Mika 2 - MBIVILIA ŨVOO MŨSEO

Ũkany'o kwa ala Mathĩnasya Ngya

¹ Kyeva nĩ kwa ala mavangaa kwĩka ũthũku; me mokomonĩ moo mavangaa kwĩka ũthũku! Kwamina kũkya, nĩmekaa ũthũku ũsu, nũndũ me na ũtonyi wa kũwĩka.

² Mew'ĩaa itheka syeene ĩtomo, na kũsyosa; mew'ĩaa nyũmba syeene ĩtomo na kũsyosa; nĩmavenaa andũ mĩsyĩ yoo, na kũvena andũ ũtiĩwa woo.

³ Kwoou Mwĩai Ngai easya atĩĩ, “Yu, nĩmbangĩte kũetee andũ asu ũthũku, ũla mũtatonya kwĩtangĩĩa mũkauma. Mũikekala ĩngĩ mwĩ na ngathĩĩo, nĩkwĩthĩwa yĩkeethĩwa yĩ ĩvinda ya thĩna.

⁴ Mũthenyanĩ ũsu andũ makamwinĩa mbathi sya kĩvũthya, makaina wathi wa kyeva mayasya atĩĩ, ‘Nĩtũminĩtwe vyũ. Nũaanĩtye ũtiĩwa wa andũ maitũ; nũwosete kuma vala tũĩ na ũkaũnenga andũ athũku.’ ”

⁵ Kwoou vaikethĩwa mũndũ wũmbanonĩ wa Mwĩai Ngai, wa kũaany'a itheka kwa kũkũna kũla.

⁶ Athani moo maasya atĩĩ, “Mũikathane; mũikathane ĩũlũ wa maũndũ aa; tũikwatwa nĩ nthoni.”

⁷ Inyw'ĩ nzyawa sya Yakovo, mwĩsũanĩa kana ũndũ ũũ nĩwaĩlĩte kũneenwa? Mwĩai Ngai nũekete kwĩthĩwa ate na wũmĩĩsyo? Nĩwe wĩkĩte maũndũ asu? Ndeto syake iyĩkaa nesa ũla wĩkaa ũla waĩlu?

⁸ Mwĩai Ngai nĩwasũngĩie asya atĩĩ, “Inyw'ĩ nĩmũvithũkĩaa andũ makwa ta mwĩ amaitha; nĩmũvenaa andũ mauĩtye ngũa syoo ndaasa; andũ mavĩtĩte maendete maũndũnĩ moo, matena thĩna, na mateũsũanĩa ĩũlũ wa kaũ.

⁹ Nĩmũlũngasya Iveti sya andũ makwa kuma nyũmbanĩ syoo nzeo; nĩmũvenaa syana syoo ndaĩa yakwa tene na tene.

¹⁰ “Ũkĩlai mũthi, nĩkwĩthĩwa vaa ti vandũ va kũthũmũa, nũndũ nĩmũvavukĩtye na vaitonya kũseũvw'a ĩngĩ.

¹¹ Ethĩwa mũndũ nũtonya kũthi aneenete ndeto sya mana na sya ũvũngũ ayasya atĩĩ, ‘Nĩmũkwĩthĩwa na ndivai na ũkĩ mwingĩ,’ ũsu nĩwe wĩthĩwa e mwathani ũla andũ mekwenda.

Andũ ma Ĩsilaeli Mayathwa Ũthasyo

¹² “Inyw'ĩ andũ ma Ĩsilaeli nĩngũmũmbany'a vamwe; nĩngũmũmbany'a inyw'ĩ andũ ma Ĩsilaeli ala mũtialĩte. Nĩngũmũete vamwe ta malondu matwaĩtwe kĩtũũnĩ, ta ndĩthya yĩ kĩsesinĩ, nenyu mũkeethĩwa mwĩ nguthu ya andũ aingĩ.”

¹³ Ũla wĩvingũa nzĩa akamatongoesya, namo makaananga mũvĩa wa ndũa na mayumaala. Mũsumbĩ woo akamatongoesya; Mwĩai Ngai mwene akamatongoesya.