĩthĩwa wĩ mũlũngalu.

¹² Yĩla ũendete, ndũkasiĩĩawa nĩ kĩndũ, na yĩla wasemba, ndũkaluluutĩkaa.

¹³ Kwata ũmanyĩsyo ũlũmye, ndũkaũlekye; ũsũvĩe, nĩkwĩthĩwa nĩw'o thayũ waku.

¹⁴ Ndũkaatĩĩe nzĩa ya ala athũku, na ndũkaatĩĩe mũendele wa andũ avuku.

¹⁵ Athũkĩa nzĩa ĩsu, ndũkamĩsĩle; mĩtie na ũiendeea na mbee.

¹⁶ Nĩkwĩthĩwa andũ athũku maikomaa matekĩte ũndũ mũthũku; mailĩkawa matambĩte kũtuma mũndũ avalũka.

¹⁷ Nũndũ kwĩka ũthũku nĩw'o lĩu woo, na ũng'endu nĩw'o ndivai yoo.

¹⁸ Ĩndĩ nzĩa ya ala alũngalu nĩ ta kyeni kya kũikya, kĩla kĩendeea kũkena mbeange nginya kũkakya vyũ.

¹⁹ Mĩendele ya andũ athũku nĩ ta kĩvindu kĩkamu; mayĩsĩ kĩla kĩmaluluutĩkasya.

²⁰ Mwana wakwa, ĩthukĩĩsye nesa ndeto syakwa, tea kũtũ kwaku wĩw'e ndeto syakwa.

²¹ Ndũkaaieke syume vala ũĩ, syĩkalye nthĩnĩ wa ngoo yaku.

²² Nũndũ nĩsyo thayũ kwa mũndũ ũla ũikwataa, na nĩsyo ivoasya mwĩĩ w'onthe wa mũndũ.

²³ Sũvĩa ngoo yaku wĩyumĩtye vyũ, nũndũ nĩyo kĩthima kya thayũ waku.

²⁴ Ndũkaneenae ndeto sya ũng'endu, na ndũkaneenae ndeto nthũku.

²⁵ Ĩkalaa ũsyaĩtye mbee ki, na ũyĩkalaa ũsyaĩtye maũndũ ala me mbee waku.

²⁶ Sũanĩaa nesa nzĩa ĩla ũkwĩsĩla, na maũndũ maku onthe makeethĩawa me maĩlu.

²⁷ Ndũkaathũke ũtee ngalĩko ya kw'oko kwa aũme kana kwa aka; ndũkaalike ũndũnĩ mũthũku.