MŨTAVAN’YA 1 - MBIVILIA ŨVOO MŨSEO

Thayũ wa Mũndũ Ĩũlũ wa Nthĩ nĩ wa Mana

¹ Ii nĩ ndeto sya Mũtavany'a mwana wa Ndeviti, ũla wasumbĩkĩte e Yelũsalemu.

² No mana, mana vyũ, easya ũu Mũtavany'a. Thayũ nĩ mana, mana vyũ! Maũndũ onthe nĩ mana!

³ Mũndũ akwataa kyaũ kumana na wĩa wake w'onthe ũla ũtethasya e ĩũlũ wa nthĩ?

⁴ Nzyawa nĩsyũkaa na nzyawa ikavĩta, ĩndĩ nthĩ yĩkalaa ũndũ yailyĩ kuma tene.

⁵ Syũa nĩyumaa na syũa yĩithũa, na kũsyoka ĩngĩ mĩtũkĩ vala yumĩlĩĩlaa.

⁶ Kĩseve nĩkĩuutanaa kĩelete ngalĩko ya ĩtheo, na kũuutana kĩelete ngalĩko ya ĩũlũ; nĩkĩendeeaa kũuutana, na kũsyokanĩsya ngalĩko isu syonthe.

⁷ Mbũsĩ syonthe itwaa kĩw'ũ ũkanganĩ, ĩndĩ ũkanga ndwĩsaa kusũa. Kĩw'ũ kĩu kĩsyokaa ĩngĩ vala ũsĩ wambĩĩe, na kĩitheea ĩngĩ kĩsyokete ũkanganĩ.

⁸ Maũndũ onthe ĩũlũ wa nthĩ me mĩnoo, mĩnoo mingĩ ĩtatonya kũeleeeka nĩ mũndũ o na wĩva. Metho maikolaa kwona, o na matũ maikolaa kwĩw'a.

⁹ Maũndũ ala maĩ kw'o nomo makethĩwa; maũndũ ala meekiwe nomo makekwa ĩngĩ. Vai ũndũ mweũ ĩũlũ wa nthĩ.

¹⁰ Ve ũndũ o na wĩva mũndũ ũtonya kwasya, “Sisya! Ũndũ ũũ nĩ mweũ?” Ũndũ ũsu waĩ o vo kuma tene, o na mbee wa tũtanamba kũsyawa.

¹¹ Vai mũndũ ũlilikana maũndũ ala meekawa tene, o tondũ nzyawa ila ikoka itakalilikana maũndũ ala meekawa nĩ ala maĩ mbee woo.

Ũĩ nĩ wa Mana kwa Mũtavany'a

¹² Nyie Mũtavany'a nĩthĩĩtwe nĩ mũsumbĩ wa Ĩsilaeli nĩ kũu Yelũsalemu.

¹³ Nĩnatũmĩie kĩlĩko kyakwa nĩmanthe na ũĩ kũtata kwĩkuũa maũndũ onthe ala maendeeaa ĩũlũ wa nthĩ. Ũũ nĩ mũio mũnene, wĩ mĩnoo, Ngai ũnengete andũ!

¹⁴ Nĩnonete maũndũ onthe ala mekawa kũũ ĩũlũ wa nthĩ; na nĩkũtavya kana maũndũ asu onthe nĩ mana; no ta kũsembany'a na kĩseve.

¹⁵ Kĩla kĩthyoeku kĩitonya kũlũngalw'a, na mũndũ ndatonya kũtala kĩla kĩtevo.

¹⁶ Yĩla nyie nasũanĩie, nĩnoonie kana nĩngwatĩte ũĩ mwingĩ kũvĩtũka wa asumbĩ onthe ala maasumbĩka me Yelũsalemu mbee wakwa; nĩnamanyie maũndũ maingĩ ĩũlũ wa kwĩthĩwa na ũmanyi.

¹⁷ Kwoou nĩnendie nĩmanye maũndũ ĩũlũ wa ũĩ, ndũũka na ũtumanu. Ĩndĩ nĩneethĩie kana ũu o naw'o nĩ ta kũsembany'a na kĩseve.

¹⁸ Nĩkwĩthĩwa ũĩ mwingĩ ũetae kĩmako kingĩ, na ũla wongelaa ũmanyi ongelaa woo.