NTHIMO 11 - MBIVILIA ŨVOO MŨSEO

¹ Mwĩai Ngai nũthataw'a nĩ andũ ala matũmĩaa ithimi sya ũvũngũ, ĩndĩ nũtanĩthaw'a nĩ ithimi sya w'o.

² Ngathĩĩo ietae nthoni, ĩndĩ ala menyivasya nĩmethĩawa na ũĩ.

³ Andũ ala alũngalu nĩmatongoeaw'a nĩ ũĩkĩĩku woo, ĩndĩ ala athũku nĩmaminawa nĩ kwĩthĩwa mate aĩkĩĩku.

⁴ Ũthwii ndũunaa mũthenyanĩ wa ũsilĩlo, ĩndĩ ũlũngalu nũvonokasya kuma kĩkw'ũnĩ.

⁵ Ũlũngalu wa mũndũ ũte ĩvĩtyo nũseũvasya mwĩkalo wake, ĩndĩ ũla mũthũku nũvalũkaw'a nĩ ũthũku wake mwene.

⁶ Ũlũngalu wa ala alũngalu nũmavonokasya, ĩndĩ nzeleke nikwataw'a nĩ wendi wasyo mũthũku.

⁷ Yĩla mũndũ mũthũku wakw'a wĩkwatyo wake nĩwaa, na wĩkwatyo wa ũla ũtamwĩsĩ Ngai ũtw'ĩkaa wa mana.

⁸ Mũndũ ũla mũlũngalu nũvonokaw'a kuma thĩnanĩ, na ũla mũthũku ailika thĩnanĩ ũsu.

⁹ Mũndũ ũla ũtakĩaa Ngai nũminaa mũtũi wake na ndeto syake, ĩndĩ kwondũ wa ũmanyi ala alũngalu nĩmavonokaw'a.

¹⁰ Ndũa nĩtanaa yĩla andũ ala alũngalu maendee nesa, ĩndĩ yĩla ala athũku makw'a andũ nĩmatanaa.

¹¹ Ndũa nĩtaĩawa yĩla ala alũngalu mamĩathima, ĩndĩ nĩyanangawa nĩ ndeto sya ala athũku.

¹² Mũndũ ũla ũneenaa ndeto sya kũvũthya ĩũlũ wa mũtũi wake nĩ mũtumanu, ĩndĩ mũndũ ũla wĩ na ũmanyi nũvindasya.

¹³ Mũndũ ũla ũsukanaa ndatonya kwia kĩmbithĩ, ĩndĩ mũndũ ũla mũĩkĩĩku nũtonya kwia kĩmbithĩ.

¹⁴ Vala vate ũtongoi, andũ nĩmavalũkaa, ĩndĩ vala ve atai aingĩ vethĩawa ũsũvĩo.

¹⁵ Mũndũ ũla wathanaa kũĩvĩa mũndũ mũeni thiĩ wake akeelila, ĩndĩ ũla ũleaa kwathana kũĩva ethĩawa ũsũvĩonĩ.

¹⁶ Mũndũ mũka mũseo nũnengawe ndaĩa, na mũndũ-ũme wĩ kĩthito nũkwataa ũthwii.

¹⁷ Mũndũ wĩ tei nĩwĩyĩkaa nesa, ĩndĩ mũndũ mũthũku aũmĩasya mwĩĩ wake mwene.

¹⁸ Mũndũ mũthũku akwataa ĩtuvi ya ũvũngũ, ĩndĩ ũla ũvuĩaa ũlũngalu akwataa ĩtuvi yaw'o.

¹⁹ Mũndũ ũla kwa w'o mũlũngalu akakwata thayũ, ĩndĩ ũla ũendeeaa kwĩka ũthũku akakw'a.

²⁰ Mwĩai Ngai nũthataw'a nĩ andũ ala me ngoo nthũku, ĩndĩ nĩwendeeaw'a nĩ ala me mwĩkalo mũseo.

²¹ Vate ndĩi mũndũ mũthũku ndakalea kũkanw'a, ĩndĩ ala alũngalu makavonoka.

²² Mũndũ mũka mwanake ũte na kĩlĩko, ailyĩ ta ngome ya thaavu yĩ ĩnyiũũnĩ ya ngũlũe.

²³ Kwenda kwa andũ alũngalu kĩla ĩvinda kũetae ũseo, ĩndĩ wĩkwatyo wa ala athũku ũetae wanangĩko.

²⁴ Ũla wumasya kwa ũlau aendeeaa kũthua, ĩndĩ ũla ũtaumasya kwa ũlau aendeeaa kũtw'ĩka ngya.

²⁵ Mũndũ mũlau akaendeea nesa, ũla ũnengae ũngĩ kĩw'ũ anyw'e nake akanengwa.

²⁶ Andũ nĩmaumanĩaa mũndũ ũla wiaa ngetha ya mbaa mbeke, eteelete thooa wambate, ĩndĩ nĩmaathimaa ũla ũmĩthooasya.

²⁷ Ũla ũmanthaa na kĩthito kwĩka nesa nĩwĩkawa nesa, ĩndĩ ũla ũmanthaa kwĩka ũthũku nũkwatawa nĩ ũthũku.

²⁸ Ũla ũĩkĩĩaa ũthwii wake akavalũka, ĩndĩ ũla mũlũngalu akaaĩlaa ta ĩtũ yĩũ.

²⁹ Mũndũ ũla ũthĩnasya andũ ma mũsyĩ wake akatiwa ate na kĩndũ, na ũla mũtumanu akatw'ĩka mũthũkũmi wa ũla mũĩ.

³⁰ Meko ma mũndũ mũlũngalu nĩmaetae thayũ, ĩndĩ mũndũ ũtaatĩĩaa mĩao nũtumaa mathayũ maa.

³¹ Ethĩwa andũ ala alũngalu makaĩvĩwa kũũ nthĩ, nĩ mbee veana ata kwa ala athũku na eki ma naĩ!