MATHAYO 27 - MBIVILIA ŨVOO MŨSEO

Yesũ Aitwawa kwa Vilato

¹ Kwakya kĩoko tene, athembi anene onthe na atumĩa nĩmamũsamĩie Yesũ ũndũ meũmũtw'ĩĩa kũawa.

² Nĩmamwovie moko na mamũtwaa, mamũnengane kwa Vilato ũla waĩ ngavana.

Kĩkw'ũ kya Yutasi

³ Yĩla Yutasi ũla wamũthooisye Yesũ wamanyie kana Yesũ atw'ĩka nũvĩtĩtye, na aĩlĩtwe nĩ kũawa, nĩweelilile kwondũ wa naĩ yake, na atũngĩa athembi anene na atumĩa ila mbesa sya silĩva mĩongo ĩtatũ.

⁴ Nĩwameie atĩĩ, “Nyie nĩnĩkie naĩ kũthoosya mũndũ ũte na ĩvĩtyo oawe!” Ĩndĩ namo mamwĩa atĩĩ, “Yu wĩtũtavya kyaũ? Ũsu kote thĩna waku!”

⁵ Yutasi nĩwekisye mbesa isu Ĩkalũnĩ nthĩnĩ na aumaala athi eesũsya.

⁶ Athembi anene nĩmoosanisye mbesa isu na masya atĩĩ, “Nũndũ ii nĩ mbesa sya nthakame, ti waĩlu kũsyĩkĩa kĩnandũnĩ kya Ĩkalũ.”

⁷ Kwoou meetĩkĩlana onthe, mathooa kĩsesi kya mũmbi wa mbisũ kĩthĩwe vandũ va kũthikaa aeni.

⁸ Nĩkyo kĩtumi kĩsesi kĩu o na kũvika ũmũnthĩ kĩtawa Kĩsesi kya Nthakame.

⁹ Kwa nzĩa ĩsu, ũu weanĩsya kĩla kyaneenetwe nĩ mwathani Yelemia akasya atĩĩ, “Nĩmoosie ila mbesa sya silĩva mĩongo ĩtatũ, nasyo nĩsyo mbesa ila andũ ma Ĩsilaeli meetĩkĩlanĩte tasyo thooa wa mũndũ,

¹⁰ na maitũmĩa kũthooa kĩsesi kya mũmbi wa mbisũ, o ũndũ Mwĩai wambĩaĩĩte.”

Vilato Aimũkũlya Yesũ Makũlyo

¹¹ Yesũ nĩwaũngamie mbee wa ngavana, nake amũkũlya atĩĩ, “We nue mũsumbĩ wa Ayuti?” Yesũ amũsũngĩa amwĩa, “We nĩwaneena.”

¹² Yĩla athembi anene na atumĩa mambĩĩie kũmũsikata, Yesũ ndaasũngĩa ũndũ.

¹³ Nĩvo ĩndĩ Vilato wamwĩie atĩĩ, “We no ũkwĩw'a maũndũ asu maũsikatĩte namo ũndũ maingĩvĩte?”

¹⁴ Ĩndĩ Yesũ ndaasũngĩa ũndũ o na ũmwe, na kwa kĩtumi kĩu ngavana aseng'a mũno.

Yesũ Aitw'ĩĩwa Kũawa

¹⁵ Kĩla ĩvinda ya Mboka ya Vasaka, ngavana aĩ na kĩmanyĩo kya kũthasya mwovwa ũmwe o ũla andũ meetya.

¹⁶ Ĩvindanĩ yĩu vaĩ mwovwa ũmwe weesĩkĩwe kwa kũthũka weetawa Valava.

¹⁷ Kwoou yĩla andũ moombanie, Vilato nĩwamakũlilye atĩĩ, “Mwĩenda nĩmũthaĩsye ũũ? Nĩ Valava kana nĩ Yesũ ũla wĩtawa Klĩsto?”

¹⁸ Amakũlilye ũu nũndũ nĩweesĩ kana atongoi ma Ayuti mamũnenganie Yesũ kwake nũndũ wa kĩwĩu.

¹⁹ Kĩtumi kĩngĩ nũndũ yĩla Vilato wailyĩ nthĩ ethukĩĩsye ĩkoani yĩu, mũka wake nĩwatũmanĩte vala ũĩ akamwĩa atĩĩ, “Ndũkatate kwĩthĩwa na ũndũ na mũndũ ũsu ũte na ĩvĩtyo, nũndũ ũtukũ ũũ ũvĩtie nĩĩ na ndoto ĩnthĩnisye mũno ĩũlũ wake.”

²⁰ Athembi anene na atumĩa nĩmathing'ĩĩisye andũ metye Valava, na mayasya Yesũ nĩ oawe.

²¹ O ĩngĩ ngavana nĩwakũlilye andũ atĩĩ, “Mwĩenda nĩmũthaĩsye ũũ katĩ wa andũ aa me elĩ?” Namo mamwĩa atĩĩ, “Valava!”

²² Vilato amakũlya atĩĩ, “Nake Yesũ ũla wĩtawa Klĩsto nĩĩkana nake ata?” Onthe mamũsũngĩa mamwĩa, “Nĩambwe!”

²³ Vilato amakũlya atĩĩ, “Nĩkĩ? Ekĩte ĩvĩtyo yaũ?” Ĩndĩ malonzanĩĩlya mũno mbee mayasya atĩĩ, “Nĩambwe!”

²⁴ Yĩla Vilato woonie kana aendee na kũneena o mana, ĩndĩ no ituu ikwenda kũkĩla, nĩwoosie kĩw'ũ athamba moko e mbee wa andũ na asya atĩĩ, “Nyie ndi vo nthĩnĩ wa kũaa mũndũ ũũ; ũsu nĩ thĩna wenyu!”

²⁵ Namo andũ onthe mamũsũngĩa mamwĩa atĩĩ, “Kĩkw'ũ kyake nĩkĩthĩwe ĩũlũ waitũ na syana sitũ.”

²⁶ Nĩvo ĩndĩ Vilato wamathaĩisye Valava, na ĩndĩ amũnengane Yesũ akũnwe ivoko na kwambwa ngelany'onĩ.

Asikalĩ Maimũvũthĩĩsya Yesũ

²⁷ Asikalĩ ma ngavana nĩmamũtwaie Yesũ mamũlikya nyũmbanĩ nene ya ngavana, na meeta nguthu yonthe ya asikalĩ mamũthyũlũlũka.

²⁸ Nĩmamumisye ngũa syake na mamwĩkĩa ngũa ndune.

²⁹ Nĩvo ĩndĩ maseũvisye ngovia maitũmĩa tũũvonge twĩ mĩw'a mamwĩkĩa, na mamũkwatĩthya ndata kw'okonĩ kwake kwa aũme. Nĩmatulilye ndu mbee wake ta meũmũthaitha na mamũthekeea maimwĩa atĩĩ, “Ũvoo waku Mũsumbĩ wa Ayuti!”

³⁰ Nĩvo ĩndĩ mamũtw'ĩlangile mata na moosa ĩla ndata mamũkũna nayo mũtwe.

³¹ Mamina kũmũthekeea, nĩmamumisye ĩla ngũa ndune na mamwĩkĩa ngũa ila syake. Vau ĩndĩ nĩmamumaalũkilye mamũtwaa makamwambe.

Yesũ Ayambwa Ngelany'onĩ

³² Me nzĩanĩ nĩmakomanie na mũndũ ũmwe kuma Kũlene wĩtawa Simioni. Asikalĩ nĩmamũkuĩthisye Yesũ ngelany'o.

³³ Nĩmavikie vandũ vetawa Ngolongotha, ĩla ũalyũlo wayo nĩ, “Vandũ va Kĩng'ala.”

³⁴ Vau nĩmamũnengie Yesũ ndivai ĩvulanĩtw'e na nyongo, ĩndĩ ĩtina wa kũmĩsama alea kũmĩnyw'a.

³⁵ Asikalĩ nĩmamwambie ngelany'onĩ na maana ngũa syake kwa kũkũna kula, nĩ kana mamanye ngũa ĩla kĩla ũmwe ũkwosa.

³⁶ Ĩtina wa ũu nĩmekalile nthĩ vau mamũsunge.

³⁷ Vau ngelany'onĩ, ĩũlũ wa mũtwe wake nĩmaathĩĩie kĩvwaũ kĩandĩkĩtwe kĩla Yesũ wasikatĩĩtwe: “ŨŨ NĨWE YESŨ MŨSUMBĨ WA AYUTI.”

³⁸ O ta ũu, asikalĩ nĩmambie ing'endilĩ ilĩ vamwe na Yesũ; kĩmwe ngalĩko ya kw'oko kwake kwa aũme, na kĩla kĩngĩ ngalĩko ya kw'oko kwake kwa aka.

³⁹ Andũ ala mavĩtĩlaa vau nĩmathingithangasya mĩtwe yoo na kũtavya Yesũ syuo nthũku maimwĩa atĩĩ,

⁴⁰ “Ũnaasya nũtonya kwananga Ĩkalũ na ũiyaka ĩngĩ na mĩthenya ĩtatũ, ĩtangĩĩe yu! Ethĩwa nue Mwana wa Ngai, theea wume ngelany'onĩ!”

⁴¹ O namo athembi anene me na amanyĩsya ma Mĩao na atumĩa nĩmamũthekeeie Yesũ mayasya atĩĩ,

⁴² “Anatangĩĩaa andũ angĩ, ĩndĩ we mwene ndatonya kwĩtangĩĩa! Nengĩ newe Mũsumbĩ wa Ĩsilaeli! Ndathee yu kuma ngelany'onĩ na nĩtũũmwĩtĩkĩla!

⁴³ Nũmũĩkĩĩaa Ngai na kwasya we nĩ Mwana wa Ngai; ekai yu twone kana Ngai nũkũmũvonokya!”

⁴⁴ O ta ũu, ing'endilĩ ila syambĩtwe vamwe na Yesũ o nasyo nĩsyamũtavasya syuo nthũku sya mũthemba o ũsu.

Kĩkw'ũ kya Yesũ

⁴⁵ Kuma saa sita kũvika saa kenda sya mũthenya, nthĩ ĩsu yonthe nĩyameisye kĩvindu.

⁴⁶ Saa kenda syavika, Yesũ nĩwakayie na wasya mũnene ayasya atĩĩ, “Eli, Eli, lama savakathani?” Ũalyũlo wayo nĩ, “Ngai wakwa, Ngai wakwa, ũndekee kĩ?”

⁴⁷ Andũ amwe maũngyĩ vau vakuvĩ meew'a ũu nĩmaisye atĩĩ, “Mũndũ ũũ eĩta Eliya!”

⁴⁸ Ũmwe woo nĩwasembie o kwa mĩtũkĩ, oosa kasivonzi akainda ndivainĩ ngaatu, na akatonyeesya mũtĩnĩ, amũnengeleelya Yesũ aviviite.

⁴⁹ Andũ ala angĩ namo masya atĩĩ, “Kwa ekai tweteele twone kana Eliya nũkũka amũtangĩĩe!”

⁵⁰ Yesũ nĩwakayie ĩngĩ na wasya mũnene na akw'a.

⁵¹ Kavindanĩ o kau kĩtambaa kĩla kyatilanĩtye Ĩkalũ nĩkyatembũkanĩle katĩ kuma ĩũlũ kũvika nthĩ. O ta ũu nĩkweethĩiwe na kĩtetemo kya nthĩ, na mavia manene maatũkanga.

⁵² Mbũa o nasyo nĩsyavingũkangie, na mĩĩ ya andũ aingĩ ma Ngai ala makw'ĩte yasyũkw'a.

⁵³ Andũ asu nĩmaumie mbũanĩ, na ĩtina wa kũthayũũka kwa Yesũ mathi malika Yelũsalemu, na mooneka nĩ andũ aingĩ.

⁵⁴ Yĩla mũnene wa asikalĩ ĩana vamwe na asikalĩ ala maĩ nake maisunga Yesũ meewie kĩtetemo kĩu kya nthĩ, na moona maũndũ onthe ala meekĩka, nĩmakwatiwe nĩ w'ĩa mwingĩ na masya atĩĩ, “Kwa w'o, ũũ eĩ Mwana wa Ngai!”

⁵⁵ O ta ũu, vaĩ aka aingĩ vau masyaĩĩsye me kũasa, namo mookanĩtye na Yesũ kuma Kalilii makĩmũtethasya mavatanĩ make.

⁵⁶ Katĩ wamo vaĩ Meli Makitalene, na Meli inyia wa Yakovo na Yose, o vamwe na mũka wa Nzevetii.

Kũthikwa kwa Yesũ

⁵⁷ Syũa yĩ vakuvĩ kũthũa, mũndũ ũmwe mũthwii weetawa Yosevu kuma Alimathea, ũla o nake waĩ mũmanyĩw'a wa Yesũ,

⁵⁸ nĩwaendie vala ve Vilato na amũkũlya amwĩtĩkĩlye athi akavete mwĩĩ wa Yesũ. Vilato nĩwaumisye mwĩao Yosevu anengwe mwĩĩ ũsu.

⁵⁹ Kwoou Yosevu athi atheesya mwĩĩ wa Yesũ kuma ngelany'onĩ, aũlinga na suka ĩtumĩtwe na ndii nzeo ndũmu,

⁶⁰ na aũthika mbũanĩ yake waĩ o anamyasie ĩvianĩ mĩtũkĩ. Nĩwavingilitilye ĩvia ĩnene akunĩka mũomo wa mbũa ĩsu nayo na athi.

⁶¹ Meli Makitalene na Meli ũla ũngĩ mailyĩ nthĩ vau masyaĩtye mbũanĩ ĩsu.

Asikalĩ Maisunga Mbũa

⁶² Ũnĩ ũsu, naw'o nĩ mũthenya wa Savato, athembi anene na Avalisi nĩmaendie makamwone Vilato

⁶³ na mamwĩa atĩĩ, “Mũnene, nĩtũlilikene kana mũkengani ũsu yĩla ũnaĩ thayũ nĩwaneenie asya atĩĩ, ‘Ĩtina wa mĩthenya ĩtatũ ngathayũũka.’

⁶⁴ Kwoou ĩyĩae mbũa ĩkasungwe kũvika mũthenya wa katatũ, amanyĩw'a ma Yesũ maikese kũka moye mwĩĩ wake na maitavya andũ mamee nũthayũũkie kuma kwa akw'ũ. Ũkengani ũũ nũtonya kwĩthĩwa wĩ mũthũku kũte ũla wa mbee.”

⁶⁵ Vilato amea atĩĩ, “Osai asikalĩ na mũithi mũkalũlũmĩĩlye mbũa ĩsu ũndũ mũtonya.”

⁶⁶ Kwoou mathi na mamĩlũlũmĩĩlya kwa kũthingĩĩa yĩla ĩvia na matia asikalĩ mamĩsunge.