NTHIMO 3 - MBIVILIA ŨVOO MŨSEO

Moseo Angĩ ma Kwĩthĩwa na Ũĩ

¹ Mwana wakwa, ndũkolwe nĩ momanyĩsyo makwa, ĩndĩ ĩkalya mĩao yakwa ngoonĩ yaku.

² Nũndũ mĩao ĩsu ĩkatuma wĩkala thayũ myaka mingĩ, na ĩkatuma ũendeea nesa mũno.

³ Ndũkaaĩtĩkĩle wĩkale ũtekwĩka ũseo na ũte mũĩkĩĩku; oveea ũseo na ũĩkĩĩku ngingonĩ; iandĩke ngoonĩ yaku.

⁴ Nĩvo ĩndĩ wĩĩtĩkĩlwa, na kwĩthĩwa na nguma nzeo mbee wa Ngai na andũ.

⁵ Ĩkĩĩa Mwĩai Ngai na ngoo yaku yonthe, na ndũkekwatye ũmanyi waku mwene.

⁶ Mwĩkwatasye maũndũnĩ maku onthe, na akakwonasya nzĩa ĩla yaw'o.

⁷ Ndũkasũanĩe kana we mwene wĩ mũĩ mũno, ĩndĩ ĩthĩwa na kĩkĩo kya Mwĩai Ngai na ũitia ũthũku.

⁸ Weeka ũu ũkeethĩwa waiita mwĩĩ waku, na ũkeekĩa mavĩndĩ maku vinya.

⁹ Mũtaĩe Mwĩai Ngai kwa kũmumĩsya nthembo kuma syĩndũnĩ syaku, na kwa kũmumĩsya ũsyao wa mbee wa ngetha yaku.

¹⁰ Nĩvo ĩndĩ makũmbĩ maku meusũw'a ngetha mbingĩ, na maviva maku mayusũa ndivai nzaũ kũvika yĩtĩkange.

¹¹ Mwana wakwa, ndũkose ũkũno wa Mwĩai Ngai ta kĩndũ kya ngũĩ, na ndũkakw'e ngoo yĩla ũũkanw'a nĩwe.

¹² Nĩkwĩthĩwa Mwĩai Ngai nũkanasya ũla wendete, o tondũ ĩthe wĩkanaa na mwana ũla wendete.

¹³ Mũndũ ũla ũkwataa ũĩ, na ũkwataa ũmanyi nĩwĩthĩawa e mũtanu.

¹⁴ Nũndũ kwĩthĩwa na ũĩ nĩ kũseo mbee wa kwĩthĩwa na silĩva, na ũtandĩthyo waw'o nĩ mũseo mbee wa thaavu.

¹⁵ Ũĩ wĩ vata mũno mbee wa mavia me thooa mũnene, na vai kĩndũ mũndũ ũtonya kwenda kĩtonya kũelekanw'a na ũĩ.

¹⁶ Ũĩ ũkakũnenga na kw'oko kwaw'o kwa aũme thayũ mũasa, na ũikũnenga na kw'oko kwa aka ũthwii na ndaĩa.

¹⁷ Mĩendele yaw'o nĩya kwendeesya, na nzĩa syaw'o syonthe nĩ sya mũuo.

¹⁸ Ũĩ nĩ mũtĩ wa thayũ kwa andũ onthe ala maũkwataa, na onthe ala mekalaa naw'o methĩawa na ũtanu.

¹⁹ Mwĩai Ngai nĩweekĩie myambĩlĩĩlyo ya nthĩ aitũmĩa ũĩ wake, na alũlũmĩĩlya matu aitũmĩa ũmanyi.

²⁰ Syũngũ sya kĩw'ũ nĩsyaanĩkie nũndũ wa ũmanyi wake, na matu nĩmauasya mbua.

²¹ Mwana wakwa, ĩkala na ũĩ ũla waĩlĩte na ũmanyi; ndũkaaieke syume vala ũĩ,

²² nasyo ikeethĩwa thayũ wa ngoo yaku, na ĩsoa ya kwanakavya ngingo yaku.

²³ Nĩvo ĩndĩ wĩendaa nzĩanĩ syaku wĩ ũsũvĩonĩ, na ndũkaluluutĩka.

²⁴ Yĩla wakoma, ndũkakĩa, ũkakomaa, na too waku ũyĩthĩwa wĩ mũyo.

²⁵ Ndũkaakĩe yĩla ũndũ mũthũku weekĩka kwa kĩthũlũmũko, kana yĩla andũ athũku makwatwa nĩ wanangĩko,

²⁶ nũndũ Mwĩai Ngai akeethĩawa wĩkwatyo waku, na akakũsũvĩa ndũkakwatw'e nĩ kĩtei.

²⁷ Ndũkaamaime andũ ũseo ũla ũmaĩlĩte, ethĩwa wĩ na ũtonyi wa kũmeka ũseo ũsu.

²⁸ Ndũkaaĩe mũtũi waku, “Enda na ũyũka ĩngĩ ũnĩ na ngakũnenga,” ethĩwa ĩvindanĩ yĩu nũtonya kũmũnenga kĩla ũkwenda.

²⁹ Ndũkaavangĩe mũtũi waku mũvango mũthũku, mũtũi ũla wĩkalaa vakuvĩ naku akũĩkĩĩe.

³⁰ Ndũkaatetany'e na mũndũ vate kĩtumi, ethĩwa ndakwĩkĩte ũthũku.

³¹ Ndũkaaĩw'ĩe mũndũ mũng'endu kĩwĩu, na ndũkaanyuve kwĩka ũmwe wa maũndũ ala wĩkaa.

³² Mwĩai Ngai nũthataw'a nĩ andũ ala athũku, ĩndĩ nũtumaa ndũũ na ala alũngalu.

³³ Mwĩai Ngai nũumanĩaa mũsyĩ wa andũ ala athũku, ĩndĩ nũathimaa wĩkalo wa ala alũngalu.

³⁴ Nũvũthasya ala me kĩvũthya, ĩndĩ ala menyivasya nũmanengae mumo.

³⁵ Andũ ala oĩ makanengwa ndaĩa, ĩndĩ ndia ikakwata nthoni.