MATHAYO 21 - MBIVILIA ŨVOO MŨSEO

Yesũ Ailika Yelũsalemu ta Mũsumbĩ

¹ Yesũ na amanyĩw'a make makilĩlyĩ kũvika Yelũsalemu, nĩmavikie Mbethivake, ndũa yĩ Kĩĩmanĩ kya Mĩthata. Me vau, Yesũ nĩwatũmie amanyĩw'a make elĩ,

² amea atĩĩ, “Endai ndũanĩ ĩya yĩ mbee wenyu na mwavika vo oou nĩmũkwĩthĩa ĩng'oi yovetwe mũtĩnĩ na ndena ya yo yĩ vakuvĩ nayo. Yĩthasyei mũndetee vamwe na ndena ya yo.

³ Mweew'a mũndũ ũkũmũkũlya ũndũ, mwĩei atĩĩ, ‘Mwĩai nũkũmenda,’ na oyu mũndũ ũsu nũkũmalekya.”

⁴ Ũndũ ũũ weekĩkie wĩanĩsye ndeto ila syaneeniwe nĩ mwathani akyasya:

⁵ “Tavyai andũ ma Yelũsalemu atĩĩ, ‘Mũsumbĩ wenyu nĩwũkĩte kwenyu! Nĩ mũuu na alĩsĩte ĩng'oinĩ, alĩsĩte ndenanĩ, ndena ya ĩng'oi.’ ”

⁶ Amanyĩw'a asu nĩmaendie na meeka o ũndũ Yesũ wamatavĩtye.

⁷ Nĩmamũeteie ĩng'oi yĩu na ndena ya yo, na mailĩĩla ngũa syoo ĩũlũ wamo, nake Yesũ alĩsa yĩmwe yamũkua.

⁸ Andũ aingĩ nĩmalanilye ngũa syoo nzĩanĩ, na angĩ nĩmatũlaa mbonge sya mĩtĩ makalany'a kũu nzĩanĩ.

⁹ Andũ ala maĩ mbee na ala maumĩte Yesũ ĩtina nĩmookĩlilye wasya mũnene mayasya atĩĩ, “Hosana Mwana wa Ndeviti! Nĩ mũathime ũla wũkĩte ĩsyĩtwanĩ ya Mwĩai! Hosana ĩũlũ ĩtunĩ.”

¹⁰ Yĩla Yesũ walikile Yelũsalemu, andũ onthe ala maĩ mũsyĩnĩ ũsu nĩmavũavũanie na mambĩĩa kũkũlany'a atĩĩ, “We ũũ nũũ?”

¹¹ Ĩkomano yĩla yookanĩtye na Yesũ nĩyamasũngĩie yamea atĩĩ, “Ũũ nĩ Yesũ, mwathani kuma ndũanĩ ya Nasaleti ĩla yĩ Kalilii.”

Yesũ Ailũngya Andũ Mathooeasya Syĩndũ Ĩkalũnĩ

¹² Nĩvo ĩndĩ Yesũ walikile Ĩkalũnĩ na alũngya andũ onthe ala mathooeasya na ala mathooaa syĩndũ vau. Nĩwang'uthũlangile mesa sya ala mavunzasya mbesa, na ivĩla sya ala mathooasya ndumbũ.

¹³ Nĩwatavisye andũ asu onthe atĩĩ, “Maandĩkonĩ Matheu Ngai nũneenete akasya, ‘Nyũmba yakwa nĩ nyũmba ya kũvoyea.’ Ĩndĩ inyw'ĩ mũmĩtw'ĩkĩthĩtye vandũ va kwĩvithaa avutani!”

¹⁴ Ilalinda mbingĩ na andũ ala maĩ na maũũ mathũku nĩmaendie vala ve Yesũ kũu Ĩkalũnĩ nake amavosya.

¹⁵ Yĩla athembi anene na amanyĩsya ma Mĩao moonie maũndũ asu ma ũseng'yo Yesũ weeka, na meew'a syana iineena na wasya mũnene kũu Ĩkalũnĩ iyasya atĩĩ, “Hosana kwa Mwana wa Ndeviti,” mathata mũno,

¹⁶ na mamũkũlya Yesũ atĩĩ, “No ũkwĩw'a ũndũ syana ii ikwasya?” Yesũ amasũngĩa amea atĩĩ, “Ĩĩ nĩngwĩw'a. Nũndũ mũtaasoma maandĩko aa: ‘Ngai nũmanyĩĩtye syana nini na tũũkenge kũmũtaĩa nesa’?”

¹⁷ Yesũ nĩwamatiie na auma mũsyĩnĩ ũsu athi Mbethani akakome kw'o.

Yesũ Ayĩumanĩa Mũkũyũ ũte na Ũsyao

¹⁸ Kwakya kĩoko tene Yesũ asyokete Yelũsalemu, nĩweew'aa nzaa.

¹⁹ Nĩwoonie mũkũyũ waĩ ũtee wa nzĩa na athi vo, ĩndĩ eethĩa ndwĩ na ũsyao, no matũ mathei. Kwoou awĩa mũkũyũ ũsu atĩĩ, “Kuma yu, ndũkethĩwa ĩngĩ na ũsyao!” Na vau kwa vau mũkũyũ ũsu wooma.

²⁰ Yĩla amanyĩw'a moonie ũu, nĩmaseng'ie mũno na makũlya atĩĩ, “Mũkũyũ ũũ woomanga ata mĩtũkĩ ĩsu?”

²¹ Yesũ amasũngĩa amea atĩĩ, “Nĩmũtavya w'o, ethĩwa nĩmũkũĩkĩĩa Ngai mũte na nzika, mũkeethĩwa mũtonya kwĩka ũu neekana na mũkũyũ ũũ. Na ti ũu w'oka ĩndĩ o na mũkeethĩwa mũtonya kwĩa kĩĩma kĩĩ, ‘Kũka vau wĩyĩkye ũkanganĩ,’ na kĩkeeka ũu mwasya.

²² Ethĩwa mũkavoya Ngai ũndũ na kũĩkĩĩa kana nũkũwĩanĩĩsya, Ngai akeeka ũu.”

Yesũ Aikũlw'a vala Wumĩtye Ũkũmũ wake

²³ Yesũ nĩwalikile Ĩkalũnĩ, na aendee kũmanyĩsya, athembi anene na atumĩa nĩmaendie vala ũĩ na mamũkũlya atĩĩ, “Wĩĩka maũndũ aa na ũkũmũ mwaũ, na nũũ ũla ũkũnengete ũkũmũ ũsu wa kũmeka?”

²⁴ Yesũ amasũngĩa amea atĩĩ, “O nakwa nĩngũmũkũlya ĩkũlyo yĩmwe, na mwanzũngĩa nĩngũmũtavya nĩĩka maũndũ aa na ũkũmũ mwaũ.

²⁵ Ndavyei, Yoana anengetwe ũkũmũ wa kũvatisa nũũ? Anengetwe nĩ andũ kana anengetwe nĩ Ngai?” Namo mambĩĩa kũoany'a maikũlany'a atĩĩ, “Twĩasya ata? Twasya, ‘Anengetwe nĩ Ngai,’ etũkũlya, ‘Nĩkĩ ĩndĩ mũtaaĩtĩkĩla ũvoo wa Yoana?’

²⁶ Na twasya, ‘Anengetwe nĩ andũ,’ andũ aa me vaa nĩmatonya kũtũthũkĩa nũndũ andũ onthe mesĩ kana Yoana aĩ mwathani.”

²⁷ Kwoou mamũsũngĩa mamwĩa atĩĩ, “Tũyĩsĩ.” Nake Yesũ amea atĩĩ, “O nakwa ndimũtavya nĩĩka maũndũ aa na ũkũmũ mwaũ.”

Ngelekany'o ya Mũndũ na Ana Make Elĩ

²⁸ “Kwasũanĩai mũndavye ĩũlũ wa ngewa ĩno. Ve mũndũ ũmwe waĩ na ana elĩ. Nĩwaendie vala ve mwana ũla mũkũũ amwĩa atĩĩ, ‘Mwana wakwa, enda ũkatethye wĩa mũũndanĩ wa mĩsavivũ ũmũnthĩ.’

²⁹ Mwana ũsu nĩwamũsũngĩie ĩthe amwĩa, ‘Ndithi,’ ĩndĩ ĩtina aalyũla ngoo, na athi kũtethya wĩa ũsu.

³⁰ Mũndũ ũsu atia mwana ũla mũkũũ alea, nĩwaendie vala ve mwana ũla mũnini amwĩa, ‘Enda ũkatethye wĩa mũũndanĩ wa mĩsavivũ ũmũnthĩ.’ Mwana ũsu nĩwamwĩie atĩĩ, ‘Ĩĩ nau, nĩngũthi,’ ĩndĩ alea kũthi.

³¹ Yu kwa ndavyei, nĩ wĩva katĩ wa asu me elĩ weekie kwenda kwa ĩthe wake?” Namo mamwĩa atĩĩ, “Nĩ ũla mũkũũ.” Kwoou Yesũ amea atĩĩ, “Nĩmũtavya w'o, aumĩthya ma koti na malwaya, nĩmeũlika ũsumbĩnĩ wa Ngai mbee wenyu.

³² Yoana Mũvatisi nĩwookie kwenyu inyw'onthe amwony'e ũndũ mwaĩlĩte kwĩkaa ũla waĩlu, nenyu mwalea kũĩkĩĩa ũvoo wake, ĩndĩ mo aumĩthya ma koti na malwaya mamũĩkĩĩa. Na o na yĩla mwoonie aumĩthya asu ma koti na malwaya meetĩkĩla ũvoo wa Yoana, mũyaaĩlila kwondũ wa naĩ syenyu mũkaĩkĩĩa ũvoo wake.”

Ngelekany'o ya Aĩmi Makomboete Mũũnda

³³ Yesũ nĩwaendeeie kũtavya athembi anene na atumĩa asu amea atĩĩ, “Ĩthukĩĩsyei nĩmũtavye ngelekany'o ĩngĩ. Kwaĩ mũndũ ũmwe waĩ na mũũnda na aũvanda mĩsavivũ. Nĩwawiĩĩie kĩthyũlũlũ na aseũvya ĩima vau nthĩnĩ ya kũvivĩaa ndivai. O ta ũu nĩwaakie kĩtaa kĩtũlu vo. Nĩwakomboethisye mũũnda ũsu kwa aĩmi mawũĩmae na athi kyalo nthĩ ĩngĩ.

³⁴ “Yĩla ĩvinda ya kũketha nzavivũ yavikie, nĩwatũmie athũkũmi make kũla kwĩ aĩmi asu makanengwe kĩlungu kĩla kyake kya ngetha mamũetee.

³⁵ Aĩmi asu nĩmakwatie athũkũmi make, ũmwe mavũa, ũngĩ mooaa na ũla ũngĩ makimanga na mavia.

³⁶ Mũndũ ũsu nĩwatũmie athũkũmi angĩ aingĩ kũte ala ma mbee. Ĩndĩ aĩmi asu mameka o ũndũ meekanie na ala ma mbee.

³⁷ Mũthya vyũ, nĩwatũmie mwana wake asũanĩĩte akasya, ‘Nĩmeũnenga mwana wakwa ndaĩa.’

³⁸ Ĩndĩ yĩla aĩmi asu moonie mwana ũsu meeana atĩĩ, ‘Ũũ nĩwe ũkanengwa mũũnda ũũ nĩ ĩthe; tũmũae na ũtiĩwa ũkatw'ĩka witũ!’

³⁹ Kwoou mamũkwata mamũtwaa nza wa mũũnda ũsu na mamũaa.”

⁴⁰ Nĩvo ĩndĩ Yesũ wamakũlilye atĩĩ, “Yuĩ, yĩla mwene wa mũũnda wĩsyoka mũsyĩ, akeekana ata na aĩmi asu?”

⁴¹ Namo mamũsũngĩa mamwĩa atĩĩ, “Andũ asu athũku, akamoaa vyũ na aikomboethya mũũnda ũsu wa mĩsavivũ kwa aĩmi angĩ, ala makamũnengae kĩlungu kĩla kyake kya ngetha ĩvinda yĩla yaĩlĩte.”

⁴² Yesũ nake amakũlya atĩĩ, “Inyw'ĩ no mwaasoma Maandĩkonĩ Matheu vala vaĩtye: ‘Ĩvia yĩla aki ma myako maleile, nĩyĩtw'ĩkĩte ĩvia yĩla ya vata mũno mwakonĩ. Mwĩai nĩwe wĩkĩte ũndũ ũsu, naw'o kote wa kũseng'ya methonĩ maitũ’?

⁴³ “Kwoou ekai nĩmũtavye, ĩvuso yĩu Ngai ũmũnengete ya kwĩthĩwa mwĩ andũ make, nũkũmũvena na ainenga andũ angĩ ala makekaa ũndũ Ngai wendete. [

⁴⁴ Mũndũ ũla wĩvalũka ĩũlũ wa ĩvia yĩu, akavevenzeka, na ethĩwa ĩvia yĩu yĩkavalũkĩla mũndũ, akatumbatumbĩka anyaĩĩke.”]

⁴⁵ Athembi anene na amanyĩsya ma Mĩao meew'a ngelekany'o isu sya Yesũ, nĩmamanyie kana nĩmo ũkũtinaa,

⁴⁶ na kwoou menda kũmũkwata, ĩndĩ makĩa ĩkomano nũndũ andũ moosaa Yesũ kwĩthĩwa e mwathani.