MATHAYO 26 - MBIVILIA ŨVOO MŨSEO

Atongoi ma Ayuti Maimũsamĩa Yesũ Mamũae

¹ Yesũ amina kũmanyĩsya maũndũ asu onthe, nĩwameie amanyĩw'a make atĩĩ,

² “O tondũ mwĩsĩ, ĩtina wa mĩthenya ĩlĩ nĩkũkwĩthĩwa na Mboka ya Vasaka. Mũthenya o ũsu, Mwana wa Mũndũ akanenganwe kwa amaitha make na makamwamba ngelany'onĩ.”

³ Ĩvindanĩ yĩu, athembi anene na atumĩa nĩmoombanĩie nyũmba kwa Mũthembi ũla Mũnene weetawa Kaiava.

⁴ Nĩmasamie vamwe ũndũ matonya kũmũkwata Yesũ kwa ũseleke na kũmũtw'ĩĩa kũawa.

⁵ Ĩndĩ nĩmaneenanisye masya atĩĩ, “Tũikeke ũu mũthenya wa mboka andũ maikese kũkĩlya ituu.”

Yesũ Ayĩtĩkĩw'a Mauta Mbethani

⁶ Ĩvinda yĩmwe Yesũ nĩwaendie Mbethani mũsyĩ kwa Simioni, ũla na vu ĩtina wawaĩte mangũ.

⁷ Aendee na kũathĩw'a, mũndũ mũka ũmwe nĩwookie vala ũĩ akuĩte sũva waseũvĩtw'e na ĩvia yĩtawa alambasita, wusĩe mauta me mũuke mũseo na ma mbesa mbingĩ amwĩtĩkĩsya mũtwe.

⁸ Yĩla amanyĩw'a make moonie ũu, nĩmathatie mũno na makũlany'a atĩĩ, “Yu wanango ũũ w'onthe nĩ wa kĩ?

⁹ Mauta aa meĩ matewa mbesa mbingĩ mũno na mbesa isu iinengwa ngya!”

¹⁰ Yesũ nĩwamanyie ũndũ mekwasya na kwoou amea atĩĩ, “Mwĩthĩnĩsya mũndũ mũka ũũ kĩ? Ambĩka nesa mũno.

¹¹ Mũkekalaa na ngya mavinda onthe, ĩndĩ nyie ndyĩkalaa nenyu mavinda onthe.

¹² Mũndũ mũka ũũ etĩkĩsya mwĩĩ wakwa mauta aa awũmbany'e kwondũ wa mathiko makwa.

¹³ Nĩmũtavya w'o, kũndũ kw'onthe ĩũlũ wa nthĩ kũla Ũvoo Mũseo ũkatavanw'a, o naw'o ũndũ ũũ mũndũ mũka ũũ weeka, ũkawetawa nĩ kana andũ mamũlilikanae.”

Yutasi Ayĩtĩkĩla Kũmũthoosya Yesũ kwa Amaitha

¹⁴ Ĩtina wa ũu, ũmwe wa ala amanyĩw'a ĩkũmi na elĩ, ũla weetawa Yutasi Ĩsikalioti, nĩwaendie kwa athembi anene,

¹⁵ amea atĩĩ, “Mwĩnenga kyaũ nathoosya Yesũ kũla mũĩ?” Namo mamũtalĩĩla mbesa sya silĩva mĩongo ĩtatũ mamũnenga.

¹⁶ Nĩvo ĩndĩ kuma vau Yutasi wambĩĩie kũmantha mwanya mũseo wa kũmũthoosya Yesũ kũla maĩ.

Yesũ Aiya Mboka ya Vasaka na Amanyĩw'a make

¹⁷ Mũthenyanĩ wa mbee wa Mboka ya Mũkate ũte Mbota, amanyĩw'a ma Yesũ nĩmaendie vala ũĩ mamũkũlya atĩĩ, “Wĩenda tũkaũseũvĩsye Mboka ya Vasaka va?”

¹⁸ Nake amea atĩĩ, “Endai mũsyĩnĩ mũnene wa Yelũsalemu kwa mũndũ mũna mũkamwĩe mũmanyĩsya easya ũũ, ‘Ĩvinda yakwa nĩyĩthengeeie; nĩũka kũĩĩa Vasaka mũsyĩ kwaku nĩ na amanyĩw'a makwa.’ ”

¹⁹ Amanyĩw'a nĩmeekie o ũndũ Yesũ wameĩte na maseũvya Mboka ya Vasaka.

²⁰ Kwavika wĩoo, Yesũ na amanyĩw'a make me ĩkũmi na elĩ nĩmekalile nthĩ maathĩw'e.

²¹ Maendee na kũathĩw'a, Yesũ nĩwameie atĩĩ, “Ekai nĩmũtavye, ũmwe wenyu nũkũnthoosya kũla kwĩ amaitha makwa.”

²² Amanyĩw'a nĩmeewie woo mũno na mambĩĩa kũmũkũlya ũmwe kwa ũmwe atĩĩ, “Mwĩai nokwĩthĩwa ne inyie?”

²³ Yesũ amasũngĩa amea atĩĩ, “Ũla ũkũnthoosya nĩ mũndũ ũkũvokanĩa nakwa ĩsaaninĩ yĩmwe.

²⁴ Kwa w'o Mwana wa Mũndũ ekw'a o kwĩanana na ũndũ Maandĩko Matheu maĩtye, ĩndĩ kyeva nĩ kwa mũndũ ũsu ũkamũthoosya Mwana wa Mũndũ kwa amaitha! Nĩ kavaa kethĩwa mũndũ ũsu ndaasyawa!”

²⁵ Yutasi ũla weetĩkĩlile kũmũthoosya Yesũ kwa amaitha amũkũlya atĩĩ, “Mũmanyĩsya, no kwĩthĩwa ne inyie?” Yesũ amũsũngĩa amwĩa atĩĩ, “We nĩwaneena.”

Mboka ya Mwĩai

²⁶ O maendee na kũathĩw'a, Yesũ nĩwoosie mũkate na atũnga mũvea kwa Ngai; nĩwaũtilangile na aũnenga amanyĩw'a make ayasya atĩĩ, “Kwatai mũye; ũũ nĩ mwĩĩ wakwa.”

²⁷ O ta ũu nĩwoosie kĩkombe kĩ ndivai na atũnga mũvea kwa Ngai; nĩwanengie amanyĩw'a make ayasya atĩĩ, “Nyw'ai inyw'onthe kuma kĩkombenĩ kĩĩ.

²⁸ Ĩĩ nĩ nthakame yakwa ya ũtianĩo mweũ, ĩla ĩkwĩtĩkw'a kwondũ wa andũ onthe nĩ kana matonye kũekewa naĩ syoo.

²⁹ Na ekai nĩmũtavye, kuma yu ndikanyw'a ndivai ĩno ĩngĩ, kũvika mũthenya ũla nganyw'a ndivai nzaũ nĩ nenyu ũsumbĩnĩ wa Ĩthe wakwa.”

³⁰ Nĩvo ĩndĩ mainie wathi na maumaala mathi Kĩĩmanĩ kya Mĩthata.

Yesũ Aiweta kana Vetelo Nũkwĩsa Kũmũkaĩa

³¹ Yesũ nĩweeie amanyĩw'a make atĩĩ, “Ũtukũ ũũ inyw'onthe nĩmũũndia mũthi nũndũ wa kĩla kĩkwĩkĩka kwakwa, nĩkwĩthĩwa nĩkũandĩkĩtwe Maandĩkonĩ Matheu: ‘Ngai akooaa mũĩthi na malondu makanyaĩĩkĩa kĩthekanĩ.’

³² Ĩndĩ ĩtina wa kũthayũũka kwakwa, ngaenda mũkambĩthĩae mbikie Kalilii.”

³³ Vetelo amwĩa Yesũ atĩĩ, “O na ethĩwa ala angĩ nĩmeũkũtia mathi nũndũ wa kĩla kĩkwĩkĩka kwaku, nyie ndikakũtia o na ĩndĩĩ.”

³⁴ Nake Yesũ amwĩa atĩĩ, “Nĩkũtavya w'o, ũtukũ ũũ nzamba ĩtanamba kwasya, nũũkaĩa katatũ wasye ndũmbĩsĩ.”

³⁵ Ĩndĩ Vetelo amwĩa atĩĩ, “O na ethĩwa no nginya nĩkw'e vamwe naku, ndiasya kana ndikwĩsĩ.” Amanyĩw'a ala angĩ onthe nĩmaisye oou.

Yesũ Aivoya e Ngethisemani

³⁶ Nĩvo ĩndĩ Yesũ waendie e na amanyĩw'a make vandũ vetawa Ngethisemani na amea atĩĩ, “Ĩkalai vaa nambe kũthi vaya mbeange ngavoye.”

³⁷ Nĩwaendanisye na Vetelo na ala ana elĩ ma Nzevetii. Nĩwakwatiwe nĩ kyeva kingĩ na kĩũũyũ,

³⁸ na kwoou amea atĩĩ, “Nĩna kyeva kingĩ mũno ngoonĩ yakwa o na kĩĩw'a kũmbũaa; ĩkalai vaa na mũyĩkala mũsalukĩtye vamwe nakwa.”

³⁹ Yesũ nĩwaendangie mbee vanini, na akoma nthĩ na ĩvu na avoya ayasya atĩĩ, “Asa wakwa, ethĩwa nĩvatonyeka, mbetangĩe kĩkombe kĩĩ kya mathĩna! Ĩndĩ ndũkeke ũndũ ngwenda nyie, ĩka ũndũ ũkwenda we.”

⁴⁰ Nĩwasyokie vala ve ala amanyĩw'a atatũ na amethĩa makomete. Nĩwakũlilye Vetelo atĩĩ, “Kwoou inyw'ĩ mũyĩkala mũsalukĩtye vamwe nakwa o na vandũ va ĩsaa yĩmwe?

⁴¹ Ĩkalai mũsalukĩtye na mũivoya mũikalike matatwanĩ. Nĩmũkwenda kwĩka ũla waĩlu ĩndĩ mwĩ onzu.”

⁴² Yesũ nĩwaendie ĩngĩ na avoya ayasya atĩĩ, “Asa wakwa, ethĩwa kĩkombe kĩĩ kya mathĩna kĩimbĩtũka ndakĩnyw'ĩte, eka kwenda kwaku kwĩkwe.”

⁴³ Nĩwasyokie ĩngĩ vala ve ala amanyĩw'a, na amethĩa o makomete nũndũ maĩ na too mwingĩ.

⁴⁴ Nĩwamatiie ĩngĩ athi na avoya ĩvinda ya katatũ kwa kũtũngĩlĩĩla o ĩla mboya.

⁴⁵ Nĩvo ĩndĩ wasyokie vala ve ala amanyĩw'a na amakũlya atĩĩ, “O nayu nomũkomete na kũthũmũa? Aaya, saa nĩwavika wa Mwana wa Mũndũ kũnenganwe ũtonyinĩ wa andũ athũku.

⁴⁶ Ũkĩlai tũthi; mũndũ ũla ũkũnthoosya kwa amaitha makwa nĩwavika.”

Kũkwatwa kwa Yesũ

⁴⁷ Yesũ o aendee na kũneena, Yutasi, ũmwe wa ala amanyĩw'a ĩkũmi na elĩ nĩwavikie. Ookanisye na andũ angĩ aingĩ mũno makuĩte mbyũ na nzũma, matũmĩtwe nĩ athembi anene na atumĩa.

⁴⁸ Yutasi ũla wamũthooisye Yesũ, nĩwamatavĩtye akamea atĩĩ, “Mũndũ ũla ngũthi kũkethya na ngethi ya wendo, mũndũ nĩwe ũsu; mũkwatei.”

⁴⁹ Yutasi nĩwaendie ĩmwe kwa ĩmwe vala ve Yesũ na amwĩa atĩĩ, “Ũvoo waku Mũmanyĩsya,” na ĩndĩ amũkethya na ngethi ya wendo.

⁵⁰ Yesũ amũsũngĩa amwĩa atĩĩ, “Mũnyanyawa, katĩĩa kwĩka ũndũ ũla wakũete.” Nĩvo ĩndĩ andũ asu mamũkwatie Yesũ mamũlũmya.

⁵¹ Ũmwe wa ala maĩ na Yesũ nĩwakũie ũvyũ wake, na atema mũthũkũmi wa Mũthembi Mũnene amũtila kũtũ.

⁵² Nĩvo ĩndĩ Yesũ wamwĩie atĩĩ, “Tũngĩa ũvyũ waku vala wĩthĩawa. Mũndũ ũla wũkitaa na ũvyũ esaa kũawa na ũvyũ.

⁵³ Nowĩsĩ kana nĩ ndonya kũkũlya Asa wakwa ũtethyo, na oyu aindũmĩa nguthu mbee wa ĩkũmi na ilĩ sya alaĩka mandetee?

⁵⁴ Ĩndĩ namo Maandĩko Matheu meĩsaa kwĩanĩa ata, ala maĩtye kana ũndũ ũũ no nginya wĩkĩke?”

⁵⁵ Nĩvo ĩndĩ weeie yĩla ĩkomano ya andũ atĩĩ, “Mwooka kũngwata mũkuĩte mbyũ na nzũma ko nĩ kĩng'endilĩ? Kĩla mũthenya nĩnatindaa nĩilyĩ nthĩ Ĩkalũnĩ ngĩmanyĩsya na mũyaangwata!

⁵⁶ Ĩndĩ maũndũ aa onthe meekĩka nĩ kana meanĩsye kĩla kĩandĩkĩtwe nĩ athani nthĩnĩ wa Maandĩko Matheu.” Nĩvo ĩndĩ amanyĩw'a onthe masembie mamũtia.

Yesũ e Mbee wa Nzama

⁵⁷ Andũ ala mamũkwatie Yesũ nĩmamũtwaie nyũmba kwa Kaiava Mũthembi Mũnene, navo nĩvo amanyĩsya ma Mĩao na atumĩa moombanĩĩte.

⁵⁸ Vetelo nĩwamumĩte Yesũ ĩtina ĩndĩ e kũasa, mũvaka mavika kĩwanzanĩ kĩla kĩ nza wa nyũmba ya Mũthembi ũsu Mũnene. Nĩwekalile nthĩ vau nza vamwe na asikalĩ nĩ kana one kĩla kĩkwĩkĩka.

⁵⁹ Athembi anene na andũ ala angĩ ma nzama nĩmamanthaa andũ matonya kũneena ũkũsĩ wa ũvũngũ ĩũlũ wa Yesũ nĩ kana mamũtw'ĩĩe kũawa,

⁶⁰ ĩndĩ mayaaona ũmwe o na kau andũ aingĩ nĩmeeyumĩlilye maumya ũkũsĩ wa ũvũngũ ĩũlũ wa Yesũ. Mũthya andũ elĩ nĩmaumĩlile,

⁶¹ na masya atĩĩ, “Mũndũ ũũ anaisye, ‘Nĩndonya kwananga Ĩkalũ ya Ngai na ngĩyaka ĩngĩ na mĩthenya ĩtatũ.’ ”

⁶² Nĩvo ĩndĩ Mũthembi Mũnene waũngamie na amũkũlya Yesũ atĩĩ, “We ndwĩ na ũndũ ũsũngĩa? Wĩĩw'a andũ aa mayasya ata ĩũlũ waku?”

⁶³ Ĩndĩ Yesũ avindya, na Mũthembi Mũnene amwĩa atĩĩ, “Tũtavye kwa kwĩvĩta ĩsyĩtwanĩ ya Ngai ũla wĩ thayũ: We nue Klĩsto, Mwana wa Ngai?”

⁶⁴ Yesũ amũsũngĩa amwĩa atĩĩ, “We nĩwaneena. Ĩndĩ ekai nĩmũtavye, kuma yu kũthi na mbee, mũkamwona Mwana wa Mũndũ ailyĩ nthĩ ngalĩko ya kw'oko kwa aũme kwa Ũla wĩ Ũtonyi, na ayũka kũũ nthĩ e mathweonĩ ma ĩtu.”

⁶⁵ Yĩla Mũthembi Mũnene weewie ũu, nĩwatembũangie ngũa syake nĩ woo na asya atĩĩ, “Nĩwamũuma Ngai! Twĩ na vata ũngĩ mwaũ wa ngũsĩ? Inyw'ĩ nĩmweew'a ayĩuma Ngai.

⁶⁶ Kwoou mwĩtw'a ata?” Namo mamũsũngĩa mamwĩa atĩĩ, “Nũvĩtĩtye na aĩlĩtwe nĩ kũawa.”

⁶⁷ Nĩvo ĩndĩ mamũtw'ĩlangile mata ũthyũ na mamũkũna, na amwe nĩmamũmalĩkasya

⁶⁸ na kũmwĩa atĩĩ, “Tondũ nue Klĩsto, kwa tũtavye nũũ ũla waũkũna.”

Vetelo Ayasya kana Ndamwĩsĩ Yesũ

⁶⁹ Ĩvindanĩ yĩu Vetelo ailyĩ nthĩ kĩwanzanĩ nza. Mwĩĩtu mũthũkũmi nĩwookie vala ũĩ amwĩa atĩĩ, “We ũnaĩ na Yesũ ũla wumĩte Kalilii.”

⁷⁰ Ĩndĩ Vetelo akaĩa mbee wa andũ onthe asya atĩĩ, “Ndyĩsĩ ũndũ ũkwasya,”

⁷¹ na akwata nzĩa athi mũvĩanĩ wa kũlika vau kĩwanzanĩ. Mwĩĩtu ũngĩ mũthũkũmi nĩwamwonie na eea andũ ala maĩ vau atĩĩ, “Mũndũ ũũ anaĩ na Yesũ ũla wumĩte ndũanĩ ya Nasaleti.”

⁷² Vetelo nĩwakaĩie ĩngĩ kwa kwĩvĩta asya atĩĩ, “Ndimwĩsĩ mũndũ ũsu.”

⁷³ Ĩtina wa kavinda kanini, ala andũ maũngeme vakuvĩ nĩmamũthengeeie mamwĩa atĩĩ, “Kwa w'o we wĩ ũmwe wa andũ asu ma Yesũ, nũndũ o na mũneenele waku nũkwonany'a vala wumĩte.”

⁷⁴ Nĩvo ĩndĩ Vetelo wambĩĩie kwĩyĩumanĩa na kwĩvĩta ayasya atĩĩ, “Nyie ndimwĩsĩ mũndũ ũsu!” Na o vau kwa vau nzamba yasya.

⁷⁵ Vetelo nĩwalilikanile ũndũ Yesũ wamũtavĩtye akamwĩa atĩĩ, “Nzamba ĩtanamba kwasya, nũũkaĩa katatũ wasye ndũmbĩsĩ.” Kwoou Vetelo nĩwaumaalile nza na aĩa mũno e na woo mwingĩ.