NTHIMO 2 - MBIVILIA ŨVOO MŨSEO

Ĩtuvi ya Kwĩthĩwa na Ũĩ

¹ Mwana wakwa, ethĩwa ũkakwata ndeto syakwa, na kwiaa mĩao yakwa nthĩnĩ waku,

² watea kũtũ kwaku wĩthukĩĩsye maũndũ ma ũĩ, na kũnengane thayũ waku ũkwate ũmanyi,

³ ĩĩ, yĩla wĩvoya ũnengwe ũmanyi, na kwĩsũvana ũnengwe ũĩ,

⁴ ethĩwa ũkaũmantha ta silĩva, kana kũũmantha ta ũthwii mũvithe,

⁵ nĩvo ĩndĩ wĩmanya kĩkĩo kya Mwĩai Ngai nĩ kyaũ, na ũimũmanya Ngai.

⁶ Mwĩai Ngai nĩwe ũnenganae ũĩ, nĩwe ũmanyĩasya andũ kwĩthĩwa me na ũĩ na ũmanyi.

⁷ Nĩwiaa ũĩ mwĩanĩu kwondũ wa ala alũngalu; nĩwe ngao ya ala eanĩu.

⁸ Nũsũvĩaa ala maatĩĩaa ũsili wa katĩ, na kũsũvĩa mĩendele ya aĩkĩĩi make.

⁹ Nĩvo ĩndĩ wĩmanya ũlũngalu, ũsili wa katĩ, na ũla waĩlu nĩ kyaũ. Ũkamanya nzĩa ĩla nzeo.

¹⁰ Nĩkwĩthĩwa ũĩ ũkalika ngoonĩ yaku, naw'o ũmanyi ũkatanĩthya thayũ waku.

¹¹ Kwĩthĩwa na kĩlĩko kũkakũsũvĩa, na kwĩthĩwa na ũmanyi kũkakũseseeaa.

¹² Kũkakũvonokya kuma mĩendelenĩ mĩthũku, kuma andũnĩ onthe ala maneenaa ndeto nthũku;

¹³ ala matiaa nzĩa ya ũlũngalu, na kũthi na nzĩa ya kĩvindu,

¹⁴ andũ ala matanĩaa kwĩka mothũku, na mendeeaw'a nĩ kwaw'a nĩ mothũku,

¹⁵ andũ ala nzĩa syoo nthyoeku, na matatonya kũĩkĩĩwa maũndũnĩ ala mekaa.

¹⁶ Ũkeethĩwa ũtonya kwĩsũvĩana na mũndũ mũka kĩlaalai, kĩveti kĩte kyaku kĩla kĩneenaa ndeto syĩ mũyo;

¹⁷ mũndũ mũka ũla wũlawa nĩ mũnyanyae wake wa ũika wake, na akolwa nĩ ũtianĩo wake na Ngai.

¹⁸ Wathi nyũmba kwake, ũendete na nzĩa ya kĩkw'ũ, na kũthi nyũmba kwake nĩ ũndũ ũmwe na kũthi vala maveva ma ala akw'ũ mekalaa.

¹⁹ Vai mũndũ ũendaa kwa mũndũ mũka ũsu akasyoka, kana akasyokea nzĩa ya thayũ.

²⁰ Kwoou atĩĩa matambya ma andũ ala aseo, na kwĩsĩlaa nzĩanĩ sya ala alũngalu.

²¹ Nĩkwĩthĩwa ala alũngalu makatũa nthĩ ĩno, na andũ ala eanĩu makekala vo.

²² Ĩndĩ andũ ala athũku makavetangwa kuma nthĩ ĩno yaitũ, na nzeleke ikakũanĩw'a na mĩi syume nthĩnĩ wayo.